Mateo 23

Yeshu ukunyanca bakakulongesha ndayano na Bafwalishi

(Mako 12:38-39; Luka 11:43-46; 20:45-46)

1Niho Yeshu ambile ku makunge a bantu na ku bandongesha bendi ngayi, 2“Baka ku longesha ndayano na Bafwalishi bekalanga mu shipona sha Moshesha. 3Nohobene lamenu na kutenda nimwabyo ebye ba kumitongweza, ngoboni hinga muhembwiliza ebye batendanga, ndaba kutenda biya ba ku shimikila bafwako. 4Bakumanga miziho yayilemu, yayikalu kuyikatula, pe ba kuyitwika ha bifuzi bya bantu, ngoboni nibo bamwine kutwesha kuyikatula hinge na munwe umo bafwako. 5#Mat 6:1; Kul 15:38; Nday 6:8. Nimwabyo ebye batendanga babitendanga ngayi babamone. Bakunenehesha matapa anatikitiwi mazu a Nyambi ha zimpala zabo na kutalihisha minganja ku bivwalo byabo. 6Baku haka myanya ya maleema ku bimbo na kwikala mu bipona bya maleema mu mashinangonge. 7Baku haka ku shangwishiwa na maleema ku myanya ya kulandishila na kutoyiwa ku bantu ngayi, ‘Balongeshi.’ 8Ngoboni enu bantu hinga bamitoya ngayi, ‘Balongeshi,’ ndaba muli na mulongeshi umo pele kami enu nimwenu munengi wushinda umo. 9Kami hinga mutoya muntu hano hanci ngayi, ‘Tate,’ ndaba muli na Tatiyenu umo pele ou uli muyilu. 10Kami hinga mutoyiwa ngayi, ‘Hekulu,’ ndaba muli na Hekulyenu umo tuhu niye Kilishitu. 11#Mat 20:26-27; Mako 9:35; 10:43-44; Luka 22:26. Wamunene hakati kenu enge mukamulimo wenu. 12#Luka 14:11; 18:14. Muntu nimwendi ukulinenehesha, bakamushepesha, kami muntu ukulishepesha, ukaneneheshiwa.

Yeshu ukuyata shishweka sha bakakulongesha ndayano na Bafwalishi

(Mako 12:40; Luka 11:39-42, 44, 52; 20:47)

13“Makando wenu, bakakulongesha ndayano na Bafwalishi, enu bakashishweka! Ndaba mu kushinkila Wene wa muyilu ngayi bantu hinga bayinginamo enu kwinginamo mufwako, hinge kwitabilisha baya bakushinga kwingina ngayi bengine mufwako. 14Makando wenu, bakakulongesha ndayano na Bafwalishi, enu bakashishweka! Ndaba mu kuyibila bakazi ba bamfwile byuma byabo, kami mu kulyongezanga mu kulombela malombelo amatali, nohobene mukashushuliwa shikuma.

15“Makando wenu, bakakulongesha ndayano na Bafwalishi, enu bakashishweka! Mukwenda mikala yayingi mu mawate na mu matunga ngayi muwane muntu umo ukukonka ku longesha kwenu, oho mwamuwanakale mu kumufutula kwinga mwana ngehena kabili ngonehe enu.

16“Makando wenu, bakakutwaminina batushishitwa! Mu ku longesha ngayi, ‘Nimwendi ukubeza na Litala lya Nyambi kumangiwa na mbeza zendi wufwako, ngoboni nimwendi ou ukubeza na ngolinde yaku Litala lya Nyambi, unamangiwi na mbeza zendi!’ 17Enu bibulangana bya tushishitwa! Kati shikupitakana shamina shiti? Ngolinde ndi Litala lya Nyambi likuyelesha ngolinde? 18Kami mu ku longesha ngayi, ‘Nimwendi ukubeza na kaala, kumangiwa na mbeza zendi wufwako, ngoboni nimwendi ukubeza na ntupu ili ha kaala unamangiwi na mbeza zendi.’ 19Enu batushishitwa! Kati shikupitakana shamina shashinene shiti? Ntupu, ndi kaala kakuyelesha ntupu? 20Nohobene nimwendi ou ukubeza na kaala, ukulibeza na ntupu iliho nimwayo. 21Kami ou ukubeza na Litala lya Nyambi, ukulibeza nalyo na uya wekalangamo. 22#Isha 66:1; Mat 5:34. Kami ou ukubeza na liyilu, ukulibeza na litanda lya Nyambi na nou wekalangaho.

23 # Bal 27:30. “Makando wenu, bakakulongesha ndayano na Bafwalishi, enu bakashishweka! Ndaba mu kutupula shimo sha wulikumi sha mashiha a minta na Nyanyishi na a kumini, ngoboni munakana kwombatala ku longesha byabinene bya ndayano, nehe kulunga na nceshe na kukulupiliwa. Ebye nibyo mwafwanini kutenda na kubula kukanaho byamina. 24Enu bakakutwaminina batushishitwa! Mukufumisha mbalembale munebye mu kunwa, ngoboni mu kumina kamela.

25“Makando wenu, bakakulongesha ndayano na Bafwalishi, enu bakashishweka! Ndaba mu kuyowesha nkomoki na lulonga ha munkanda, ngoboni mukati binenzala na byuma munawana mu wizi na mutongo. 26Obe Kafwalishi wa kashishitwa! Yowesha taha nkomoki na lulonga mukati, pe na ha munkanda ha kuyela.

27 # Mil 23:3. “Makando wenu, bakakulongesha ndayano na Bafwalishi, enu bakashishweka! Ndaba mu kufweka ngo binzimbi bya kutuba, ebye biku moneka wuwahe ha munkanda, ngoboni mukati binenzala na bifupa bya bafu na bya ku bola nimwabyo. 28Nohobene kami mwamonekanga ku bantu ngo muli bakwoloka ha munkanda, ngoboni mukati munenzala na shishweka na wubi.

Yeshu ukulubulula kashushwilo ka bakakulongesha ndayano na Bafwalishi

(Luka 11:47-51)

29“Makando wenu, bakakulongesha ndayano na Bafwalishi, enu bakashishweka! Ndaba mukutenda binzimbi bya bamiluwe na kuwahisha binzimbi bya babawahe, 30kami mukwamba ngayi, ‘Shinga twekalileko ku matena a bankakazetu, shinga kaliha twalifungilile nabo na kuyita mukeza wa bamiluwe. 31Nohobene nisho mukwitabila enu bamwine ngayi muli bana babaya bazihile bamiluwe. 32Haya yinzalishililenu shipimisho sha wumi wa bankakazenu. 33#Mat 3:7; 12:34; Luka 3:7. Enu mayoka! Enu bana ba bampili! Mukapanza nahiti kukunonga kwa ngehena? 34Nohobene, nikatuma kukwenu bamiluwe na bantu bangana na balongeshi. Bamo kukwabo muka baziha, bamina muka bakoleka, pe bamina muka bakama mu mashinangonge enu na kubatanda mu munzi na munzi. 35#Shit 4:8; 2Bya 24:20-21. Ngayi mukeza nimwawo waba kakwoloka uya wetikilile hanci, bakawushingila hahenu, ku balika na mukeza wa Abele mukakwoloka kuleta ku mukeza wa Zakaliya mwana Mbalakiya, ou mwazihile mukati ka Litala lya Nyambi na kaala. 36Mwa shikuma nikumitongweza ngayi, byuma nimwabyo ebye bikeza ha shihemunwino eshe!

Yeshu ukulilila Yelushalema

(Luka 13:34-35)

37“Obe Yelushalema, Yelushalema! Obe mukakuziha bamiluwe na kupuha mamanya aba banatumiwi kukwobe! Bikati binga nashingile kukungula bana bobe nehe nkazikuku akungulanga bana bendi ku nceto ya mbando zendi, ngoboni kaliha wetabilile. 38#Yel 22:5. Haya mona, Litala lyobe lya Nyambi likashiyiwa, pe likenga lipembe. 39#Nyi 118:26. Nohobene nikukutongweza ngayi, kukamona ami wufwako, hantu haya ukamba ngayi, ‘Uli na mfuywezi ou ukwiza mu lizina lya Mwene.’ ”

Currently Selected:

Mateo 23: LLK

Highlight

Copy