Mako 6

Yeshu ukukaniwa ku Nazaleta

(Mateo 13:53-58; Luka 4:16-30)

1Yeshu wafumine ku mbalila iyo, wabokele ku munzi wendi, bandongesha bendi bamukonkele. 2Mutena Wakukatala oho wakumine, watatikile ku longesha mu shinangonge. Bantu babengi obo bamuyuvwile bakomokele na kwamba ngayi, “Kati ou muntu ebye nimwabyo nabiwana kuti? Kati eze ngana za nahiti zinapanikiwi kukwendi? Bikomokesho bya nehe bikutendiwa nahiti na maboko wendi? 3Kati kaliha niye mukakubaza, mwana Maliya ndi? Kati kaliha niye yaya Yakoba na Yoshesha na Yundashi na Shimoni ndi? Kati bampanzendi kaliha nibo tulinabo kuno ndi?” Pe bamukanine.

4 # Yowa 4:44. Ngoboni Yeshu wambile kukwabo ngayi, “Muluwe wa Nyambi wufwawo maleema mu munzi wendi na mukati ka bawushinda wendi na ku bakalivumo lyendi, ndele kwashenge.”

5Kaliha watweshele kutenda bikomokesho kuyo, ngoboni wakambikile maboko wendi ha bakakukola babashe tuhu obo anyongomanishile. 6Yeshu wakomokele shikuma ndaba ya kubula kukulupila kukwabo. Niho ayile na ku longesha mu minzi yiyo yazingulukile kuyo.

Yeshu ukutuma bandongesha likumi na babili

(Mateo 10:5-15; Luka 9:1-6)

7Yeshu wehanine balikumi na babili, pe watatikile kubatuma babili, babili. Pe wabapanikile ngovu za kufumisha mayimbwe. 8#Luka 10:4-11. Wabakanishile ngayi, “Hinga mushimba shuma shimo, ha mukala wenu, ndele muwana tuhu pele. Hinga mushimba mankende, hinge shipawupawu, hinge mali mu bikwama byenu. 9Muvwale ncangwa, kami hinga mushimba shikobelo shamina.” 10Wambile kukwabo kami ngayi, “Mukekale mu litala nimwamo muya bakamitambula, kutwala ku shikati shiya eze mukafumemo. 11#Mil 13:51. Kami nimwako kuya bakabula kumitambula, hinge bakabula kumiyuvwa, oho mukafumako totomonenu lukungu ku mawulu wenu nilwo lukenge wupaki kukwabo ngayi banakiluku ndayano.”

12Niho bandongesha bayile na ku shimikila ngayi bantu batenguluke. 13#Yako 5:14. Batandile mayimbwe amengi na kuwabisha mazi bakakukola babengi na ku banyongomanisha.

Lufu lwa Yowano Mukakuzubilisha

(Mateo 14:1-12; Luka 9:7-9)

14 # Mat 16:14; Mako 8:28; Luka 9:19. Mwene Helonda Antipashi kalela wa mu Ngalileya wayuvwile ebye, ndaba lizina lya Yeshu lyatumbalalile. Pe bamo bambile ngayi, “Yowano Mukakuzubilisha unashanguku ku bafu, nisho shikuletesha ngayi ngovu eze zitende bikomokesho mumwendi.”

15Bamina bambile ngayi, “Niye Eliya.” Bamina ngayi, “Niye muluwe wa Nyambi, ou ukulifweka na umo wa bamiluwe ba ku mwaka.”

16Ngoboni Helonda oho ayuvwile noho, wambile ngayi, “Ou nengi Yowano uya naketwile mutwe niye unashanguku ku bafu!” 17#Luka 3:19-20. Ndaba kunyima Helonda watumine bantu mukukwata Yowano, bamumangile na kumuyaka mu tolongo. Watendele eshe ndaba niye Helonda wayekele Helondiyashi, mukaza mukonzo wendi Fwilipu. 18Ndaba Yowano Mukakuzubilisha wambililenga Helonda ngayi, “Kaliha shinafwanini obe kuyeka mukaza mukonzowobe!” 19Ndaba ya shuma eshe, Helondiyashi wazimbile Yowano shikuma, kami washingile kumuziha, ngoboni kaliha watweshele ndaba ya Helonda. 20Helonda watininenga Yowano, ndaba ya kumulimuka ngayi niye wengile muntu wakwoloka na kuyela, pe wamulamine shiwahe. Oho Helonda ayuvwilenga Yowano ha shimikila, walikomokelelenga shikuma, hinge noho washingilenga kuyuvwilila kukwendi.

21Kukumininako shikati sha Helondiyashi shezile. Ha mutena wa kwanuka kuhemuwa kwa Helonda, wapingile shimbo sha mayambwayambwa. Pe wehanine babilolo na bakakutwaminina nzita na bantu babalemu ba mu Ngalileya. 22Oho mwana Helondiyashi wa mushimbi enginine, washindile na kuwahililisha Helonda nanobo ekalile nabo, pe mwene wambile ku mushimbi ngayi, “Lomba kukwami eshe nimwasho ukushinga, pe nika kupanikasho.” 23Niho amukulupishile na kulibeza ngayi, “Eshe nimwasho ukanyepa nika kupanikasho, hinge shitika sha wene wami!”

24Niho ayile na kwipula bamandiyendi ngayi, “Nikanyepe bishini?”

Mandiyendi wakumbwile ngayi, “Nyepa mutwe wa Yowano Mukakuzubilisha.”

25Wanguwangu niho abokele kuli mwene, pe wambile ngayi, “Nikushinga ngayi mumpanike na wangu mutwe wa Yowano Mukakuzubilisha mu lulonga!”

26Mwene wayenene shikuma, ngoboni ndaba ya mbeza zendi na bantu bayo ehanine, kaliha washingile kukiluka mazu wendi. 27Wanguwangu mwene watumine kanzita mukakulama ku tolongo kuya mu kuleta mutwe wa Yowano. Kanzita mukakulama wayile ku tolongo na kuketula mutwe wa Yowano, 28pe wawuletele ha lulonga na kuwu panika mushimbi. Niho mushimbi akapanikile bamandiyendi. 29Oho bandongesha ba Yowano bayuvwile eshe shatendiwile, bezile na kushimba mutuntu wendi kuya mu kuwu funda mu shinzimbi.

Yeshu ukulisha makulukazi mutanu a bantu

(Mateo 14:13-21; Luka 9:10-17; Yowano 6:1-14)

30Bantumwana babokele kuli Yeshu, bamushimikilile byuma nimwabyo ebye bakatendele nanebye balongeshele. 31Niho ambile kukwabo ngayi, “Tuyenunga kwaninkayetu ku mwanya waku mwena ngayi mutweshe kukatala kashikati.” Ndaba bantu babengi bendanganinenga kwiza kukwabo, pe babulile shikati sha kulya. 32Benginine mu wato na kuya kwaninkayabo ku mwanya waku mwena.

33Nohobene bantu babengi obo babamonene hibaya, babalimukile, bafumine ku minzi yabo nimwayo, pe babetukilile, niho babapitakanine na kukumangaho kuyo bayilenga Yeshu na bandongesha bendi. 34#Kul 27:17; 1Bamy 22:17; 2Bya 18:16; Ezek 34:5; Mat 9:36. Oho Yeshu afumine mu wato wamonene likunge lya bantu lyalinene. Niho abayuvwilile nceshe ndaba bengile ngo bambelele bakubula mulishani, pe watatikile kubalongesha byuma byabingi. 35Oho mutena shilolo wulele, bandongesha bendi bezile kukwendi bambile ngayi, “Muno tuli mulibelelengwa. 36Tongweza bantu baye ku minzi yili hahepi bakalilandile byakulya.”

37Ngoboni Yeshu waba kumbwile ngayi, “Bapanikenu byakulya.”

Niho bambile kukwendi ngayi, “Tuye na kulanda mankende na mali a shiliva a myanda yibili#6:37 Mali a shiliva a myanda yibili: Mali a shiliva engile mali a mulimo wa ha mutena umo. na kubapana ngayi balye ndi?”

38Niye wambile kukwabo ngayi, “Muli na mankende anga? Yenu mukamone.”

Oho balimukile obyo bekalile nabyo bambile ngayi, “Kuli mankende mutanu na zinci zibili.”

39Niho Yeshu atongwezele bandongesha bendi ngayi bekalike bantu mu tunzunga ha mwila wamulombelela. 40Bantu bekalile mu tunzunga, tumo mwekalile mwanda na twamina mwekalile makumi mutanu. 41Niho Yeshu atambwile mankende mutanu na zinci zibili, pe watilaminine kuyilu, wakambililile kuli Nyambi niho apabwile mankende. Wapanikile bandongesha bendi ngayi batapishile bantu. Niho kami atapishilile zinci zibili ku bantu nimwabo. 42Nimwabo balile kami bekutile. 43Pe bandongesha benzalishile zintumba likumi na zibili za ncankuncanku za mankende na zinci. 44Pe bayo balile bengile balume makulukazi mutanu.

Yeshu ukwenda ha mema

(Mateo 14:22-33; Yowano 6:15-21)

45Wanguwangu Yeshu watongwezele bandongesha bendi ngayi bengine mu wato bayengaho mu nciza ya liziba ku Mbeteshayinda, oho niye ashili na kupanzanisha likunge lya bantu. 46Munyima ya kulishalisha na bantu, wayile ha lipili mu kulombela.

47Oho mazolo akumine wato wekalile hakati ka liziba, kami niye wekalile ninkayendi ha lukandwa. 48Yeshu wamonene bandongesha bendi hibakabakana kuvuwa wato, ndaba bayilenga kwafuminenga nkuli. Shikati sha malungashiku, Yeshu wezile kukwabo henda hayilu ya mema, kami wengile ngo ukubapitakana. 49Oho bamumonene henda hayilu ya mema, bahanganikile ngayi kayebela. Niho babilikizile, 50ndaba nimwabo bamumonene, pe batinine.

Wanguwangu Yeshu wambile kukwabo ngayi, “Tulenu mitima! Ami. Hinga mutina!” 51Niho enginine mu wato hamo nabo, kami nkuli yamanine. Bandongesha bendi balikomokelele shikuma. 52Ndaba kaliha bayuvwishishile kutontoloka kwa kulisha makulukazi mutanu a bantu ndaba mitima yabo yengile yayikalu.

Yeshu ukunyongomanisha bakakukola mu Ngeneshaleta

(Mateo 14:34-36)

53Oho Yeshu na bandongesha bendi bazabukile liziba, bakumine ku litunga lya Ngeneshaleta, pe bafuwikile wato wabo ku shibumbo. 54Wanguwangu oho bafumine mu wato, bantu balimukile Yeshu. 55Betukilile ku minzi nimwayo na kuleta bakakukola ha malili abo, nimwako oko bayuvwile ngayi Yeshu niko ali. 56Nimwamo omo apitilenga hinga mu tuminzi, hinga mu munzi, hinge mu litunga nimwalyo, bayakile bakakukola ku myanya ya kulandishila, pe banyepele Yeshu ngayi bakakukola bakwate hinge tuhu ku mungundo wa shivwalo shendi. Nimwabo obo bakwatileko banyongomanine.

Currently Selected:

Mako 6: LLK

Highlight

Copy