Mako 1

Kushimikila kwa Yowano Mukakuzubilisha

(Mateo 3:1-12; Luka 3:1-18; Yowano 1:19-28)

1Kuno niko kutatika kwa ncango zaziwahe za Yeshu Kilishitu, Mwana Nyambi.#1:1 Mwana NyambiMu mabuka amo Mwana Nyambi mowa. 2#Mala 3:1. Nehe atikitile muluwe Ishaya ngayi,

“Nyambi wambile ngayi,

‘Nikatuma ntumwana wami kumbili yobe,

ou ukawahisha nzila yobe.’

3 # Isha 40:3. Lizu lya mukakubilika mu libelelengwa ngayi,

‘Wahishenu mukwakwa wa Mwene,

ololenu zinzila zendi.’ ”

4Nohobene Yowano Mukakuzubilisha waholokele mu libelelengwa, washimikililenga ku bantu ngayi, “Tengulukenu mu mitima, pe muzubilishiwe, ngayi Nyambi amiyatile wubi wenu.” 5Bakalitunga lya Yundeya na bantu ba mu Yelushalema nimwabo bayile kukwendi na kulitabila wubi wabo, pe wabazubilishile mu Mushinzi wa Yondana.

6 # 2Bamy 1:8. Yowano wavwalile bivwalo bya wushako wa kamela na mukunzi wa shitembe mu lukanda, walilenga mikumbi na wushi. 7Washimikilenga ngayi, “Munyima yami mukwiza wamunene wakumpitakana, kami ku fwanina ku shintama na ku shobola mishulo ya makatulo wendi nifwako. 8Nikumizubilisha na mema, ngoboni niye ukamizubilisha na Moyo wa Kuyela.”

Kuzubilishiwa na kwezekiwa kwa Yeshu

(Mateo 3:13; 4:11; Luka 3:21-22; 4:1-13)

9Mu matena ayo, Yeshu wafumine ku Nazaleta mu litunga lya Ngalileya, niho Yowano amuzubilishile mu Mushinzi wa Yondana. 10Wanguwangu oho afumine mu mema, wamonene liyilu linashinkuluku na Moyo wa Kuyela wakufweka ngo litela washulumukile hahendi. 11#Shit 22:2; Nyi 2:7; Isha 42:1; Mat 3:17; 12:18; Mako 9:7; Luka 3:22. Pe lizu lyafumine muyilu lyambile ngayi, “Obe Mwanami nahaka, ukungwahililisha shikuma.”

12Niho wanguwangu Moyo wa Nyambi wamutwalile mu libelelengwa. 13Yeshu wekalile mu libelelengwa matena makumi anaa, muyo Shatana wamwezekele. Wekalile mukati ka tunzama, kami mangeloyi amutendelele milimo.

Yeshu ukwihana bakakushashila banaa

(Mateo 4:12-22; Luka 4:14-15; 5:1-11)

14Yowano oho ayakiwile mu tolongo, Yeshu wayile ku Ngalileya na ku shimikila ncango zaziwahe za Nyambi. 15#Mat 3:2. Wambilenga ngayi, “Shikati shakumakale, Wene wa Nyambi uli hahepi. Tengulukenu ku wubi wenu, pe kulupilenu ncango zaziwahe.”

16Oho Yeshu akulishilenga ku Liziba lya Ngalileya, wamonene Shimoni na mukonzo wendi Anduleu, hibamanyika tunyanzi twabo mu liziba. 17Niho Yeshu abatongwezele ngayi, “Nkonkenu, nikaminga bakakushashila bantu.” 18Hohobene bashiyile tunyanzi twabo, bamukonkele. 19Yeshu wayile kumbili shashishe, wamonene bana ba Zebende babili, Yakoba na mukonzo wendi Yowano, hinga bekala mu wato hibatungulula tunyanzi twabo. 20Wanguwangu oho abamonene wabehanine, bashiyile tatiyabo Zebende na bakamilimo ya ndando hinga bekala mu wato, pe bamukonkele.

Yeshu ukufumisha mayimbwe

(Luka 4:31-37)

21Yeshu na bandongesha bendi bayile ku munzi wa Kapenauma, ha Mutena Wakukatala Yeshu wenginine mu Shinangonge, watatikile ku longesha.#1:21Shinangonge:Lyengile litala lya Bayunda mwakulongeshela na kulemeshela. 22#Mat 7:28-29. Bantu obo bamuyuvwile bakomokele shikuma ku longesha kwendi, ndaba wabalongeshele na ngovu kupitakana bakakulongesha ndayano. 23Wanguwangu mu shinangonge mwezile muntu wa mayimbwe, wabilikizile ngayi, 24“Obe Yeshu waku Nazaleta, ukushinga kututenda bishini? Kati unezi mu kutulobesha ndi? Tukukulimuka ngayi, obe wenga mukakuyela wa Nyambi!”

25Ngoboni Yeshu wakalihilile mayimbwe ngayi, “Mwenenu! Fumenu mumwendi!”

26Mayimbwe anyukwile uyo muntu shikuma, abilikizile na lizu lyalinene, pe afumine mumwendi. 27Bantu nimwabo bakomokele, niho balipwile mukati kabo ngayi, “Kati shumangani eshe? Kulongesha oku kwakupya kwa nahiti? Ndaba ukukalihila mayimbwe na ngovu, pe niwo akumwombatala!”

28Niho mpupo ya Yeshu yatumbalalile na wanguwangu mu litunga nimwalyo lya Ngalileya.

Yeshu ukunyongomanisha bantu babengi

(Mateo 8:14-17; Luka 4:38-41)

29Yeshu watutikile mu shinangonge, wayile hamo na Yakoba na Yowano ku litala lya Shimoni na Anduleu. 30Ngoboni mukowendi Shimoni wa mbeleki walanganine ndaba ya kukola mashikashika. Yeshu oho akumine kuyo bamutongwezele bya kukola kwa mukowendi Shimoni. 31Wayile kukwendi, wamukwatile ku liboko, wamupindwile. Mashikashika amumanine, pe wabatendelele byakulya.

32Mazolo oho mutena walelakale, bantu baletele bakakukola nimwabo na baka mayimbwe kuli Yeshu. 33Bantu nimwabo ba mu munzi bakungulukile ku shipana sha litala liyo. 34Wanyongomanishile babengi bakolelenga malweli a kulishiyashiya, kami watandile mayimbwe amengi. Ngoboni kaliha wetabilile ngayi aya mayimbwe ambe kukwendi ndaba amulimukile.

Yeshu uku shimikila mu Ngalileya

(Luka 4:42-44)

35Oho kwashile lumenemene shikuma, Yeshu wapindukile. Watutikile mu litala, wayile mu kulombela ku mwanya wa ninkayendi. 36Pe Shimoni na baminendi bayile na kumushingashinga. 37Bamuwanine, bambile kukwendi ngayi, “Bantu nimwabo bali na kukushinga.”

38Wambile kukwabo ngayi, “Tuyenunga ku minzi yamina yili hahepi, nikashimikileko kami ndaba niwo mulimo nezilile.”

39 # Mat 4:23; 9:35. Nohobene wayilenga mu Ngalileya nimwamo mu ku shimikila mu mashinangonge na kutanda mayimbwe.

Yeshu ukunyongomanisha mulume wa bimakwa

(Mateo 8:1-4; Luka 5:12-16)

40Muntu wakolelenga bimakwa wezile kuli Yeshu, wafunkamine na kulambilila kukwendi ngayi, “Ndi ukushinga, ukutwesha kunyongomanisha.”

41Yeshu wamuyuvwilile nceshe, wolwele liboko lyendi wamukwatile, pe wamukumbwile ngayi, “Nikushinga, nyongomana!” 42Oho ambile noho, mukabimakwa wanyongomanine. 43Yeshu wamutongwezele ngayi aye, niho amutintikile, 44#Bal 14:1-32. pe wambile kukwendi ngayi, “Hinga ushimikila ebye ku muntu hinge umo. Ngoboni yanga kuli mukankombela akakuzilulule, pe ukatupule ntupu ngo mwayila Ndayano za Moshesha, akakumoneshe ku muntu nimwendi ngayi unanyongomana.”

45Ngoboni uyo muntu wayile, watatikile ku shimikila nimwako na kutumbalalisha shuma eshe. Ndaba ya neshe, Yeshu kaliha watweshele kwingina mu munzi mwana ncanana. Wekalile kwaninkayendi, hinge noho bantu bafumine ku zimbalila nimwazo bamukonkele.

Currently Selected:

Mako 1: LLK

Highlight

Copy