Fuɗɗoode 43

Haala jahaangal Misira ɗiɗaɓal

1Rafo ngoon ɓeydii sattude ley leydi maɓɓe toon. 2Nde ɓe timminnoo nguurey maɓɓe mo ɓe keɓoynoo Misira oon fu, baabiiɓe wi'i ɓe:

— Coƴƴee, coodanowon en nguurey seeɗa.

3Yahuuda jaabii mo, wi'i:

— Gorko oon sappanii min, wi'i min nji'ataa yeeso muuɗum si minyii amin oon waldaa e amin. 4Si a jaɓii minyii amin oon yaada e amin, min coodanoyte nguurey. 5Ammaa si a jaɓaay du, min njahataa, sabo gorko oon wi'i min, min nji'ataa yeeso muuɗum si minyii amin oon waldaa e amin.

6Israa'iila oon wi'i:

— Ko waɗi de ngaddanɗon kam torra o, kaalanɗon gorko oon oɗon ngoodi minyiiwo goɗɗo?

7Ɓe njaabii, ɓe mbi'i:

— Gorko oon ƴamii min dow haala suudu baaba amin sanne, o wi'i: «Baabii on ina wuuri naa? Oɗon njogii minyiiwo gorko naa?» Tilay min njaaborii mo. Ndelle miɗen mbaawnoo faamude yalla o wi'an min min ngaddowa minyii amin oon naa?

8Ndeen Yahuuda wi'i bammum Israa'iila:

— Accu suka oon yaada e am. Min njahan heɓa mbuuren taa maayen rafo, minen e maaɗa e ɓiɓɓe amin fuu. 9Mi hokkan yonki am saabe makko. Si mi wartiraay mo to maa, kokkumaami mo fu, feloore majjum yowotoo dow hoore am haddi nguurndam am fuu. 10Si goonga, si min ɓooyaayno ɗo fu, tawan min ngartiino ɗiɗaɓerde.

11Baabiiɓe Israa'iila, wi'i ɓe:

— Si wo noon fu, inan no ngaɗoton: si oɗon njaha fu, ngattee ley gineeji mon kulle ittaaɗe e leydi meeɗen. Kooƴon nebbam leɗɗe seeɗa e njuumndi seeɗa e ɗakkere uurnde e ɓiɓɓe leɗɗe belɗe e kuƴe kokkowon gorko oon. 12Njaaree ceede ɗe tawɗon ley bootooji mon ɗeen, wooɗi du kooƴon ceede goɗɗe. Ina waawi tawee wo ɗum boofi. 13Njaadee e minyii on oon, coƴƴee to gorko oon. 14Laamɗo Jom Baawɗe hokku on hinney yeeso makko, o hokkita on sakiike mon e Benjamin fuu. Miin du si mi waasan ɓiɓɓe am ɓeen kaa, mi waasa ɗum'en.

Jiidal Yuusufi e sakiraaɓe muuɗum

15Worɓe ɓeen njaadi e dokkal ngaal e ceede ɗe ɓe njeynoo yaadude ɗeen kile ɗiɗi. Ɓe kooƴi Benjamin du, ɓe njaadi Misira. Ɓe njottii yeeso Yuusufi.

16Nde Yuusufi yiinoo Benjamin ina wondi e maɓɓe ndeen, wi'i golloowo ardiiɗo wuro ngoon:

— Yaaru worɓe ɓe ley suudu am, kirsaa ndaaba, moƴƴinaa, sabo ɓe mbottodoto e am hannden.

17Gorko oon waɗi no Yuusufi wi'iri ɗum noon, nanni worɓe ɓeen ley suudu makko. 18Ko ɓe nannaa ley suudu Yuusufi ɗuum hulɓinii ɓe. Ɓe mbi'i:

— Ko ɓe ngatti en ley suudu ɗuum, tawan wo saabe ceede gattanooɗe ley bootooji meeɗen wakkati kootol men aranol ɗeen. En nannaama faa ɓe mbi'a wo en wuyɓe, ɓe nannga en, ɓe ngaɗa en maccuɓe, ɓe njogoo araaji men.

19Ndelle, ɓe ɓattitii golloowo ardiiɗo wuro Yuusufi oon, ɓe kaaldi e muuɗum dammbugal suudu ɗoon. 20Ɓe mbi'i:

— Accaa hakke joomii amin, arande min ngariino faa min cooda nguurey. 21Nde min njippinoo to min mbaalata toon fu, min omti bootooji amin, de mono fuu tawii ceede ko fotata e ceede muuɗum ley bootooru mum. Min ngartirii ceede ɗeen. 22Min ngardii du e ceede goɗɗe faa min cooda nguurey. Min anndaa gattuɗo ceede ɗeen ley bootooji amin.

23Oon jaabii, wi'i:

— Pukkinee hakkillooji mon, taa kulee. Laamɗo mon, Laamɗo baaba mooɗon, kam watti jawdi ndiin ley bootooji mon. Ceede mon ɗeen njottake kam.

Caggal ɗuum gorko oon hokkiti ɓe Simeyon. 24Gorko oon nanni ɓe ley suudu Yuusufi. O hokki ɓe ndiyam ɓe loota koyɗe maɓɓe, o nyaamni araaji maɓɓe. 25Ɓe cegilii dokkal maɓɓe ngal ɓe ngaddani Yuusufi ngaal fadde muuɗum e wartude hakkunde naange, sabo ɓe paamii ɗoon ɓe nyaamdata. 26Nde Yuusufi wartunoo ley ɓaade muuɗum ndeen, ɓe kokki ɗum dokkal maɓɓe ngaal, ɓe cujidani ɗum. 27O jowti ɓe, o ƴami jam maɓɓe, o wi'i:

— Kori jam ina wondi e baabii on, gorko mawɗo mo kaalɗon haala muuɗum oon? Imo wuuri naa?

28Ɓe njaabii, ɓe mbi'i:

— Baaba amin, maccuɗo maa oon, ina woni e jam. Faa hannden imo wuuri.

Ɓe turii, ɓe cujidi. 29O ɓanti gite makko, o yi'i Benjamin ɓii inniiko oon. O wi'i:

— Oo woni minyii on mo kaalunoɗon haala muuɗum oon naa?

O ɓeydi, o wi'i:

— Ɓiyam, Laamɗo waɗane hinney!

30Ɓernde makko hecciɗi nde o yiinoo minyiiko ndeen, o deƴƴinii, o filii nokku ɗo o woya. O naati ley fukkordu makko, o woyi. 31O wuyɓii de o yalti. O tinnitii o semmbinɗini ɓernde makko de o wi'i: «Ndottee mbottaari ndiin ngaddon!» 32Ndeen o hokkaa e feere makko, kamɓe du, ɓe kokkaa feere maɓɓe. Misirankooɓe wonduɓe e makko ɓeen du, kokkaa feere muɓɓen. Misirankooɓe njeyaano nyaamdude e Ibraninkooɓe sabo Misirankooɓe ina ndardannoo ɓe wo ɓe tuunɓe. 33Sakiraaɓe ɓeen njoƴƴiniraa yeeso Yuusufi ɓurɗo duuɓi faa hewti koddaajo. Ɗum haayɗinii ɓe, ɓe keddii iɓe ndaarondira. 34Yuusufi waɗi ɓe ɓattinanaa le'e joƴƴinaaɗe yeeso muuɗum ɗeen, mono e maɓɓe fuu e le'al muuɗum, ammaa le'al Benjamin ngaal ina ɓuri keddiiɗe ɗeen kile joy. Noon ɓe nyaamdiri e Yuusufi, ɓe njardi e muuɗum du, faa ɓe fuu ɓe ceyii.

Currently Selected:

Fuɗɗoode 43: FBF

Highlight

Copy