Mako 4

Nguli ya mukakukuba

(Mateo 13:1-9; Luka 8:4-8)

1 # Luka 5:1-3. Yeshu watatikile kami ku longesha ha shibumbo sha Liziba lya Ngalileya. Ndaba likunge lya bantu lya kungulukilile kukwendi lyengile lyalinene, niho enginine mu wato, pe wekalilemo. Wato wekalile mu liziba hahepi na shibumbo, ngoboni likunge lya bantu bekalile ha shibumbo hahepi na mema. 2Wabalongeshele byuma byabingi mu zinguli, wambile kukwabo ngayi, 3“Yuvwililenu! Mukakukuba wayile na kukuba. 4Oho akubilenga, mbuto yamina yawililile mu nzila, tuyoni twezile na kuyilya. 5Mbuto yamina yawililile ha mamanya ha kubula limvu lyalingi, Yamenene wanguwangu ndaba kaliha hekalile limvu lyalingi. 6Oho mutena watatumukile yalebukile, ndaba mipishi yabulile kwingina shikuma, pe mbuto yayumine. 7Yamina yawililile mukati ka mihongela, oho mihongela yakulile, yayitintishile, niho yabulile kuyima. 8Ngoboni mbuto yamina yawililile mu limvu lya wilo, yamenene, yakulile niho yayimine. Yayimine makumi ahatu, yamina yayimine makumi mutanu na limo, yamina yayimine mwanda.”

9Niho Yeshu ambile kukwabo ngayi, “Ou uli na matu akuyuvwa, ayuvwe!”

Shifungo sha zinguli

(Mateo 13:10-17; Luka 8:9-10)

10Oho Yeshu ekalile ninkayendi, bamo baya bamuyuvwile na bandongesha likumi na babili bezile kukwendi, pe bamunyepele ngayi abatontolwele zinguli. 11Yeshu wambile kukwabo ngayi, “Kukwenu kunapanikiwi kulimuka ncimpi za Wene wa Nyambi. Ngoboni kukwabo ba hamunkanda, byuma ebye binambiwi mu zinguli, 12#Isha 6:9-10. ngayi,

‘Mwanga bamone, ngoboni kumoneshesha bafwako,

kami mwanga bayuvwe, ngoboni ku yuvwishisha bafwako.

Kutina batengulukila kukwami ngayi ni bayatile wubi wabo.’ ”

Yeshu ukutontolola nguli ya mukakukuba

(Mateo 13:18-23; Luka 8:11-15)

13Yeshu wambile kukwabo ngayi, “Kati ku yuvwishisha eye nguli mufwako ndi? Haya mukalimuka nahiti zinguli nimwazo? 14Mukakukuba ukukuba lizu lya Nyambi. 15Bantu bamo banafweke ngo mbuto yawililile mu nzila, wanguwangu oho ba kuyuvwa lizu Shatana ukwiza na kufumisha lizu linakubiwi mu mitima yabo. 16Bantu bamina banafweke ngo mbuto yinakubiwi ha mamanya ha kubula limvu lyalingi, oho ba kuyuvwa lizu, wanguwangu ba kulitambula na ku wahilila. 17Ndaba lizu kuzika mipishi mumwabo lifwako, nohobene bakekala kashikati kakashe tuhu, oho makando hinge malwa bikeza kukwabo ndaba ya lizu, wanguwangu bakashiya kukulupila kwabo. 18Bantu bamina banafweke ngo mbuto yinakubiwi mukati ka mihongela. Nibo ba kuyuvwa lizu, 19ngoboni bakulifulankana bya wumi wa mu litunga na bifungo bya kwongeza bya wuheti na nyumwa ya byuma byamina bikwiza kukwabo, pe bikutintisha lizu ngayi libule kuyima mikabo. 20Bantu bamina banafweke ngo mbuto yinakubiwi mu limvu lya wilo. Nibo ba kuyuvwa lizu, ba kulitambula na kuyima mikabo. Bamo ba kuyima makumi ahatu, bamo makumi mutanu na limo na bamina mwanda.”

Lumuni lwa kufwikiwa lulonga lwa kukunama

(Luka 8:16-18)

21 # Mat 5:15; Luka 11:33. Yeshu wambile kukwabo ngayi, “Kati muntu wamunikanga lambi na kufwika lulonga lwa kukunama hinge kuyiyaka mu nceto ya wulili ndi? Kati kuyiyaka haya yikutwesha ku moneka wufwako ndi? 22#Mat 10:26; Luka 12:2. Ndaba kowa shuma sha kuholekiwa, shikabula kuholoka, hinge sha kulimbiwa shikabula kutumpuka. 23Ou uli na matu akuyuvwa, ayuvwe!”

24 # Mat 7:2; Luka 6:38. Wambile kukwabo kami ngayi, “Keyenu nanebye mu kuyuvwa. Mukafwanikiziwa na shifwanikizo munafwanikizi nasho baminenu nisho Nyambi akamifwanikiza nasho kami ukamiwezelelako. 25#Mat 13:12; 25:29; Luka 19:26. Ndaba ou ulinabyo bakamuwezelelako, kami ou unabibulu bakamuyanga nanaka alinako.”

Nguli ya kukula kwa mbuto

26Yeshu wambile kami ngayi, “Wene wa Nyambi wenga ngo muntu akubanga mbuto mu mfuba yendi. 27Hinge ukulangana wushiku na kupinduka mwaana, mbuto akubile yamenene na kukula. Ngoboni kulimuka eshe yikukula wufwako. 28Ndaba limvu nilyo lya kuli shanga mbuto. Kwatatikanga zinconga, niho yitupule, pe hiyikulonga mpeka. 29#Yowe 3:13. Ngoboni mbuto oho yahokakale, bayitezanga na mpoko ndaba shikati sha kuteza shinakumu.”

Nguli ya mbuto ya mashitandi

(Mateo 13:31-32, 34; Luka 13:18-19)

30Kami Yeshu wambile ngayi, “Wene wa Nyambi tukawufwekesha na bishini? Kati tukaliyavwisha nguli ngani ha kuwu tontolola? 31Wenga ngo lupeka lwa mashitandi, lwalushe ku mbuto nimwayo ya hano hanci yashangiwanga. 32Ngoboni oho yinashangiwi yikukula na kupitakana mbuto nimwayo ya mu mfuba ku wunene, niho yikutamisha myahi yayo, pe tuyoni tukutendelako mahwa.”

33Wabalongeshele lizu na zinguli za mishobo yayingi za kufweka ngo eze, ngayi batweshe ku yuvwishisha. 34Kaliha wambilenga nabo kwakubula kuliyavwisha zinguli, ngoboni oho bekalilenga ninkayabo, watontwelelelenga bandongesha bendi byambo nimwabyo.

Yeshu ukumwenesha nkuli

(Mateo 8:23-27; Luka 8:22-25)

35Mutena uyo mazolo, Yeshu wambile ku bandongesha bendi ngayi, “Tuzabukilenu mu nciza ya liziba.” 36Bashiyile likunge lya bantu, pe bayile na Yeshu mu wato muya ekalile. Kami kwekalile mato amina endelenga hamo nendi.

37Niho kwekalile nkuli yayinene shikuma na mankanyi engininenga mu wato, nohobene wato washingile kwinzala na mema. 38Yeshu wekalile ku ntongo ya kunyima, walanganine mu tulo hinga ahamina ha muhamino. Bamutoneshele, bambile kukwendi ngayi, “Mulongeshi, kati kulifulankana ngayi tuli na kufwa wufwako ndi?”

39Yeshu niho apindukile, wakanishile mpepo ngayi, “Mwena nee!” Kami wambile ku mankanyi ngayi, “Mwena hulutuu!” Mpepo yemanine, niho kwamwenene shikuma.

40Yeshu Wambile ku bandongesha bendi ngayi, “Ndaba ngani mukutina? Kati kukulupila mufwako ndi?”

41Ngoboni batinine shikuma, bambile umo kuwamina ngayi, “Kati ou muntu wanahiti? Ndaba mpepo na mankanyi bikumwombatala!”

Currently Selected:

Mako 4: LLK

Highlight

Copy