Fuɗɗoode 36

Ƴuwdi Isuwa

1Inan ƴuwdi Isuwa, bi'eteeɗo Edom. 2Inan Kanaaninkooɓe rewɓe ɓe Isuwa ɓaŋi: Aada ɓii Elon Hittiyanke e Oholibama ɓii Aana taan Jibiyon Hewinke e 3Basimat ɓii Ismaa'iila, sakiike Nebayot. 4Aada rimani Isuwa Elifas. Basimat du rimi Rewel. 5Oholibama rimi Yewus e Yalam e Koora. Ɓeen ngoni ɓiɓɓe ɓe Isuwa rimanaa leydi Kanaana.

6Isuwa hooƴi rewɓe muuɗum e ɓiɓɓe muuɗum worɓe e rewɓe e yimɓe muuɗum e cogge muuɗum e daabaaji muuɗum fuu, e jawdi mum ndi heɓi ley leydi Kanaana fuu, yaari leydi ngonndi, faa woɗɗoo minyum Yaakuuba. 7Sabo jawdi maɓɓe heewii faa ɓe mbaawaa jooɗodaade. Leydi ndi ɓe njooɗinoo ndiin heƴaay ɓe saabe keewal daabaaji maɓɓe.

8Isuwa hoɗi dow waamnde Seyir. Ɗum woni Isuwa bi'eteeɗo Edom oon. 9Inan inɗe taaniraaɓe Isuwa, bi'eteeɗo Edom, wonɓe dow waamnde Seyir: 10Elifas ɓii Aada e Rewel ɓii Basimat. 11Inan ɓiɓɓe Elifas: Teman e Omar e Jefo e Gatam e Kenas. 12Timna wo nattaaɗo Elifas ɓii Isuwa, nattaaɗo oon rimani Elifas Amalek. Ɓee ngoni ɓiɓɓe Aada jom suudu Isuwa. 13Inan ɓiɓɓe Rewel: Nahat e Jerak e Samma e Misa. Ɓeen ngoni ɓiɓɓe Basimat jom suudu Isuwa. 14Yewus e Yalam e Koora ngoni ɓiɓɓe Oholibama ɓii Aana taan Jibiyon. Oholibama jom suudu Isuwa oon rimani ɗum ɓe.

15Inan mawɓe lenyi ƴuwɗi e Isuwa: Ɓiɓɓe Elifas, afo Isuwa: Teman e Omar e Jefo e Kenas, 16e Koora e Gatam e Amalek. Ɓeen ngoni lenyi ɓiɓɓe Elifas ley leydi Edom, ƴuwɓe e Aada. 17Inan mawɓe lenyi ƴuwɗi e Rewel ɓii Isuwa: Nahat e Jerak e Samma e Misa. Kamɓe ngoni lenyi ƴuwɗi e Rewel ley leydi Edom. Ɓe ƴuurii e Basimat jom suudu Isuwa. 18Ɗii du ngoni lenyi ƴuwɗi e Oholibama jom suudu Isuwa oon: Yewus e Yalam e Koora. Kamɓe ngoni lenyi ƴuwɗi e Oholibama ɓii Aana. Oholibama wo jom suudu Isuwa. 19Ɓee ngoni ɓiɓɓe Isuwa e mawɓe lenyi muɓɓen. Ɗum woni Isuwa bi'eteeɗo Edom.

20Inan ɓiɓɓe Seyir Horinke wonɓe e leydi ndiin: Lotan e Sobal e Jibiyon e Aana 21e Dison e Eser e Disan. Ɓeen ngoni mawɓe lenyi Horinkooɓe, kam'en ngoni ƴuwɓe e Seyir jooɗinooɗo ley leydi Edom. 22Inan ɓiɓɓe Lotan: Hori e Hemam. Timna wo sakiike Lotan debbo. 23Inan ɓiɓɓe Sobal: Alwan e Manahat e Ebal e Sefo e Onam. 24Inan ɓiɓɓe Jibiyon: Ayya e Anna. Anna ina durannoo araaji bammum Jibiyon faa yi'i ildude wulnde ley ladde yoornde. 25Inan ɓiɓɓe Aana: Dison e sakiikem debbo Oholibama. 26Inan ɓiɓɓe Dison: Hemdan e Esban e Itiran e Keran. 27Inan ɓiɓɓe Eser: Bilhan e Sawan e Akan. 28Inan ɓiɓɓe Disan: Us e Aran. 29Inan mawɓe lenyi ƴuwɗi e Hor: Lotan e Sobal e Jibiyon e Aana e 30Dison e Eser e Disan. Ɓeen ngoni mawɓe lenyi Hor jooɗinooɗo ley leydi Seyir.

31Inan kaanankooɓe laamiiɓe leydi Edom fadde Israa'iila e heɓude kaananke: 32Bela ɓii Beyor laami Edom. Innde huɓeere makko wo Dinhaba. 33Bela maayi, Yobab ɓii Jerak mo Bosora loomti ɗum laamii. 34Yobab maayi, Husam mo leydi Teman loomti ɗum laamii. 35Husam maayi, Hadad ɓii Bedad loomti ɗum laamii. Oon woni bonnuɗo Madiyan ley leydi Mo'ab. Galluure makko ina wi'ee Awit. 36Hadad maayi, Samla mo Masreka loomti ɗum laamii. 37Samla maayi, Sawulu mo Rehobot-Nahar#36:37 Nahar wo maayo manngo loomti ɗum laamii. 38Sawulu maayi, Ba'al-Hanaan ɓii Akbor loomti ɗum laamii. 39Ba'al-Hanaan ɓii Akbor maayi, Hadar loomti ɗum laamii. Galluure makko ina wi'ee Pawu. Jom suudu makko ina wi'ee Mehetabel ɓii Matired debbo taan Mee-Jahab.

40Inan ardiiɓe lenyol Isuwa e cuuɗi muɓɓen, e gure to ɓe njooɗii: Timna e Alwa e Jetet 41e Oholibama e Ela e Pinon 42e Kenas e Teman e Mibisar 43e Magdiyel e Iram. Ɓee ardii leydi ndiin fuu, nokkuure fuu inndiraa suudu baaba jooɗiindu e muuɗum. Isuwa woni maama yimɓe Edom.

Currently Selected:

Fuɗɗoode 36: FBF

Highlight

Copy