Fuɗɗoode 32

1Jaango mum, Laban dawi gilla subaka kecco, muccii ɓiɓɓe muuɗum rewɓe e taaniraaɓe muuɗum worɓe, barkini ɗum'en. Caggal ɗuum, o dilli to maɓɓe, o hooti wuro makko.

No Yaakuuba segilorii hawrude e Isuwa

2Yaakuuba du jokki laawol muuɗum. Nde o yahannoo ndeen, maleyka'en Laamɗo kawri e makko. 3Nde o yi'unoo ɓe fu, o wi'i:

— Ɓe wo konunkooɓe Laamɗo!

O inndiri nokku oon Mahanayim#32:3 Maanaa Mahanayim e Ibraninkoore woni pelle ɗiɗi naa geɓe konunkooɓe ɗiɗi..

4Yaakuuba waɗi nelaaɓe ardii ɗum njehi to mawnum Isuwa ley Seyir ɗuum woni leydi Edom. 5O yamiri ɓe, o wi'i:

— Inan ko mbi'oton joomam Isuwa:

«Inan ko maccuɗo maa Yaakuuba wi'i: Mi jooɗake to Laban, miɗo heddii toon faa joonin. 6Mi heɓii na'i e araaji e dammucce e maccuɓe e horɓe. Mi nelii yimɓe faa mi humpite, aan joomam, yalla miɗo heɓa yarramuye maa.»

7Nelaaɓe ɓeen ngarti to Yaakuuba, mbi'i ɗum:

— Min njehii to mawna Isuwa, kam du ina wara faa hawra e maaɗa. Imo wondi e worɓe 400.

8Yaakuuba huli sanne, wemmbaa. O fecci yimɓe wonduɓe e makko ɓeen pecce ɗiɗi, kam'en e dammucce e na'i e geelooɗi ɗiin fuu.

9O wi'itii:

— Si Isuwa yanii e feccere wootere, fiyii nde fu, tawan ɗiɗaɓerde ndeen ina reenii.

10Yaakuuba wi'i:

— Laamɗo maama am Ibrahiima, Laamɗo baaba am Isiyaaka, aan Joomiraaɗo wi'i kam: «Yecca leydi maa e suudu bammaa, mi waɗante moƴƴere!» 11Miin maccuɗo maa, mi fotaay heɓude hinney e hoolaare nde ngaɗanɗaa kam ndeen fuu. Sabo sawru am tan njoginoomi nde peƴƴannoomi gooruwol Urdun, ammaa joonin mi laatake cefe ɗiɗi. 12Miɗo ŋaare reenam e junngo mawnam Isuwa, sabo miɗo hula taa o wara, o fiya kam, miin e ɓiɓɓe am e inniraaɓe muɓɓen, o wara min. 13Aan Joomiraaɗo wi'i kam: «Mi waɗante moƴƴere, mi hebbinan ƴuwdi maa hono njaareendi maayo, ndi limataako.»

14Yaakuuba waali toon jemma oon. Finti subaka, o itti dokkal ley ko o jogii e junngo makko fuu, o neli mawniiko Isuwa hokkee: 15be'i debbi 200 e damɗi 20. Baali debbi 200 e jawɗi 20. 16Geelooɗi 30 ɓireteeɗi e ɓiɓɓe muɓɓen. Na'i debbi 40 e ga'i 10. Tefeeji 20 e gorbi 10. 17O hokki ɗi maccuɓe makko, coggal fuu yaha e feere muuɗum, o wi'i ɓe:

— Ardee kam, njoppon njaayri hakkunde coggal e coggal fuu.

18O yamiri arano oon, o wi'i:

— Si mawnam Isuwa hawri e maaɗa, de ƴami ma: «Wo a maccuɗo moy? Toy njahataa? Moy jeyi coggal gonngal yeeso maa ngaal?» fu, 19njaaboɗaa, mbi'aa: «Maccuɗo maa Yaakuuba jeyi ngal. Wo ɗum dokkal ngal o neldi joomiiko, Isuwa hokkee. Kanko du imo wara caggal amin.»

20O wi'i noon ɗiɗaɓo oon e tataɓo oon e soggooɓe cogge ɓeen fuu:

— Inan no kaaldirton e Isuwa si on kawrii e muuɗum, 21mbi'on mo: «Maccuɗo maa Yaakuuba du ina wara caggal amin.»

Sabo o wiitake: «Mi filoto surdude mo e dokkal teddungal ardotoongal. Caggal ɗuum si min kawrii fu, na hasii o jaɓɓoo kam.» 22Dokkal ngaal ardii, de kanko e hoore makko kaa, o waalti e hoɗorde ndeen jemma oon.

Haala durwo Yaakuuba

23Ley jemma oon, o ummini rewɓe makko ɗiɗo e horɓe muɓɓen ɗiɗo e ɓiɓɓe makko worɓe 11 ɓeen. O feƴƴintini ɓe feƴƴitirde gooruwol Yabok. 24Nde o feƴƴintinnoo ɓe ndeen, o feƴƴintini ko o mari fuu. 25Kanko kaa o heddii gaɗa toon.

Ley jemma majjum gorko gomma wari, durwi e makko faa weeti. 26Nde oon yiinoo waawataa mo ndeen, fiyi mo dow asangal, de asangal makko ngaal silɓi ley durwo maɓɓe ngoon.

27Gorko oon wi'i:

— Yoppam faa mi dilla, sabo ɓadake weetude.

Ndeen Yaakuuba jaabii mo, wi'i:

— Mi yoppataa ma, si wanaa mbarkinɗaa kam.

28Gorko oon wi'i mo:

— Noy mbi'eteɗaa?

O jaabii, o wi'i:

— Miɗo wi'ee Yaakuuba.

29Oon wi'i:

— A inndirtaake Yaakuuba katin. A noddirte Israa'iila#32:29 Maanaa Israa'iila e Ibraninkoore woni «Durwoowo e Laamɗo». sabo a durwidii e Laamɗo, wooɗi a durwidii e yimɓe du, de keɓuɗaa barke.

30Yaakuuba ƴami mo, wi'i:

— Haalanam innde maa.

O jaabii, o wi'i:

— Ko saabii lamndiɗaa innde am?

Ndeen oon barkini mo.

31Yaakuuba wi'i:

— Mi yi'i Laamɗo gite e gite, de ɗuum fuu yonki am hisi.

Saabe majjum, o inndiri nokku oon Paniyel. Ɗuum woni «Yeeso Laamɗo».

32Nde o faltotonoo Paniyel ndeen, naange fuɗi. Imo laƴa asangal. 33Ɗum waɗi de Israa'iila'en nyaamataa ɗaɗol asangal gilla ndeen faa hannden. Sabo Laamɗo fiyii dow ɗaɗol asangal Yaakuuba.

Currently Selected:

Fuɗɗoode 32: FBF

Highlight

Copy