Mateo 13

Nguli ya mukakukuba

(Mako 4:1-9; Luka 8:4-8)

1Mutena uyo bene Yeshu watutikile mu litala, wayile mukwikala ha shibumbo sha liziba. 2#Luka 5:1-3. Ndaba likunge lya bantu lya kungulukilile kukwendi lyengile lyalinene, niho Yeshu enginine mu wato, pe wekalilemo, bantu nimwabo hinga bemana ha shibumbo.

3Wabatongwezele byuma byabingi na zinguli, pe wambile ngayi, “Mukakukuba wayile na kukuba. 4Pe oho akubilenga, mbuto yamina yawililile mu nzila, tuyoni twezile na kuyilya. 5Mbuto yamina yawililile ha mamanya ha kubula limvu lyalingi. Yamenene wanguwangu, ndaba kaliha hekalile limvu lyalingi. 6Pe oho mutena watatumukile, yalebukile, ndaba mipishi yabulile kwingina shikuma, pe mbuto yayumine. 7Yamina yawililile mukati ka mihongela, oho mihongela yakulile yayitintishile. 8Ngoboni mbuto yamina yawililile mu limvu lya wilo, pe yayimine mpeka, yamina yayimine mwanda, yamina yayimine makumi mutanu na limo na yamina yayimine makumi ahatu. 9Ou uli na matu akuyuvwa, ayuvwe!”

Bihanganiko byekala mu zinguli

(Mako 4:10-12; Luka 8:9-10)

10Niho bandongesha bezile kuli Yeshu, pe bamwipwile ngayi, “Kati shumangani wambanga na bantu mu zinguli?”

11Yeshu waba kumbwile ngayi, “Ndaba ngayi kukwenu kunapanikiwi kulimuka ncimpi za Wene wa muyilu, ngoboni nibo kupanikiwa bafwako. 12#Mat 25:29; Mako 4:25; Luka 8:18; 19:26. Ndaba muntu ou uli na byuma ukapanikiwa byabingi, ngayi akekale na byabingi shikuma. Ngoboni wakubula shuma ukayangiwa nebye alinabyo. 13Nisho shuma nikwambila kukwabo mu zinguli, ndaba ku mona hibamona, ngoboni kumoneshesha bafwako. Hinge ndi ba kuyuvwilila, ngoboni kuyuvwa hinge ku yuvwishisha bafwako. 14#Isha 6:9-10. Kukwabo kwatendiwile ebye ambile muluwe wa Nyambi Ishaya ngayi,

‘Kuyuvwa mukayuvwa, ngoboni

kukayuvwishisha mufwako,

ku mona mukamona,

ngoboni kukamoneshesha mufwako.

15Ndaba mitima ya bantu aba yayikalu,

bakuzika matu abo, kami banazimanana.

Kutina bamona na meho wabo,

na kuyuvwa na matu wabo,

na ku yuvwishisha mu mitima yabo,

na kutengulukila kukwami

ngayi ni ba nyongomanishe.’

16 # Luka 10:23-24. “Ngoboni meho wenu ali na mfuywezi ndaba aku mona na matu wenu ndaba akuyuvwa. 17Mwa shikuma nikumitongweza ngayi bamiluwe babengi na bakakwoloka babengi bashingile ku mona ebye mu ku mona ngoboni kaliha babimonene, kami bashingile kuyuvwa ebye mu kuyuvwa ngoboni kaliha babiyuvwile.

Yeshu ukutontolola nguli ya mukakukuba

(Mako 4:13-20; Luka 8:11-15)

18“Nohobene yuvwililenu kutontoloka kwa nguli ya mukakukuba. 19Muntu nimwendi ukuyuvwa byambo bya Wene ngoboni ukubula ku yuvwishisha, pe mukawubi ukeza kukwendi na kumuyangula eshe shinakubiwi mu mutima wendi. Unafweke ngonehe mbuto yawililile mu nzila. 20Mbuto yawililile ha mamanya, yikutontolola muntu ukuyuvwa lizu, wanguwangu ukulitambula na ku wahilila. 21Ngoboni mipishi ufwayo mumwendi, pe ukwikala tuhu kashikati, oho makalikiza na makando akeza ndaba ya lizu, wanguwangu ukushiya kukulupila kwendi. 22Mbuto yawililile mukati ka mihongela yikutontolola muntu ukuyuvwa lizu, ngoboni kulifulankana bya wumi na bifungo bya kwongeza kwa wuheti, pe bikutintisha lizu, ngayi libule kuyima mikabo. 23Ngoboni mbuto yawililile ha limvu lya wilo yikutontolola muntu ou ukuyuvwa lizu na kuliyuvwishisha, pe ukuyima mikabo, umo ukuyima mwanda, wamina makumi mutanu na limo na wamina makumi ahatu.”

Nguli ya nyawe

24Yeshu wabatongwezele nguli yamina ngayi, “Wene wa muyilu wenga ngonehe muntu wakubile mbuto yayiwahe mu mfuba yendi. 25Ngoboni oho bantu balanganine, mukankole wendi wezile, pe wakubile nyawe mukati ka loto, niho ayile. 26Oho loto lwamenene na kutatika mavumo, nohobene na nyawe kami yamonekele. 27Bakamilimo bamwine mfuba bezile kukwendi bambile ngayi, ‘Hekulu, kati kaliha wakubile mbuto yayiwahe mu mfuba yobe ndi? Haya nyawe yinafumu kuti?’ 28Waba kumbwile ngayi, ‘Mukankole niye unatende.’ Bakamilimo bendi bamwipwile ngayi, ‘Haya ukushinga ngayi tuye na kuyivukula ndi?’ 29Hekulu wakumbwile ngayi, ‘Byo, kutina oho mukavukula nyawe kampe mukavukwila kumo na loto. 30Bilehenu nimwabyo bikulile hamo hantu ha shikati sha kuteza. Pe ha shikati sha kuteza nikatongweza bakakuteza ngayi vukulenu taha nyawe muyimange bikuta ngayi yihokeshiwe, ngoboni kungulenu loto muyiyake mu bishete byami.’ ”

Nguli ya mbuto ya mashitandi

(Mako 4:30-32; Luka 13:18-19)

31Yeshu wabatongwezele nguli yamina ngayi, “Wene wa muyilu ukufweka ngonehe lupeka lwa mbuto ya mashitandi, luya ashimbile muntu na kulukuna mu mfuba yendi. 32Lwenga lwalushe ku mbuto nimwayo ya hano hanci yashangiwanga, ngoboni oho yinashangiwi yikukula na kupitakana mbuto nimwayo ya mfuba ku wunene, pe tuyoni tukutendelako mahwa ku myahi yawo.”

Nguli ya mumena

(Luka 13:20-21)

33Yeshu wabatongwezele kami nguli yamina wambile ngayi, “Wene wa muyilu ukufweka ngonehe mumena uya ashimbile mbuyama na kuvuba na muhunga wawingi wa loto kutwala noho watundulukile nimwawo.”

Shaleteshele Yeshu kwamba mu zinguli

(Mako 4:33-34)

34Yeshu wambile byuma ebye ku likunge lya bantu mu zinguli, kaliha wambile shuma shamina kukwabo kwakubula kuliyavwisha zinguli. 35#Nyi 78:2. Watendele ebye ngayi kutendiwe ebye ambile muluwe ngayi,

“Nikayahamisha kanwa kami mu zinguli,

nikashimikila byambo ebye byaholekiwile

kufuma kukulengiwa kwa kaye.”

Yeshu ukutontolola nguli ya nyawe

36Niho Yeshu ashiyile likunge lya bantu, Pe wenginine mu litala. Bandongesha bendi bezile kukwendi, pe bambile ngayi, “Tutontwelele nguli ya nyawe na mfuba.”

37Waba kumbwile ngayi, “Mukakukuba mbuto yayiwahe nengi Mwana Muntu. 38Mfuba niyo kaye, pe mbuto yayiwahe yinengi bana ba Wene. Ngoboni nyawe niyo bana ba mukawubi, 39pe mukankole uya wayikubile nengi Shatana. Kuteza nikwo kukotoka kwa kaye, bakakuteza nibo mangeloyi. 40Nohobene nehi bavukulanga nyawe na kuyihokesha mu mundilo, kukenga nahiyo ku kukotoka kwa kaye. 41Mwana Muntu ukatuma mangeloyi endi kwiza na kufumisha nimwabo bakakupukalisha na bakakutenda byabibi mu Wene wendi. 42Pe ukabayumbila mu lilungwila lya mundilo, kuyo kukekala kulila na kulikekenya ku mayewe. 43Niho bakakwoloka bakabyazima ngonehe mutena mu Wene wa Tatiyabo. Ou uli na matu akuyuvwa, ayuvwe!

Nguli ya wuheti wakuholekiwa

44“Kami Wene wa muyilu ukufweka ngonehe wuheti waholekiwile mu mfuba. Oho muntu awuwanine naniye wawuholekele, pe mu ku wahilila kwendi wayile na kulandisha byendi nimwabyo, niho alandile iyo mfuba.

Nguli ya mapela

45“Kami, Wene wa muyilu ukufweka ngonehe mukakulandisha washingilenga mapela amawahe. 46Oho awanine lipela limo lya ndando yayinene, wayile na kulandisha byendi nimwabyo, niho alilandile.

Nguli ya kanyanzi

47“Kami, Wene wa muyilu ukufweka ngonehe kanyanzi kamanyikiwile mu liziba, pe kakwatile zinci za kulishiyashiya. 48Oho kanyanzi kenzalile, bakakushashila bakakokelele ku shibumbo. Niho bekalile hanci, bahatile zinci zaziwahe, pe baziyakile mu bibondo, ngoboni zazibi baziyumbile. 49Kukenga nahiyo ku kukotoka kwa kaye, mangeloyi akaya na kutapulula bababi ku babawahe. 50Pe bakayumbila bababi mu lilungwila lya mundilo, kuyo kukekala kulila na kulikekenya ku mayewe.”

Wuheti wawupya na wa mwaka

51Yeshu wabepwile ngayi, “Munayuvwishishi ebye nimwabyo ndi?”

Bakumbwile ngayi, “Ingoi.”

52Yeshu wambile kukwabo ngayi, “Nohobene mukaku longesha ndayano nimwendi ou ukulongolola wuheti wawupya na wuheti wa mwaka mu mfuma yendi.”

Yeshu ukukaniwa mu Nazaleta

(Mako 6:1-6; Luka 4:16-30)

53Oho Yeshu amanishile kubatongweza eze zinguli nimwazo, wabokele ku munzi wendi. 54Niho atatikile ku longesha bantu mu shinangonge, pe bakomokele, bepwile ngayi, “Kati muntu ou unawana kuti ngana na ngovu zanehe? 55Kati kaliha niye mwana mbazi ndi? Kati mandiyendi kaliha Maliya ndi? Kati Yakoba na Yoshefwa na Shimoni na Yundashi kaliha nibo bakonzobendi ndi? 56Kati bampanzendi kaliha nibo aba tuli nabo muno ndi? Haya ebye nimwabyo unabiwana kuti?” 57#Yowa 4:44. Niho bamukanine. Yeshu wambile kukwabo ngayi, “Muluwe kutwesha kuwana maleema mu litunga lyendi na mu litala lyendi wufwako ndele kwashenge.” 58Kaliha watendele bikomokesho byabingi kuyo ndaba ya kubula kukulupila kwabo.

Currently Selected:

Mateo 13: LLK

Highlight

Copy