Mateo 28
28
Kushanguka kwa Yeshu
(Mako 16:1-10; Luka 24:1-12; Yowano 20:1-10)
1Munyima ya Mutena Wakukatala, ku lumenemene kwa mutena wa Shunda, Maliya waku Mangandalena na Maliya wamina bayile mu ku mona ku shinzimbi. 2Kwekalile kukanka kwakunene kwa hanci, ndaba lingeloyi lya Mwene lyafumine kuyilu, lyezile mukwandumuna limanya lya ku shinzimbi, pe lyekalileho. 3Shifwekesha shendi shafwekele ngo lumuni, shivwalo shendi shengile sha kutuba ngo wutonge. 4Ndaba ya kutina shikuma bakakulama shinzimbi bakankile, pe bafutukile ngo bafu.
5Lingeloyi lyambile ku bambuyama ngayi, “Hinga mutina, nikulimuka ngayi muli na kushinga Yeshu, ou wakolekiwile. 6Wufwamo muno unashanguku ngonehe ambile. Yekenu kuno mumone omu alanganine. 7Haya nyankupenu mukatongweze bandongesha bendi ngayi, ‘Unashanguku ku bafu nalimeneke kuya ku Ngalileya, kuyo niko mukamuwana.’ Anukenu ebye namitongweze.”
8Niho bambuyama bafumine na wangu ku shinzimbi, batinine, ngoboni bawahililile shikuma, niho betukile kuya na kutongweza bandongesha bendi.
9Wanguwangu Yeshu walihanganine nabo, pe wambile ngayi, “Ku mwena kwikale nenu.” Bezile kukwendi, bamukwatile ku mawulu, bamulemeshele. 10Niho Yeshu ambile kukwabo ngayi, “Hinga mutina, yenunga mukatongweze bawushinda wami ngayi baye ku Ngalileya, kuyo niko eze bakamonene.”
Lushango lwa bakakulama
11Oho bambuyama bayilenga, bakanzita bamo baya balaminenga ku shizimbi bayile ku munzi na kutongweza bakankombela ba bakulwane nimwabyo biya byatendiwile. 12Bakankombela ba bakulwane bakungulukile hamo na kulyambashana na bakulwane ba Bayunda. Bapanikile mali amengi ku bakanzita, 13pe babatongwezele ngayi, “Enu mwambe ngayi, bandongesha bendi beza wushiku na kumuyiba etu oho hinga twalangana mu tulo. 14Ndi Kalela ukayuvwa eshe shambo, tukamutongweza shiwahe, mwanga enu hinga mwikala mu wukalu.”
15Pe bakanzita bashimbile aya mali, batendele nehe babatongwezele. Olu lushango lwatumbalalile mukati ka Bayunda kukuma na ku mutena walelo.
Yeshu ukulimonekesha ku bandongesha bendi
(Mako 16:14-18; Luka 24:36-49; Yowano 20:19-23; Milimo 1:6-8)
16 #
Mat 26:32; Mako 14:28. Niho bandongesha likumi na umo bayile ku Ngalileya ku lipili liyo Yeshu abatongwezele. 17Oho bamumonene, bamulemeshele, ngoboni bamo bekalile na nkani. 18Niho Yeshu ezile hahepi nabo wambile ngayi, “Ngovu nimwazo za muyilu na hanci zinapanikiwi kukwami. 19#Mil 1:8. Nohobene yenunga ku bantu nimwabo mukabenge bandongesha bami. Muka bazubilishe mu lizina lya Tate na lya Mwana na lya Moyo wa Kuyela. 20Pe mubalongeshe kwombatala nimwabyo ebye ninamilaya. Nikekala nenu shikati nimwasho, kutwala ku kukotoka kwa kaye.”
Currently Selected:
Mateo 28: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
