Fuɗɗoode 44

No Yuusufi ndaartindorii sakiraaɓe muuɗum

1Yuusufi wi'i ardiiɗo gollooɓe galle muuɗum oon:

— Hebbin bootooji worɓe ɓeen nguurey, haddi ko ɓe mbaawi hooƴude, wooɗi du ngattaa ceede mono fuu ley bootooru muuɗum. 2Ndeen ngattaa du ley hunnduko bootooru minyiiɓe oon horde am cardi, kayre e ceede nguurey makko oon fuu.

O waɗi no Yuusufi wi'iri o noon. 3Nde weetunoo fu, worɓe ɓeen e araaji muɓɓen ndimndaaɗi ɗiin fuu kokkaa laawol ndilli. 4Nde ɓe njaltunoo huɓeere ndeen, gilla ɓe mboɗɗaaki, Yuusufi wi'i mawɗo gollooɓe ley galle muuɗum oon:

— Umma! Tewnitin worɓe ɓeen. Nde kewtiɗaa ɓe fu, mbi'aa ɓe: «Ko saabii oɗon njoɓnitoroo moƴƴere e ko boni? 5Wanaa on kooƴii ko joomam yardata e ko o tiimirta ɗuum naa? On ngaɗii ko boni.»

6Gollanoowo Yuusufi oon hewtii ɓe, haaldi ɓe haalaaji ɗiin. 7Ɓe njaabii mo, ɓe mbi'i:

— Noy waɗi de joomii amin haaliri ni? Laamɗo hiinu maccuɓe maa gollude hono ɗi golleeji! 8Miccitoɗaa ceede ɗe min tawi nder bootooji amin illa Kanaana ɗeen, min ngartirii ɗe to ma? Ndelle noy min mbujjirta cardi naa kaŋŋe ley suudu joomii amin? 9Mo horde ndeen tawaa to muuɗum hakkunde maccuɓe maa fuu, joomum waree de minen heddiiɓe du min laatoo maccuɓe maaɗa.

10O wi'i:

— Ayyo, joonin ɗum laatortoo hono no mbiiruɗon noon: tawraaɗo horde ndeen fu laatoo maccuɗo am, ammaa heddiiɓe ɓeen kaa njoofee.

11Ɓe karii, ɓe njippini bootooji maɓɓe de mono fuu omti bootooru muuɗum. 12Gollanoowo Yuusufi oon fuɗɗiri bootooru mawniiwo oon, ina filoo faa yottii Benjamin, minyiiwo oon. De inan, horde ndeen ina woni ley bootooru minyiiwo oon. 13Nde ɓe nji'unoo ɗum fu, ɓe ceeki kaddule maɓɓe. Mono fuu rimndi araawa muuɗum, ɓe njeccii ley huɓeere toon.

No Yuusufi anndintiniri ɓe hoore muuɗum

14Yahuuda e sakiraaɓe mum njeccii ɓaade Yuusufi. Ɓe tawti Yuusufi ɗo ɓe mbayrunoo ɗum ɗoon. Ɓe caami e leydi yeeso muuɗum.

15O wi'i ɓe:

— Ko saabii de ngaɗuɗon nii? On anndaa gorko hono am ina tiimna naa?

16Yahuuda jaabii, wi'i:

— Joomii amin, ɗume min mbi'ata? Ɗume min mbaawi haalude? Noy min ngaɗata de min laamna ko'e amin? Laamɗo wannginii hakke amin. Joomii amin, min maccuɓe maa, minen e mo horde ndeen tawaa e junngo muuɗum oon fuu.

17Ammaa Yuusufi jaabii, wi'i:

— Laamɗo hiinam waɗude noon! Gorko mo horde ndeen tawaa e junngo mum oon, kam tan laatotoo maccuɗo am. Onon kaa, kootee to baabii on e jam.

18Yahuuda ɓattitii mo, wi'i:

— Miɗo ŋaare joomam! Hettina faa maccuɗo maa haala konngol gootol. Taa metteɗaa e maccuɗo maa. Si goonga wo a hono Fira'awna. 19Joomam, aan ƴami maccuɓe maa yalla ina njogii baaba e minyiiwo. 20De min mbi'i joomii amin miɗen njogii baaba e minyiragel korsungel ngel o heɓi ley naywaaku makko. Mawniigel maayii, kanngel tan baabiigel heddorii e reedu inniigel, de ingel horsi e baabiigel sanne. 21Ndeen mbiiɗaa maccuɓe maa ngaddane ngel faa njiiraa ngel gite maaɗa. 22Min njaabii joomii amin, min mbi'i suka oon waawaa seedude e bammum, sabo nde o seedi e baabiiko fuu, maayan. 23Ndeen mbiiɗaa maccuɓe maa «Si minyii on oon wardaay e mooɗon, on keɓataa yi'ude kam katin.» 24Nde min kootunoo to baaba amin, maccuɗo maa oon, min kaaltani ɗum haalaaji joomii amin ɗiin. 25Baaba amin wi'i: «Coƴƴee, coodanon en nguurey seeɗa.» 26Min mbi'i: «Min mbaawaa yaade, sanaa tawee minyii amin oon ina wondi e amin. Sabo min mbaawaa yottaade gorko oon si minyii amin oon waldaa e amin.» 27De caggal ɗuum, baaba amin, maccuɗo maa oon, wi'i: «Oɗon anndi jom suudu am oon rimanaay kam si wanaa ɓiɓɓe ɗiɗo. 28Gooto oon heddaaki, mbi'umi: Sikke fuu walaa o taƴaama, mi yi'aay mo katin. 29Oɗon kaajaa teetude kam o du. Si won bone kewtiiɗo mo fu, on ngaɗan miin jom hoore raneere oo, mi maayda e mettorgal ɓernde.»

30Noy mbaawrumi yeccoraade to baaba am, maccuɗo maa oon, tawee suka oon waldaa e amin. Si goonga, yonki makko e yonki muuɗum haɓɓodii. 31Sikke walaa, si o yi'aay suka oon, o maayan. Min mbardan baaba amin, gorko mawɗo oon mettorgal ɓernde. 32Miin maccuɗo maa du, mi waɗani baaba am aadi, suka oon ƴiiƴam muuɗum wona dow hoore am. Mbi'umi si mi wartiraay mo fu, feloore majjum yowoto dow hoore am haddi nguurndam am fuu. 33Joonin kaa joomam, miɗo nyaage, accu maccuɗo maa loomta suka oon. Suka oon hootida e mawniraaɓe muuɗum. 34Noy mbaawrumi hootirde to baaba am, tawee suka oon waldaa e am. Miɗo hula yi'ude torra kewtotooɗo baaba am oon.

Currently Selected:

Fuɗɗoode 44: FBF

Highlight

Copy