Mateo 10

Bantumwana likumi na babili

(Mako 3:13-19; Luka 6:12-16)

1Yeshu wehanine bandongesha bendi likumi na babili, wabapanine ngovu za kutanda mayimbwe na kunyongomanisha malweli nimwawo na kukola nimwako.

2Awa niwo mazina a bantumwana likumi na babili. Wa kutatika Shimoni (ukutumbiwa Pita) na Anduleu mukonzo wendi na Yakoba na mukonzo wendi Yowano bana ba Zebende. 3Fwilipu na Mbatolomewu, Tomashi na Mateo mukakutelesha, Yakoba mwana Alufweya na Tandeya, 4Shimoni waku Kenaani na Yundashi Ishikalyote ou wabebele Yeshu.

Yeshu ukutuma balikumi na babili

(Mako 6:7-13; Luka 9:1-6)

5Oho Yeshu atumine aba balume likumi na babili, wabatongwezele ngayi, “Hinga muya ku Bakamatunga, hinge kwingina mu minzi ya Bakashamaliya. 6Ngoboni yenunga ku bambelele ba kuyongala ba litala lya Ishalela. 7#Luka 10:4-12. Muye na ku shimikila ngayi, ‘Wene wa muyilu uli hahepi.’ 8Nyongomanishenu bakakukola, shangulenu ba kufwa, nyongomanishenu bakabimakwa, pe kafumishenu mayimbwe. Munatambulu nahiya, panikenu nahiya. 9Hinga mushimba mali a ngolinde, hinge a shiliva, hinge kopa mu mapokoto enu. 10#1Koli 9:14; 1Tim 5:18. Hinga mushimba mpamba ya mpanda, hinge bikobelo bibili, hinge ncangwa, hinge muwana, ndaba mukamulimo uku fwanina kupanikiwa byakulya.

11“Nimwamo mu munzi hinge mu kanzi mukengina, mwipwizize ndi kuli muntu ukushinga kumitambula, pe mwikale kukwendi hantu mutena wakuya. 12Oho mukwingina mu litala, shangwishenu baya balimo. 13Ndi bantu ba muya mu litala kukamitambula bafwako, ku mwena kwenu kwikala hahabo kufwako. Ndi kumitambula bafwako, ku mwena kwenu kukaboka kukwenu. 14#Mil 13:51. Ndi muntu wamina ukabula kumitambula, hinge kubula kuyuvwa mazu wenu, oho mu kufuma ku litala liyo hinge mu uya munzi, totomonenu lukungu lwa ku mawulu wenu. 15#Mat 11:24; Shit 19:24-28. Nikumitongweza kupwisha ngayi ha Mutena wa Kuyata, Nyambi ukayuvwila nceshe shikuma ku bantu ba mu Shondoma na Ngomola kupitakana bantu ba mu munzi uyo.

Kuyandishiwa kwa bantumwana

(Mako 13:9-13; Luka 21:12-17)

16 # Luka 10:3. “Nikumituma ngonehe bambelele mukati ka bambinzi. Nohobene mwinge ba kukeya ngonehe mayoka kami mwinge ba kubomba ngonehe nkilimba. 17#Mako 13:9-11; Luka 12:11-12; 21:12-15. Keyenu na bantu, ndaba ngayi bakamitwala ku nkuta, bakamikama mu mashinangonge wabo. 18Bakamitwala kami ku batulela na ku bamyene ndaba yami, ngayi winge wupaki kukwabo naku Bakamatunga. 19Ngoboni oho bakamitwala na kumiyatisha, hinga mukalikekula ngayi tukamba nahiti. Hashikati shiyo, mukapanikiwa ebye mukambe. 20Ndaba kaliha enu mukwamba ngoboni Moyo wa Tatiyenu, niwo ukamba mumwenu.

21 # Mako 13:12; Luka 21:16. “Muntu ukabeba kawushinda wendi ku kufwa na tata muntu ukatenda noho kuli mwanendi. Bana bakafutukila bahemi babo, pe bakabazihiwisha. 22#Mat 24:9-13; Mako 13:13; Luka 21:17. Mukazimbiwa ku bantu nimwabo ndaba ya lizina lyami, ngoboni ou ukazumanana kukuma ku mamaninino niye akapuluke. 23Oho bakamiyandisha ku munzi umo, tininenu ku munzi wamina, mwa shikuma nikwamba kukwenu ngayi, Mwana Muntu ukeza oho shilolo mumanishe kupita mu minzi nimwayo ya Ishalela.

24 # Luka 6:40; Yowa 13:16; 15:20. “Kowa ndongesha ukupitakana mulongeshi wendi, kami kowa mukamulimo wakupitakana hekulyendi. 25#Mat 9:34; 12:24; Mako 3:22; Luka 11:15. Nohobene ndongesha unafwanini kwinga ngonehe mulongeshi wendi na mukamulimo unafwanini kwinga ngonehe hekulyendi. Ndi banatumbu mutwe wa litala ngayi Mbelezebule, pe baka litala lyendi bakatumbiwa na mazina amabi shikuma!

Yani waku fwanina kutiniwa

(Luka 12:2-7)

26 # Mako 4:22; Luka 8:17. “Nohobene hinga mutina bantu, shuma nimwasho sha kufwikiwa shikafwikuluka, kami shuma nimwasho sha kulimba, shikalimukiwa. 27Ebye nikumitongweza mu mincimpwe, mukabyambe mwaana ncanana. Ebye mukayuvwa bya kuyebetela, kabibilikenu hinga mwemana hayilu ya matala. 28Hinga mutina aba ba kuziha lutu, kami bakubula ngovu za kuziha moyo. Ngoboni yuvwilenu Nyambi bowa ou ukutwesha kunongesha moyo na lutu mu ngehena. 29Kati tuntungisha tubili kaliha tukulandiwa na ka mali kamo ndi? Ngoboni kowa hinge kamo kakawila hanci kwakubula kulimuka Tatiyenu. 30Hinge huki za ku mitwe yenu zinalabiwi nimwazo. 31Nohobene hinga mutina ndaba mu kupitakana tuntungisha twatwingi.

Kulishisha na kukana Kilishitu

(Luka 12:8-9)

32“Nohobene muntu nimwendi ukunyitabila ku meho a bantu nami nikamwitabila ku meho a Tate uli muyilu. 33#2Tim 2:12. Ngoboni ou nimwendi ukunkana ku meho a bantu nami nikamukana ku meho a Tate uli muyilu.

Kulifutukila kwa bantu ndaba ya Yeshu

(Luka 12:51-53; 14:26-27)

34“Hinga muhanganika ngayi nalete ku mwena hano hanci, kaliha nalete ku mwena, ngoboni nalete mukwale. 35#Mika 7:6. Ndaba nalete nzimbo, mwana wa mulume ukafutukila tatiyendi, mwana wa mbuyama ukafutukila mandiyendi, mukazi ukafutukila mukowendi wa mbuyama. 36Kami bawushinda wa muntu bakenga bamalamo bendi.

37“Nimwendi uku haka tatiyendi hinga mandiyendi kupitakana ami, ku fwanina kwinga ndongesha wami wufwako. Nimwendi uku haka mwanendi wa ndumbana hinge wa mbuyama kupitakana ami, ku fwanina kwinga ndongesha wami wufwako. 38#Mat 16:24; Mako 8:34; Luka 9:23. Nimwendi ou ukubula kushimba shishempakano shendi ngayi mwanga ankonke, ku fwanina kwinga ndongesha wami wufwako. 39#Mat 16:25; Mako 8:35; Luka 9:24; 17:33; Yowa 12:25. Nimwendi ukwezeka kulama wumi wendi niye mwine, ukawuyongesha, ngoboni nimwendi ukuyongesha wumi wendi ndaba yami ukawuwana.

Zincuungu

(Mako 9:41)

40 # Mako 9:37; Luka 9:48; 10:16; Yowa 13:20. “Ou ukumitambula ukuntambula, kami ou ukuntambula ukutambula ou wantumine. 41Nimwendi ukutambula muluwe wa Nyambi ndaba ngayi nengi muluwe wa Nyambi, ukutambula ncuungu ya muluwe wa Nyambi, kami nimwendi ukutambula mukakwoloka ndaba ngayi nengi mukakwoloka, ukatambula ncuungu ya wakwoloka. 42Ou nimwendi ukapana hinge nkomoki ya mema a kubombola ku umo wa naba babashe ndaba ngayi unengi ndongesha wami, mwa shikuma nikumitongweza ngayi uya muntu ukatambula ncuungu yendi.”

Currently Selected:

Mateo 10: LLK

Highlight

Copy