Shitatiko 38

Yunda na Tamale

1Ha shikati shiyo Yunda wafumine ku bayayizendi, wayile mukwikala na Hila, mulume wamu munzi wa Andulama. 2Niho Yunda akamonene mbuyama wamu Kenaani mwana Shuwa. Wamuyekele, 3pe wamubelekelele mwana wa mulume, ou atumbile ngayi Ela. 4Wemitile kami, wabelekele mwana wamulume, wamutumbile ngayi Onani. 5Kami wabelekele mwana wa mulume, wamutumbile ngayi Shila. Yunda wekalile ku Kezimbu oho Shila ahemuwile.

6Yunda wayekelele Ela mwanendi mbuyama lizina lyendi Tamale. 7Nyinkalo ya Ela mwana Yunda wakutatika yengile yayibi ku meho a Nyambi ya Ngula, pe Nyambi ya Ngula wamuzihile. 8Niho Yunda ambile kuli Onani mukonzo wa Ela ngayi, “Yanga ukalangane na mfwile wa yayiyobe. Tenda mulimo kukwendi ndaba nengi mukaza yayiyobe ngayi yayiyobe mwanga ekale na bazukulu.” 9Ngoboni Onani walimukile ngayi bana kaliha bakenga bendi, pe oho alalilenga na mfwile wa yayiyendi wayitililenga hanci, kutina mwaka kukekala bana kuli yayiyendi. 10Eshe atendelenga shapilamishile Nyambi ya Ngula, pe wamuzihile. 11Niho Yunda ambile kuli mukowendi ngayi, “Boka ku litala lya tatiyobe hinga wenga mfwile hantu mwanami Shila unakulu.” Wambile eshe ndaba watinine ngayi Shila ukazihiwa ngonehe bengile bayayizendi. Nohobene Tamale wabokele ku litala lya tatiyendi.

12Oho kwapitile matena, mukaza Yunda mwana Shuwa wafwile, oho Yunda amanishile zintande, niye na muhoni wendi Hila waku Andulama bayile ku Timina, oku bashehelenga bambelele bendi. 13Muntu wamina watongwezele Tamale ngayi, “Mukowobe uli na kuya ku Timina mu ku sheha matanga a bambelele bendi.” 14Nohobene Tamale watambashanine bivwalo byendi bya wumfwile ebye avwalilenga. Walifwikile likwiza lya shitokesha pe wekalile hanci ku lipangati lya ku Enaimu, ku munzi ou wekala ha nzila ya kuya ku Timina. Tamale walimukile ngayi Shila wakulakale, ngoboni kaliha napanikiwi kukwendi ngayi amuyeke.

15Oho Yunda amumonene wahanganikile ngayi ou mbuyama walwiholwiho ndaba ngayi walifwikile ku lupala lwendi. 16Wamwihanine kunkumo ya nzila pe wambile ngayi, “Nikushinga nilangane nobe.” Ngoboni Yunda kaliha walimukile ngayi mukowendi Tamale. Niho Tamale ambile ngayi, “Ukampana bishini ha kulangana na nami?”

17Yunda wakumbwile ngayi, “Nikakutumina kana ka mpongo ku litanga lyami.” Tamale wambile ngayi, “Nimwasho shashiwahe, mpane taha kalamisho ndele unakakalete.”

18Yunda wamwipwile ngayi, “Kalamisho ngani?”

Wakumbwile ngayi, “Limango na mukali walyo uli na lizina lyobe na muwana ou unashimbi.” Pe wamupanikilebyo. Walalile nendi pe wemitile. 19Niho Tamale ayile ku munzi, pe wavulile likwiza lya shitokesha shendi na kuvwala makwiza wendi a wumfwile.

20Yunda watumine muhoni wendi Hila ku Andulama na kana ka mpongo mu kubwesha kalamisho ku mbuyama, ngoboni kaliha wakamuwanine. 21Wepwile bantu bekalilenga kuyo ngayi, “Ulikuti ou mbuyama walwiholwiho ou wekalilenga kunkumo ya nzila yikuya ku Enaimu?”

Bakumbwile ngayi, “Hinga kwatanga kuno, shilolo kwikale mbuyama walwiholwiho.”

22Hila wabokele kuli Yunda, pe wamutongwezele ngayi, “Kaliha nakamuwana, bantu ba kuyo bambile ngayi hinga kwatanga kwikala mbuyama walwiholwiho.”

23Yunda wambile ngayi, “Mulehele biya byuma, kushinga tufwako ngayi tukahepiwe ku bantu. Nashinga ku mupana kana ka mpongo ngoboni kaliha wamuwana.”

24Oho zingonda zihatu zapitile muntu umo watongwezele Yunda ngayi, “Mukowobe Tamale unatende wumambe, pe haya uli na livumo.” Yunda walayile ngayi, “Mututwishenu mukamuhokeshe afwe.”

25Oho bamututwishilenga ha munkanda, Tamale watumine lizu kuli mukowendi ngayi, “Mwine byuma ebye, niye unampana livumo. Tilaminenubyo na ku mona ngayi binengi byayani, elye limango na mukali walyo na nou muwana.”

26Yunda wabilimukile pe wambile ngayi, “Nengi shiwahe. Ngoboni ami nashobolo kulimanga kwetu nafwaninine ku mupana kuli mwanami Shila ngayi amuyeke.” Kufuma haya Yunda kaliha walalile nendi kami.

27Oho shikati sha kubeleka kwendi sha kumine, kwawaniwile ngayi Tamale ukubeleka bambuyu. 28Oho ayendukile, umo watutwishile liboko lyendi, pe mboshwa walikwatile, wamangileko kawutonge kakufubila, wambile ngayi, “Ou niye wakutatika kuhemuwa.” 29Ngoboni wabweshele liboko lyendi, pe mukonzo wendi walimenekele kuhemuwa. Niho mboshwa wambile ngayi, “Eshe nisho ukutibulula nzila yobe.” Nohobene wamutumbile ngayi Pelizi.#38:29 Pelizi: Kutontolola ngayi ou nakono. 30Niho mukonzo wendi wahemuwile na kawutonge kakufubila ku liboko lyendi. Pe wamutumbile ngayi Zela.

Currently Selected:

Shitatiko 38: LLK

Highlight

Copy