Mateo 25

Nguli ya Bashimbi likumi

1 # Luka 12:35. “Ha shikati shiyo Wene wa muyilu ukufweka ngonehe, kwekalile batunkanga likumi baya bashimbile zilambi zabo, pe bayile na kushimbawila mukakuyeka. 2Ba mutanu bengile ba kukeya, ba mutanu kami bengile bakuyeba. 3Bakuyeba bashimbile zilambi zabo ngoboni kaliha bashimbile mazi amina. 4Ngoboni ba kukeya bashimbile mazi mu zilambi zabo hamo na mimuni yabo. 5Oho mukakuyeka ehalile kwiza, nimwabo ba kunokele, pe balanganine mu tulo.

6“Hakati ka wushiku lukuwa lwayuvwanikile ngayi, ‘Mukakuyeka uno! Yekenu mumushimbawile!’ 7Niho batunkanga nimwabo likumi bapindukile, pe bawahishile zilambi zabo. 8Bakuyeba banyepele ku ba kukeya ngayi, ‘Tupenuko ku mazi wenu, ndaba zilambi zetu wuluno zizime.’ 9Ngoboni ba kukeya bakumbwile ngayi, ‘Byo, awa mazi kutwesha kutukonkana enu nanetu afwako. Ngoboni yenunga ku bakakulandisha, mazi mukalilandile wenu.’ 10Oho bayile na kulanda mazi, mukakuyeka wakumine, niho bashimbi mutanu baya baliwahishile, benginine nendi ku shimbo sha shifupawenga, pe shihala shashinkiwile.

11 # Luka 13:25. “Oho kwapitile kashikati, baya batunkanga bamina bezile niho bambile ngayi, ‘Obe hekulu, obe hekulu, tushinkwilileko.’ 12Ngoboni niye waba kumbwile ngayi, ‘Mwa shikuma nikwamba kukwenu ngayi, kumi limuka nifwako.’ ”

13Yeshu wamanishile ngayi, “Haya keyenu, ndaba kulimuka mutena hinge shikati mufwako.

Nguli ya bakamilimo bahatu

(Luka 19:11-27)

14 # Luka 19:11-27. “Kami Wene wa muyilu ukufweka ngonehe, kwekalile muntu wayile ku litunga lya kwakutali, wehanine bakamilimo bendi, wabashiyilile wuheti wendi ngayi bawulame. 15Wapanikile ku muntu na muntu ngonehe ngovu zendi. Ku muntu umo wamupanikile makulukazi mutanu a muwayawaya wa shiliva, kuwamina wapanikile makulukazi abili na kuwamina wapanikile likulukazi limo, pe wayile mukala wendi. 16Ou washimbile makulukazi mutanu wayile na kuwaheheza, wahehezeleho kami makulukazi mutanu. 17Ou washimbile makulukazi abili, wawaninineho kami makulukazi abili. 18Ngoboni ou washimbile likulukazi limo, wayile na kukaba hanci, pe waholekele mali a hekulyendi.

19“Oho kwapitile shikati shashitali, hekulya baya bakamilimo wabokele, pe walabile nabo mali hamo. 20Ou washimbile makulukazi mutanu a muwayawaya wa shiliva wezile, waletele kukwendi makulukazi kami mutanu, pe wambile ngayi, ‘Hekulu, nka wampanine makulukazi mutanu a muwayawaya, mona nawaniniho kami mutanu.’ 21Hekulyendi wambile kukwendi ngayi, ‘Unatende shiwahe, mukamulimo wamuwahe, wakukulupiliwa. Unengi wakulunga ha byabishe, nikakwinga mukakulama byuma byabingi. Yeka uwahilile hamo na hekulyobe.’

22“Ou washimbile makulukazi abili a muwayawaya wezile, wambile ngayi, ‘Hekulu, nka wampanine makulukazi abili, mona, ninawaniniho kami abili.’ 23Hekulyendi wambile kukwendi ngayi, ‘Unatende shiwahe, mukamulimo wamuwahe, wakukulupiliwa. Unengi wakulunga ha byabishe, nikakwinga mukakulama byuma byabingi. Yeka uwahilile hamo na hekulyobe.’ 24Ou kami washimbile likulukazi limo lya muwayawaya wezile, wambile ngayi, ‘Hekulu na kulimuka ngayi uli muntu wamukalu, watezanga omu unabulu ku shanga, kami wakungululanga omu unabula kukuba. 25Nohobene natinine nayile na kuholeka likulukazi lyobe lya mali mu limvu, mona, mali wobe wano.’ 26Niho hekulyendi akumbwile ngayi, ‘Obe mukamulimo wamubi wawuvwa, kati walimukile ngayi natezanga omu nabulu ku shanga na kukungulula omu nabulu kukuba? 27Shinga wakowezeshele mali wami mupanga aha naboko shinga natambulu mali wami hamo na nkambiko. 28Nohobene muyangenu likulukazi lya mali muwapanike kuli ou uli na makulukazi likumi lya mali. 29#Mat 13:12; Mako 4:25; Luka 8:18. Ndaba muntu ou uli na byuma, ukapanikiwa byabingi, ngayi ekale na byabingi shikuma, ngoboni wakubula byuma ukayangiwa nebye alinabyo. 30#Mat 8:12; 22:13; Luka 13:28. Ou mukamulimo wamubi, muyumbilenu ku mincimpwe yaha munkanda, kuya akalila na kulikekenya ku mayewe.’

Kuyata kwa mamaninino

31 # Mat 16:27; 19:28. “Oho Mwana muntu akeza mu wuwahe wendi, hamo na mangeloyi nimwawo, pe ukekala ha litanda lyendi lya wene. 32Matunga nimwawo akakunguluka kumbili yendi, pe ukabatapulula umo kuwamina ngonehe mulishani ukutapulula bambelele ku bampongo. 33Ukayaka bambelele ku liboko lyendi lya shilyo, ngoboni bampongo ukabayaka ku lya shimoho. 34Niho Mwene akamba ku baya bali ku liboko lyendi lya shilyo ngayi, ‘Yekenu enu muli na mfuywezi za Tate, mukone wene owe amiwahishilile kufuma kukulenga kwa kaye. 35Ndaba nekalile na nzala, kami mwampanine mema, nekalile muyeni, mwantambwile, 36nekalile na wuvwu, kami mwamvwikile, nakolele kami mwezile na ku mona, nekalile mu tolongo kami mwanzingwile.’

37“Pe bakulunga bakamukumbula ngayi, ‘Mwene, twakumonene mwaka ngani hinga wekala na nzala, niho twakupanine byakulya? Hinge wekalile na linyontwa, niho twakupanine mema? 38Twakumonene mwaka ngani hinga wenga muyeni, niho twakutambwile? Hinge wekalile na wuvwu, niho twakuvwikile? 39Twakumonene mwaka ngani ukola, hinge mu tolongo, niho twezile kukwobe?’ 40Pe Mwene ukakumbula ngayi, ‘Mwa shikuma nikumitongweza ngayi, eshe mwatendele ku umo wa naba babashe wa bakonzobami, mwashitendele kukwami.’

41“Niho akamba ku baya bali ku liboko lya shimoho ngayi, ‘Fumenu kukwami enu bakamukuto! Pe yenunga ku mundilo wa mwaya myaka ou wawahishiwilile Shatana na mangeloyi bendi. 42Ndaba nekalile na nzala, kaliha mwampanine byakulya, nekalile na linyontwa, kaliha mwampanine mema, 43nengile muyeni, kaliha mwantambwile, nekalile na wuvwu, kaliha mwamvwalikile nakolele, nekalile mu tolongo, ngoboni kaliha mwayile na ku mona.’

44“Pe bakakumbula ngayi, ‘Mwene, twakumonene mwaka ngani hinga wekala na nzala, hinge na linyontwa, hinge kwinga muyeni, hinge na wuvwu, hinge hiwukola, hinge mu tolongo, niho twabulile ku kuyavwa?’ 45Pe ukakumbula ngayi, ‘Mwa shikuma nikumitongweza ngayi, oho mwabulile kubitenda ku umo wa naba babashe, mwabulile kubitenda kukwami.’ 46#Ndan 12:2. Pe bakaya kukashushwilo ka mwaya myaka, ngoboni bakulunga bakaya ku wumi wa mwaya myaka.”

Currently Selected:

Mateo 25: LLK

Highlight

Copy