Fuɗɗoode 33

Hawrugol Yaakuuba e Isuwa

1Yaakuuba ɓanti gite muuɗum, haynii Isuwa ina warda e yimɓe 400. O fecci sukaaɓe makko ɓeen, o hokki woɓɓe maɓɓe Leya, woɓɓe du Rahiina, woɓɓe du horɓe ɗiɗo ɓeen. 2O ardini horɓe ɓeen e sukaaɓe muɓɓen, o jokkini Leya e sukaaɓe muuɗum de o sakintini Rahiina e ɓiyum Yuusufi. 3Kanko e hoore makko du, o ardii ɓe. Nde o ɓadinoo mawniiko Isuwa ndeen, o sujidi kile jeɗɗi. 4Isuwa du doggi hawri e makko, mumilii daande makko, muccii mo. Ɓe mboyi. 5Isuwa ɓanti gite muuɗum yi'i rewɓe e sukaaɓe ɓeen de wi'i:

— Moy en ngoni wonduɓe e maaɗa ɓee?

Yaakuuba jaabii, wi'i:

— Sukaaɓe ɓe, wo ɓe Laamɗo hokkari maccuɗo maa.

6Horɓe ɓeen ɓattitii, kam'en e sukaaɓe muɓɓen, cujidi. 7Leya du ɓattitii, kam e sukaaɓe muuɗum cujidi. Caggal ɗuum, Yuusufi e Rahiina, kam'en du ɓattitii, cujidi. 8Isuwa wi'i:

— Ɗume woni cefe ɗe kawrumi ɗeen fuu?

Yaakuuba jaabii wi'i:

— Ɗuum wo faa mi heɓa moƴƴere yeeso maa, aan joomam.

9Isuwa wi'i:

— Sakiike am, miin miɗo hebbini jawdi. Joga komaa ɗuum.

10Yaakuuba wi'i:

— A'aa, miɗo ŋaare! Si aɗa yardii fu, nanngaa ko kokkumaami ɗuum. Sabo ko njiimi yeeso maa ɗuum na nanndani kam hono wo yeeso Laamɗo nji'umi. A jaɓɓorake kam no wooɗiri. 11Nanngu moƴƴere nde ngaddanmi ma ndeen, sabo Laamɗo barkinii kam, miɗo jogii huunde fuu.

O doolɗi ɗum faa jaɓi. 12Isuwa wi'i:

— Ummoɗen njehen, miin mi ardete.

13Yaakuuba jaabii mo wi'i:

— Joomam, aɗa anndi sukaaɓe ɓeen wo lokkaaɓe, miɗo jogii dammuuli e na'i ɓeyɗi muynooji. Si ɗi coggaama fay nyalooma gooto, dammuuli ɗiin fuu mbaatan. 14Miɗo ŋaare joomam, jaɓu ardaade maccuɗo maaɗa. Mi yahiran heese heese, mi jokka coggal gonngal yeeso am ngaal e sukaaɓe ɓeen faa kewta to joomam ley leydi Seyir.

15Isuwa wi'i:

— Mi yoppidete seeɗa e yimɓe wonduɓe e am ɓeen.

Yaakuuba jaabii, wi'i:

— Saabe ɗume? Ko keɓumi moƴƴere yeeso maa, aan joomam ɗuum, heƴii kam!

16Nyannde ndeen jaati Isuwa yeccii jokki laawol muuɗum yeccii Seyir. 17Ammaa Yaakuuba eggi, fonndii Sukkot. O mahani hoore makko suudu, o waɗani dammuuli makko buguuji. Ɗum waɗi de nokku oon inndiraa Sukkot#33:17 Maanaa Sukkot e Ibraninkoore woni buguuji..

18Noon Yaakuuba ƴuwiri Padan-Aram, faa yottii huɓeere Sikem wonnde ley leydi Kanaana ndeen e jam. O hoɗi ɗakkol mayre. 19Ɗo o nyiɓi hukum makko ɗoon, o soodi leydi ndiin buuɗi cardi 100 e junngo ɓiɓɓe Hamor. Hamor woni baaba Sikem. 20Yaakuuba darni toon sakkirde. O inndiri nde El-Elohe-Israa'iila#33:20 Maanaa El-Elohe-Israa'iila e Ibraninkoore woni Laamɗo woni Laamɗo Israa'iila..

Currently Selected:

Fuɗɗoode 33: FBF

Highlight

Copy