Fuɗɗoode 25

Haala maayde Ibrahiima e ƴuuruɓe e muuɗum

1Ibrahiima hooƴi debbo goɗɗo katin, innde debbo oon wo Ketura. 2Oon rimani mo Simran, Yoksan, Medan, Madiyan, Yiisbak, e Suwak. 3Yoksan rimi Seba e Dedan. Ɓiɓɓe Dedan ngoni Asurinkooɓe e Letusinkooɓe e Le'uminkooɓe. 4Inan ɓiɓɓe Madiyan: Efa, e Efer, e Henok, e Abida e Elda'a. Ɓeen fuu e Ketura ƴuuri.

5Ibrahiima hokki Isiyaaka huunde fuu ko jeyi. 6Ibrahiima itti jawdi, hokki ɓiɓɓe worɓe ɓe rewɓe muuɗum naattaaɓe ndimani ɗum ɓeen, o woɗɗini ɓe, ɓe njehi faro lettugal, ɓe ndilli ɗakkol ɓiyiiko Isiyaaka gilla imo wuuri.

7Duuɓi Ibrahiima fuu wo 175. 8Ibrahiima wuuri duuɓi keewɗi e nguurndam kiɓɓuɗam. O maayi caggal naywaaku mbelngu. O mooɓaa, o hawritowi e maamiraaɓe makko. 9Isiyaaka e Ismaa'iila ɓiɓɓe makko ɓeen mooɓi mo ley loho Makpela ɗakkol Mamre ley ngesa Eforon ɓii Sohar, Hittiyanke. 10Ngaan woni ngesa nga Ibrahiima soodi to Hittiyankooɓe ngaan. Toon Ibrahiima e deekum Saaratu fuu mooɓaa. 11Caggal maayde Ibrahiima, Laamɗo barkini Isiyaaka ɓiyum oon. Isiyaaka jooɗowii ɗakkol ɓunndu Lahay Roy.

12Inan ƴuwdi Ismaa'iila ɓii Ibrahiima mo Hajara Misiranke oon rimani ɗum. 13Inan inɗe ɓiɓɓe Ismaa'iila worɓe e no ɓe njokkondiri Nebayot afo makko e Kedar e Adubel e Mibisam, 14e Misma e Duma e Masa, 15e Hadat e Teema e Yetur e Nafis e Kedema. 16Ɓee ngoni ɓiɓɓe Ismaa'iila worɓe, ɓe 12. Mono e maɓɓe fuu laamake lenyol jooɗiingol ley kuɓeeje e gure ɗo tawaa. Mono fuu innde muuɗum heddii e nokku ɗo laamii ɗoon. 17Duuɓi ɗi Ismaa'iila wuuri fuu wo 137. O maayi, o mooɓaa, o hawritowi e maamiraaɓe makko. 18Yuwdi makko jooɗake illa Hawila faa yaade Sur ɗakkol Misira faa yaade Asuura. Ɓe keddodii toon rafi potal e sakiraaɓe maɓɓe.

Haala Yaakuuba

Haala rimeede Isuwa e Yaakuuba

19Inan ƴuwdi Isiyaaka ɓii Ibrahiima:

Ibrahiima rimi Isiyaaka. 20Duuɓi Isiyaaka wo 40 nde ɓaŋannoo Rebeka minyoo Laban, ɓii Betuwel Aramanke ƴuuruɗo Padan-Aram oon. 21Rebeka kaa wo dimaro. Saabe ɗuum Isiyaaka du'ii, ŋaarii Joomiraaɗo saabe jom suudu muuɗum. Joomiraaɗo nani du'aaw makko, de Rebeka hooƴi reedu. 22Ɓiɓɓe ɓeen ina ndunƴondira ley reedu muuɗum. O wi'i:

— Si wo nii, ko saabii miɗo wuuri?

O yehi, o lamndii Joomiraaɗo. 23Joomiraaɗo jaabii mo, wi'i:

Lenyi ɗiɗi ngoni ley reedu maaɗa,

laamuuji ɗiɗi ɗi kawtaa njaltan e maaɗa.

Lenyol gootol laatoto ɓurngol semmbe.

Mawniiwo oon gollanan minyum.

24Nde wakkati ɓeyngu makko yottinoo ndeen, o rimi funeereeɓe worɓe. 25Arandeejo oon yalti, wo boɗeejo coy, de leeɓi ina keewi dow ɓanndu muuɗum fuu hono saayo. Ndelle o inndiraa Isuwa. 26Caggal ɗuum, ɗiɗaɓo oon yalti, junngo mum ina tiigii teppere Isuwa. Oon inndiraa Yaakuuba (ɗum na fiirta «tiigiiɗo teppere»). Duuɓi Isiyaaka wo 60 nde ɓe ndimetenoo ndeen.

27Sukaaɓe ɓeen mawni. Isuwa laatii loohotooɗo mawɗo jiɗuɗo yiilaade ley ladde, de Yaakuuba kaa laatii neɗɗo keesindiiɗo buurɗo ley hukumuuji. 28Isiyaaka ina yiɗunoo Isuwa sabo imo yiɗi teewu ladde, de Rebeka kaa wo Yaakuuba yiɗi.

29Nyannde gomma Yaakuuba defi nyebbe, Isuwa du ƴuuri ladde warti, ina tampi sanne. 30Isuwa haaldi e Yaakuuba, wi'i:

— Miɗo ŋaare, kokkaa kam nyebbe maa boɗeeje ɗe seeɗa mi nyaama, sabo mi tampii.

Saabe ɗuum o inndiraa Edom (ɗum na fiirta «Boɗeejo»).

31Yaakuuba wi'i:

— Ndelle sonniram mawniraagu maa tafon.

32Isuwa jaabii, wi'i:

— Inan miɗo maaya! Ɗume mawniraagu nafata kam?

33Yaakuuba wi'i:

Kunanoɗaa kam, tafon.

De Isuwa hunanii mo, soottirii mo mawniraagu muuɗum. 34Yaakuuba hokki Isuwa buuru e nyebbe cewɗe boɗeeje ɗeen. O nyaami, o yari de o ummii o dilli. Noon Isuwa famɗiniri darja mawniraagu muuɗum.

Currently Selected:

Fuɗɗoode 25: FBF

Highlight

Copy