Mateo 21

Yeshu ukwingina mu Yelushalema

(Mako 11:1-11; Luka 19:28-40; Yowano 12:12-19)

1Oho bahenyenene kwakwipi na Yelushalema, bezile ku Mbetefwange ku lipili lya mitondo ya Olive, niho Yeshu atumine bandongesha bendi babili 2wabatongwezele ngayi, “Yenunga ku munzi uyo uli kumbili yenu, pe wanguwangu mukawanako mbongolo hinga amangiwa na mwanendi. Mukabamangulule, pe baletenu kuno kukwami. 3Ndi muntu ukumipula shuma shimo, pe mwambe ngayi, ‘Mwene uli na ku bashinga,’ pe ukabatuma wanguwangu.”

4Ebye byatendiwile ngayi kutendiwe eshe ambile muluwe wa Nyambi ngayi,

5 # Zaka 9:9. “Tongwezenu mwana Ziyoni wa mbuyama ngayi,

Mona! Mwene yobe ukwiza kukwobe!

Na kubomba hinga akandama ha mbongolo,

ha kana ka mbongolo.”

6Niho bandongesha bendi bayile, bakatendele nehi abafundizizile. 7Baletele mbongolo na mwanendi, bayalile bivwalo byabo hahabo, niho Yeshu akandamineho. 8Likunge lya bantu bayalile bivwalo byabo mu mukwakwa, bamina bapokwele myahi ya bitondo, bayalile mu mukwakwa. 9#Nyi 118:25, 26. Kami makunge a bantu baya bendelenga kumbili ya Yeshu na baya bendelenga kunyima yendi, babilikizile ngayi, “Hoshana kuli Mwana Ndavita! Uli na mfuywezi ou ukwiza mu lizina lya Mwene! Hoshana muyilu ya mayilu.”

10Oho Yeshu enginine mu Yelushalema, munzi nimwawo bekalile mu nculyanculya, pe bepwile ngayi, “Kati yani ou?” 11Makunge a bantu bambile ngayi, “Ou niye Yeshu muluwe waku Nazaleta mu Ngalileya.”

Yeshu ukutanda bakakulandishila mu Litala lya Nyambi

(Mako 11:15-19; Luka 19:45-48; Yowano 2:13-22)

12Yeshu wenginine mu Litala lya Nyambi, watandilile ha munkanda nimwabo baya balandishilenga na baya bakalandilenga mu Litala lya Nyambi. Wawishile zitebulu za bakakucinca mali na bipona bya bakakulandisha bankilimba. 13#Isha 56:7; Yel 7:11. Wambile ngayi, “Kwatikitiwa ngayi, ‘Litala lyami likatumbiwa ngayi litala lya malombelo.’ Ngoboni munalifutulu kwinga liteke lya bezi.”

14Tushishitwa na ba kupenga mawulu bezile kukwendi mu Litala lya Nyambi, pe wabanyongomanishile. 15Ngoboni bakankombela ba bakulwane na bakakulongesha ndayano oho bamonene byuma byabiwahe ebye atendele na kuyuvwa batwanuke hibabilikiza mu Litala lya Nyambi ngayi, “Hoshana kuli Mwana Ndavita!” Bapilamine shikuma.

16 # Nyi 8:2. Bepwile Yeshu ngayi, “Wakuyuvwa ebye bakwamba aba batwanuke ndi?”

Yeshu wakumbwile kukwabo ngayi, “Ee. Kati hinga mwatanga kulaba mazu akwamba ngayi, ‘Mu tunwa twa batwanuke na bambututu mu kufuma kuyemeza kwakuwahe?’ ”

17Niho Yeshu abashiyile wayile, wafumine mu munzi, pe wayile ku Mbetani, wakalanganineko.

Yeshu ukukuta mutondo wa mukuyu

(Mako 11:12-14, 20-24)

18Ku lumenemene shikuma, Yeshu oho abokelenga ku Yelushalema, wekalile na nzala. 19Wamonene mutondo wa mukuyu kunkumo ya nzila, pe wayileko, ngoboni kaliha wawanineko mikabo ndele mabizi tuhu. Niho ambile ku mutondo uyo ngayi, “Obe mutondo hinga ukayima mikabo kami.” Wanguwangu mutondo walebukile.

20Oho bandongesha bendi bamonene noho, bakomokele, pe bambile ngayi, “Ou mutondo wa mukuyu unalebuku nahiti na wanguwangu?”

21 # Mat 17:20; 1Koli 13:2. Pe Yeshu waba kumbwile ngayi, “Mwa shikuma nikumitongweza ngayi, ndi muli na kukulupila kwakubula nkani, kukatenda tuhu shuma eshe shinatendiwi ku mutondo wa mukuyu mufwako, ngoboni mukatwesha kwamba ku lipili elye ngayi, ‘Katuka uliyumbile mu liwate,’ pe shikatendiwa. 22Ndi mu kukulupila, mukatambula eshe nimwasho mukanyepa mu malombelo.”

Liyipu lya ha ngovu za Yeshu

(Mako 11:27-33; Luka 20:1-8)

23Yeshu wenginine mu shipango sha Litala lya Nyambi, bakankombela ba bakulwane na bakulwane ba Bayunda, bezile kukwendi oho alongeshelenga. Pe bepwile ngayi, “Kati ukutenda byuma ebye na ngovu ngani? Kami yani wakupanine eze ngovu?”

24Yeshu wakumbwile ngayi, “Nami nikumipula liyipu limo, ndi mu kunkumbula, pe nikumitongweza eze ngovu nikutenda nazo byuma ebye. 25Kati kuzubilisha kwa Yowano kwafumine kuti? Kwafumine muyilu, ndi kwafumine ku bantu?”

Balikananganine mukati kabo ngayi, “Ndi tukwamba ngayi, ‘Kwafumine muyilu,’ pe niye ukatwipula ngayi, ‘Ndaba ngani mwabulile kumukulupila?’ 26Ngoboni ndi tukwamba ngayi, ‘Kwafumine ku bantu,’ tukutina bantu, ndaba nimwabo ba kulimuka ngayi mwa shikuma Yowano wengile muluwe.” 27Bakumbwile Yeshu ngayi, “Kulimuka tufwako.”

Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”

Nguli ya bana babili babalume

28“Mukuhanganika nahiti? Muntu wamina wekalile na bana bendi babalume babili. Watongwezele mwanendi wa mukulwane ngayi, ‘Mwanami, yanga utende milimo mu mfuba yami ya mikabo ya shinyanca lelo.’ 29Niye wakumbwile ngayi, ‘Nakana,’ ngoboni munyima watengulukile, pe wayile. 30Watongwezele kami mwanendi wa wubili nahiyo. Niye wakumbwile ngayi, ‘Nikuya, tate,’ ngoboni kaliha wayile. 31Kati kukwabo aba babili, ou watendele shamutima wa tatiyendi yani?”

Bakumbwile ngayi, “Wa mukulwane.” Yeshu wambile kukwabo ngayi, “Mwa shikuma nikumitongweza ngayi bakakutelesha na bakalwiholwiho bakalimeneka kwingina mu Wene wa Nyambi na kumishiya. 32#Luka 3:12; 7:29-30. Ndaba Yowano wezile kukwenu na kumimonesha nzila ya kulunga, ngoboni kaliha mwamukulupilile. Ngoboni bakakutelesha na bakalwiholwiho bamukulupilile. Hinge oho mwamonene eshe, kaliha mwatengulukile na kumukulupila.

Nguli ya bandimi mu mfuba ya shinyanca

(Mako 12:1-12; Luka 20:9-19)

33 # Isha 5:1-2. “Yuvwenu nguli yamina, kwekalile mwine litala wamina wakunine mfuba ya shinyanca, wazingwilishileko limota, wakabile liteke lya kuzongela shinyanca, pe watendeleko katambo kakubingila, niho ayakilemo bandimi, pe wayile ku litunga lya kwakutali. 34Oho shikati sha kubuya mikabo sha kumine, watumineko bakamilimo bendi ku bandimi ngayi bakashimbeko mikabo. 35Niho bandimi bakwatile bakamilimo bendi bakamine umo, wamina bamuzihile, pe wamina bamupuhile mamanya. 36Niho kami atumine bakamilimo bendi babengi kupitakana bakutatika, ngoboni batendele kukwabo ngonehe batendele bakutatika. 37Ku mamaninino watumine mwanendi kukwabo, wahanganikile ngayi, ‘Bakamupana maleema.’ 38Ngoboni oho bandimi bamonene mwanendi, balyambashanine ngayi, ‘Ou niye ncwana yendi, yekenu tumuzihe mwanga tukashwane likona lyendi.’ 39Niho bamukwatile, pe bamuyumbilile ha munkanda wa mfuba, bamuzihile.”

40Yeshu wabepwile ngayi, “Nohobene oho mwine mfuba akeza, ukatenda nahiti ku bandimi bayo?”

41Bamukumbwile ngayi, “Ukaziha baya bandimi bababi, niho ukapanika iya mfuba ya mikabo ya shinyanca ku bandimi bamina, bayo bakamupana mikabo yendi ha shikati sha kuhoka mikabo.”

42 # Nyi 118:22-23. Yeshu wambile kukwabo ngayi, “Kati shilolo mulabe ebye byatikitiwa ngayi,

‘Limanya liya bakanine bakakutenda matala,

nilyo linafutuku kwinga limanya lya ku shuma lya mu mbango,

eshe nisho anatende Mwene,

kami shikukomokesha mu meho wetu.’ ”

43Yeshu wabatongwezele ngayi, “Wene wa Nyambi, ukayangiwa kukwenu na kupanikiwa ku bantu baya ba kuyima mikabo yayiwahe. 44Nimwendi ukawila ha limanya elye ukapokoka, ngoboni ou likawila likamuncancola.”

45Oho bakankombela ba bakulwane na Bafwalishi bayuvwile zinguli za Yeshu, balimukile ngayi nibo akutoya, 46pe bashingile kukwata Yeshu, ngoboni batinine likunge lya bantu, ndaba balimukile ngayi wengile muluwe.

Currently Selected:

Mateo 21: LLK

Highlight

Copy