Yowano 8
8
Mbuyama wawaniwile hatenda wumambe
1Ngoboni Yeshu wayile ku lipili lya mitondo ya Olive. 2Oho kwashile lumenemene wezile kami ku Litala lya Nyambi. Bantu nimwabo bezile kukwendi, niho ekalile hanci, pe wabalongeshele. 3Baka ku longesha ndayano na Bafwalishi baletele mukati mbuyama bawanine hatenda wumambe, pe bamwimikile mukati kabo. 4Bambile kuli Yeshu ngayi, “Mulongeshi, ou mbuyama unawaniwi hatenda wumambe. 5#Bal 20:10; Nday 22:22-24. Haya Moshesha mu ndayano watutongwezele ngayi ou mbuyama wanehe uku fwanina kupuhiwa mamanya. Haya obe ukwamba bishini?” 6Bambile ebye mu kumwezeka ngayi bawane ha kumuyatishila. Ngoboni Yeshu wanyongamine, pe watikitile hanci na munwe wendi.
7Oho batwalilileho na kumwipula, wanyongolokele wambile kukwabo ngayi, “Ou wakubula wubi mukati kenu, atatike kumupuha limanya.” 8Niho anyongamine kami, watikitile hanci. 9Ngoboni oho bayuvwile ebye ambile, nimwabo bafumine umo na umo, kutatika na bakulwane. Yeshu washalile ninkayendi na uya mbuyama hinga emana kumbili yendi. 10Oho Yeshu anyongolokele wamwipwile ngayi, “Obe mbuyama, kati balikuti? Kati kowa muntu unakuyata ndi?”
11Mbuyama wambile ngayi, “Hekulu, kowa.”
Yeshu wambile kukwendi ngayi, “Nanami kami ku kuyata nifwako. Yanga, ngoboni hinga utenda wubi kami.”]
Yeshu niye lumuni lwa mu kaye
12 #
Mat 5:14; Yowa 9:5. Niho Yeshu ambile kami ku Bafwalishi ngayi, “Ami lumuni lwa mu kaye. Nimwendi ukunkonka, kukenda mu mincimpwe wufwako, ngoboni ukekala na lumuni lwa wumi.”
13 #
Yowa 5:31. Niho Bafwalishi bambile kukwendi ngayi, “Haya ukulipaka obe mwine, ebye ukwamba kaliha bya kupwisha.”
14Yeshu wakumbwile kukwabo ngayi, “Hinge ndi nikulipaka amimwine, wupaki wami wa kupwisha, ndaba nikulimuka oku nafuma nanoku nikuya. Ngoboni enu kulimuka oku nafuma nanoku nikuya mufwako. 15Mwayatanga na bihanganiko bya wuntu. Ami kuyata muntu nifwako. 16Ngoboni shinga nikuyata, nyatilo yami shinga ya kupwisha, ndaba kaliha nili ninkayami, nili na Tate ou wantumine. 17#Nday 19:15. Kwatikitiwile mu ndayano zenu ngayi, wupaki wa bantu babili wenga wa kupwisha. 18Nikulipaka amimwine, kami na Tate ou wantumine ukumpaka.”
19Niho bambile kukwendi ngayi, “Tatiyobe uli kuti?”
Yeshu wakumbwile ngayi, “Kundimuka mufwako, hinge Tate kumulimuka mufwako. Shinga mwandimuka, shinga mwalimuka na Tate kami.”
20Yeshu wambile awa mazu oho alongeshelenga mu Litala lya Nyambi, mu kampenci kaya kekalile na bikongelo bya ntupu. Ngoboni kowa muntu wamukwatile, ndaba shikati shendi oho shilolo shikume.
Kutwesha kuya oku ami nili na kuya mufwako
21Yeshu wambile kami kukwabo ngayi, “Ami nikuya, mukancingancinga, ngoboni mukafwa mu wubi wenu. Oku nikuya, enu kutwesha kukumako mufwako.”
22Niho Bayunda bambile ngayi, “Kampe ukaliziha ndi, oho akwamba ngayi, ‘Oku nikuya, enu kutwesha kukumako mufwako.’ ”
23Yeshu wambile kukwabo ngayi, “Enu muli ba hano hanci, ami nafuma kuyilu. Enu muli ba muno mu kaye, ami kaliha nili wa muno mu kaye. 24Nibyo namitongweze ngayi, mukafwila mu wubi wenu. Kami mukafwila mu wubi ndi enu kukulupila mufwako ngayi, ‘Ami niye Ami.’ ”
25Niho bamwipwile ngayi, “Kati obe yani?” Yeshu wakumbwile ngayi, “Hingebene ha kutatika namitongwezele. 26Nili na byabingi bya kwamba bya ku fwanina kumiyata. Ngoboni ou wantumine wenga wa kupwisha, pe nikutongweza kaye ebye nayuvwu kukwendi.”
27Kaliha bayuvwishishile ngayi Yeshu wabatongwezelenga bya Tatiyendi. 28Niho Yeshu ambile ngayi, “Oho mukakatula Mwana Muntu, niho mukalimuka ngayi ‘Ami niye Ami,’ kami ngayi kowa ebye nikutenda na ngovu zami amimwine, ngoboni nikwamba ebye antongwezele Tate. 29Kami ou wantumine uli na nami. Kunciya ninkayami wufwako, ndaba natendanga ebye bya mu wahililishanga.”
30Bantu babengi baya bayuvwile Yeshu hamba awa mazu ba kulupililile mumwendi.
Kupwisha kukamishobolola
31Yeshu watongwezele ba Yunda aba ba kulupililile mumwendi ngayi, “Ndi enu mukwombatala ku longesha kwami, mukwinga bandongesha bami, 32kami mukalimuka kupwisha, pe kupwisha kukamishobolola.”
33 #
Mat 3:9; Luka 3:8. Bakumbwile kukwendi ngayi, “Etu tuli bazukulya Abulahama hinga twatanga kwinga ndungo ku muntu. Nahiti ukwamba ngayi, ‘Mukashoboloka?’ ”
34Yeshu waba kumbwile ngayi, “Mwa shikuma nikwamba kukwenu ngayi, ou nimwendi ukutenda wubi wenga ndungo ya wubi. 35Ndungo kwikala mu lupashi shikati nimwasho wufwako, ngoboni mwana ukwikalililamo. 36Ndi Mwana unamishobolo, mwa shikuma mukashoboloka. 37Nikulimuka ngayi muli bazukulya Abulahama. Ngoboni mukushinga kunziha, ndaba kutambula mazu wami mufwako. 38Ami nikwamba ebye namono kuli Tate, ngoboni enu mukutenda ebye munayuvwu kuli tatiyenu.”
39Bakumbwile kukwendi ngayi, “Abulahama niye tatiyetu.” Yeshu wambile kukwabo ngayi, “Shinga muli bana ba Abulahama, shinga mukutenda ebye Abulahama atendele. 40Ngoboni haya mukushinga kunziha, ami namitongweze kupwisha oku nayuvwile kuli Nyambi. Abulahama kaliha nibyo atendele. 41Mukutenda ebye atendele tatiyenu.”
Niho bambile kukwendi ngayi, “Etu kaliha tuli bana ba mu wunjenge. Tuli na Tatiyetu umo tuhu niye bene Nyambi.”
42Yeshu wambile kukwabo ngayi, “Shinga Nyambi wenga Tatiyenu, shinga munahaka. Ndaba nezi kufuma kuli Nyambi kami nili hano. Kaliha ninezi mu shifungo shami, ngoboni sha uya wantumine. 43Kati shumangani mu kubula kuyuvwa ebye nikwamba? Ndaba ngayi kutwesha kuyuvwa mazu ami mufwako. 44Enu muli bana ba Shatana, niye tatiyenu, kami mukushinga kutenda bifungo bya tatiyenu. Wenga mukakuziha kufuma ku kutatika, kami kaliha watendele kupwisha ndaba mumwendi mowa kupwisha. Kwamba mahalo nisho ekala. Ndaba wenga wa mahalo kami niye tata mahalo. 45Ngoboni ami nikumitongweza kupwisha, niho mu kubula kunkulupila. 46Kati yani kukwenu ukaholola ngayi nili mukawubi? Ndi nikwamba kupwisha, shumangani mu kubula kunkulupila? 47Muntu ukufuma kuli Nyambi ukuyuvwa mazu a Nyambi. Shuma shikuletesha ngayi mubule kuwayuvwa ndaba enu kufuma kuli Nyambi mufwako.”
Yeshu na Abulahama
48Bayunda bakumbwile Yeshu ngayi, “Kati etu kaliha tunamba kupwisha ngayi obe uli Mukashamaliya, kami uli na mayimbwe ndi?”
49Yeshu wakumbwile ngayi, “Ami mayimbwe nifwawo. Nikulemeeka Tate, ngoboni enu kundemeeka mufwako. 50Amimwine kulishingila maleema nifwako. Kwali umo ukuwashinga niye mukakuyata. 51Mwa shikuma nikwamba kukwenu ngayi, ndi muntu ukulama lizu lyami, kukafwa wufwako.”
52Bayunda bambile kukwendi ngayi, “Haya tunalimuku ngayi uli na mayimbwe! Abulahama wafwa na bamiluwe bafwa nanibo, pe obe ukwamba ngayi, ‘Ndi muntu ukulama lizu lyami kukafwa wufwako.’ 53Kati obe ukupitakana tatiyetu Abulahama, ou wafwa ndi? Kami bamiluwe nanibo bafwa. Kati obe ukulihanganika ngayi uli yani?”
54Yeshu wakumbwile ngayi, “Ndi nikulileemeka, pe maleema wami kuyavwa afwako. Tate niye ukundeemeka, ou mu kutoya ngayi niye Nyambi yenu. 55Ngoboni shilolo mu mulimuke, ami namulimuka. Ndi nikwamba ngayi kumulimuka nifwako nikenga wa mahalo ngonehe enu, ngoboni nikumulimuka kami nikwombatala lizu lyendi. 56Tatiyenu Abulahama wawahililile ngayi ukamona mutena wami. Waumonene, pe wawahililile.”
57Bayunda bambile kuli Yeshu ngayi, “Shilolo ukume ha myaka makumi mutanu, kati wamumona Abulahama ndi?”
58Yeshu wambile kukwabo ngayi, “Mwa shikuma nikwamba kukwenu ngayi, oho Abulahama shilolo ahemuwe, ‘Ami niko nekalile?’ ”
59Niho Bayunda batolele mamanya ngayi bamupuhe, ngoboni Yeshu waliholekele, pe watutikile mu Litala lya Nyambi.
Currently Selected:
Yowano 8: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
