Luka 11

Yeshu uku longesha bya ha malombelo

(Mateo 6:9-13; 7:7-11)

1Mutena wamina Yeshu wekalile na kulombela ku mwanya wamina. Oho amanishile kulombela, umo wa bandongesha bendi wambile kukwendi ngayi, “Mwene, tulongeshe kulombela, ngonehe Yowano alongeshele bandongesha bendi.”

2Yeshu wambile kukwabo ngayi, “Oho mu kulombela mwambe ngayi,

‘Tate,

lizina lyobe lilemeshiwe,

Wene wobe wize.

3Tupanike kulya kwetu kwa ha mutena na mutena.

4Tuyatile wubi wetu,

ndaba netu kami twayatilanga aba ba kutubipishila.

Hinga utwingiza mu byezeko.’ ”

5Niho Yeshu ambile kukwabo ngayi, “Ndi umo hakati kenu uli na muhoni wendi, ha kuya kukwendi hakati ka wushiku hakamba ngayi, ‘Muhoni, mpeko mankende ahatu nika kuhingishilawo, 6ndaba muhoni wami uli ha mukala na kumu ku litala lyami, ngoboni bya kumuyumbula nifwabyo.’ 7Pe niye hakakumbula ngayi, ‘Hinga unkabakanisha nashinki mwaka shipana, kami ami na bana bami twalangana mwaka, kutwesha kupinduka ngayi nikupanike shamina nifwako.’ 8Nikumitongweza ngayi hinge ndi ukubula kupinduka na kumupana linkende ndaba nengi muhoni wendi, ngoboni ukapinduka na kumupana eshe akushinga nimwasho ndaba ya lunzewe lwendi.

9“Nikwamba kukwenu ngayi, nyepenu, pe mukatambula, shingenu, pe mukawana, ngongomwezenu, pe bakamishinkwilila shipana. 10Ndaba ou nimwendi ukunyepa, ukatambula, ou nimwendi ukushinga ukawana, kami ou ukungongomweza, bakamushinkwilila shipana. 11Kati yani hakati kenu wakupana mwanendi liyoka ndi unamunyepe inci? 12Hinge ndi unanyepe lingi ha kumupana kapilili? 13Haya ndi enu bababi mu kulimuka kupana bana benu byuma byabiwahe, pe Tatiyenu wa muyilu ukakwanga nahiti kupana Moyo wa Kuyela kuli bayo ba kulomba kukwendi?”

Yeshu na Mbelezebule

(Mateo 12:22-30; Mako 3:20-27)

14Yeshu wafumishilenga mayimbwe a shimumu, oho mayimbwe afumine, mulume watatikile kwamba. Pe bantu bakomokele. 15#Mat 9:34; 10:25. Ngoboni bamo bambile ngayi, “Ukufumisha mayimbwe na ngovu za Mbelezebule mwene wa mayimbwe.”

16 # Mat 12:38; 16:1; Mako 8:11. Bamina ha kwezeka Yeshu, bamunyepele ngayi abamoneshe shimonekesho sha kufuma muyilu. 17Ngoboni Yeshu walimukile bihanganiko byabo, pe waba kumbwile ngayi, “Wene nimwawo ukulitapulula na kulilwisha ukaloba, kami litala likulitapulula na kulilwisha likawa. 18Ndi wene wa Shatana ukulitapulula na kulilwisha, pe wene wendi ukashuma nahiti? Ndaba mukwamba ngayi nikufumisha mayimbwe na ngovu za Mbelezebule. 19Ndi nikufumisha mayimbwe na ngovu za Mbelezebule, pe bandongesha benu ba kuwafumisha na yani? Nohobene bandongesha benu bakenga bakakumiyata. 20Ngoboni ndi nikufumisha mayimbwe na ngovu za Nyambi, pe limukenu ngayi Wene wa Nyambi wakumakale kukwenu.

21“Oho mulume wa nyala unalibalakanya na bilwisho, ukulama litala lyendi, wuheti wendi ukwikala shiwahe. 22Ngoboni ndi kunezi wamina wa nyala za kumupitakana, ukamukoma na kumuyanga bilwisho byendi nimwabyo akulupila na kutapa wuheti wendi.

23 # Mako 9:40. “Muntu nimwendi wakubula kundwila, ukundwisha, nimwendi wakubula kukungula na nami, ukupanzanisha.

Kuboka kwa mayimbwe

(Mateo 12:43-45)

24“Oho mayimbwe anafumu mu muntu, ayanga mu ngawungawu na kushinga mwanya wakukatalila, ndi anabulu kuwu wana, pe akwamba ngayi, ‘Nikaboka mu litala lyami omu nafumine.’ 25Oho akukuma, akuwana litala linakombiwi na kuwahishiwa. 26Niho akaya na kuleta mayimbwe amina a mutanu na abili amabi kupitakana niwo, pe akwingina na kwikalamo. Nohobene nyinkalo ya muntu uyo yikenga yayibi kupitakana ya kutatika.”

Mfuywezi za kupwisha

27Oho Yeshu ambile eshe, mbuyama wamina mukati ka likunge wabilikizile ngayi, “Wa mfuywezi mandiyobe wakubelekele na kukulela!”

28Ngoboni Yeshu wambile ngayi, “Bali na mfuywezi shinene bayo ba kuyuvwa lizu lya Nyambi na kulilama!”

Bakunyepa shimonekesho

(Mateo 12:38-42)

29 # Mat 16:4; Mako 8:12. Oho Yeshu amuzingulukile makunge a bantu, wambile ngayi, “Mukoka ou unengi mukoka wa wubi ukushinga shimonekesho, ngoboni kowa shimonekesho shikapanikiwa kukwabo ndele shimonekesho sha Yona. 30#Yona 3:4. Ngonehe muluwe Yona engile shimonekesho ku Bakanineva, nisho kami Mwana Muntu akenga shimonekesho ku mukoka owe. 31#1Bamy 10:1-10; 2Bya 9:1-12. Ha Mutena wa Kuyata, Lihano waku mabukubuku ukemana na kuyata bantu ba mukoka ou, ndaba niye wafumine kwakumina hanci kwiza mu kuyuvwa ngana za Sholomoni, ngoboni monenu wakupitakana Sholomoni uli kuno. 32#Yona 3:5. Ha Mutena wa Kuyata, Bakanineva bakemana na kuyata ou mukoka, ndaba batengulukile na ku shimikila kwa Yona. Ngoboni wakupitakana Yona uli kuno!

Lumuni lwa lutu

(Mateo 5:15; 6:22-23)

33 # Mat 5:15; Mako 4:21; Luka 8:16. “Kowa muntu wakumunika lambi na kuyiyaka mu nceto ya lulonga lwa kukunama, ngoboni wayiyakanga haya yiku moneka ngayi yimoneshe bali mu litala nimwabo. 34Meho wobe enga lambi ya lutu, ndi meho wobe aku mona shiwahe na lutu lwobe nimwalwo lukekala na lumuni, ngoboni ndi meho wobe ku mona afwako, pe lutu lwobe nimwalwo lukekala mu mincimpwe. 35Haya keyenu kutina lumuni mulinalwo lwinga mincimpwe. 36Nohobene ndi lutu lwobe nimwalwo luli na lumuni, kwakubula mbalila yimo yili mu mincimpwe, nimwalwo lukekala na lumuni lwalunene ngonehe lumuni lwa lambi lukumimunika.”

Yeshu ukunyanca Bafwalishi na bakakulongesha ndayano

(Mateo 23:1-36; Mako 12:38-40)

37Oho Yeshu amanishile kwamba, Kafwalishi umo wamunyepele ngayi aye akalye nendi. Pe wenginine mu litala, wekalile ku tebulu na kulya. 38Kafwalishi wakomokele oho atoshele ngayi uli na kulya kwakubula kuyowela taha ku maboko. 39Mwene wambile kukwendi ngayi, “Enu Bafwalishi, mwayoweshanga nkomoki na lulonga ha munkanda, ngoboni mukati munenzala mutongo na wubi. 40Enu bibulangana! Kati Nyambi ou watendele bya ha munkanda, kaliha niye kami watendele bya mukati ndi? 41Ngoboni panikenu bili mu zinkomoki na mu zindonga zenu ku bakakuyanda, pe byuma nimwabyo bikenga bya kuyela kukwenu.

42 # Bal 27:30. “Makando wenu Bafwalishi! Ndaba mwapananga kuli Nyambi sha wulikumi sha mashiha a minta na kumini na mishobo nimwayo ya mu mfuba ya mashiha, ngoboni mu kukana kuyata shiwahe na kukana shishemo sha Nyambi. Munafwanini kubitenda ebye na kubula kukiluka byamina.

43“Makando wenu Bafwalishi! Ndaba mu ku haka bipona bya maleema mu mashinangonge na ku shangwishiwa na maleema mu myanya ya kulandishila. 44Makando wenu! Ndaba mu kufweka ngo binzimbi bya kubula ku moneka, haya bantu bakwenda kwakubula kubilimuka.”

45Umo wa bakakulongesha ndayano wambile ngayi, “Mulongeshi, oho ukwamba ebye ukutuyinisha nanetu kami!”

46Yeshu wakumbwile ngayi, “Makando wenu nanenu bakakulongesha ndayano! Ndaba mu kutwika bantu miziho yayilemu, ngoboni enu bamwine kukwata ku miziho eye hinge na munwe wenu mufwako. 47Makando wenu! Ndaba mukutenda binzimbi bya bamiluwe baya bazihiwile ku bankakazenu. 48Enu mu kupaka na kwitabila ntendelo ya bankakazenu, bazihile bamiluwe enu mukutenda binzimbi byabo. 49Ndaba ya neshe ngana za Nyambi zambile ngayi, ‘Nikabatumina bamiluwe na bantumwana, ngoboni bantu bakaziha bamo kukwabo na kuyandisha bamina.’ 50Nohobene bantu ba mukoka owe bakashushuliwa ndaba ya bamiluwe bazihiwile kufuma kukulenga kwa kaye, 51#Shit 4:8; 2Bya 24:20-21. kutatika na lufu lwa Abele kuleta na ku lufu lwa Zakaliya, ou wazihiwile mukati ka kaala na mwanya wa kuyela. Ee, nikumitongweza ngayi mukoka owe ukashushuliwa ndaba yaneze zindufu. 52Makando wenu bakakulongesha ndayano! Ndaba munatenteke kiyi ya ku shinkwilisha ku shipana sha kalimukisho, enu kwinginamo mufwako, pe mu kukanisha baya bakushinga kwingina!”

53Oho Yeshu afumineko kuyo, bakakulongesha ndayano na Bafwalishi batatikile kumukabakanisha shikuma na kumwipula byuma byabingi, 54bamubelaminine ngayi bamukwate na mazu a mukanwa kendi.

Currently Selected:

Luka 11: LLK

Highlight

Copy