Shitatiko 19

Wubi wa bantu bamu Shondoma

1Mangeloyi abili ezile mazolo mu Shondoma, Lote wekalile ku lipangati lya munzi, oho abamonene tuhu wakatukile wayile na kubashimbawila. Washinkamine hanci ku meho wabo na kulamba 2ngayi, “Bahekulyami, ami nili na kumitekesha, bahekulu yekenu ku litala lyami. Mukutwesha kuyowesha mawulu wenu na kulangana. Lumenemene mwapinduka pe mu kuya mukala wenu.”

Ngoboni bambile ngayi, “Byo, tu kwonzela muno mukati ka mbanza ya munzi wushiku nimwawo.”

3Lote wazaminine shikuma pe ku mamaninino bayile ku litala lyendi, Lote watongwezele bakamilimo bendi kuvuba linkende na kuwahishila byakulya byabiwahe bayeni, niho balile.

4Oho shilolokale bayeni baye mu kulangana, bantu bamu Shondoma, bandumbana hinge ngayi mihempela na bakulwane bazingulukile litala. 5#Bak 19:22-24. Babilikizile kuli Lote ngayi, “Balikuti balume twamona mazolo? Batutwishile kuno kukwetu ngayi mwanga tutende nabo kaloombe.”

6Lote watutikile ha munkanda kuya kukwabo, pe washinkile shihala. 7Niho ambile kukwabo ngayi, “Bawushinda nikumilomba ngayi, hinga mutenda shuma shashibi nehe. 8Monenu, nili na bana babambuyama babili aba babula kulimona na balume, ndehenu nibalete kukwenu, pe mu kutwesha kutenda nabo nimwabyo ebye mukushinga kutenda. Ngoboni hinga mutenda shuma shimo ku naba bantu, ndaba nibo banengi bayeni mu litala lyami, pe nafwanini kubalama.”

9Ngoboni bambile ngayi, “Fumaha, obe lipukwenda. Obe uli yani ngayi ututongweze mwa kutendela? Fumaha, ndelewa tuku kutenda shibi kupitakana nibo.” Banyakwile Lote ntenganyima na kushinga kupokola shihala.

10Ngoboni baya balume babili bekalile mu litala bakolobelele Lote bamukokelelele mu litala, pe niho bashinkile shihala. 11#2Bamy 6:18. Niho baleteshele wushishitwa bantu nimwabo bekalile ha munkanda, bandumbana na bakulwane, pe kaliha batweshele ku mona shipana.

Lote ukufuma mu Shondoma

12Niho baya balume bambile kuli Lote ngayi, “Uli na muntu wamina kuno ndi? Bako babalume, bana babalume, bana babambuyama, hinge ndi muntu wamina uli nendi mu munzi muno, bafumishemo, 13ndaba tukalobesha luno lukena. Nyambi ya Ngula unayuvwu bihepwa bya kulwisha bantu aba, pe unatutumu mu kulobesha Shondoma.” 14Lote wayile ku balume bashingile kuyeka bana bendi na kwamba kukwabo ngayi, “Nyankupenu kufuma muno, Nyambi ya Ngula uli na kushinga kulobesha luno lukena.” Ngoboni bahanganikile ngayi uli na kushengwiza.

15Oho mutena shilolo ututike, mangeloyi bezekele ku nyankupisha Lote. Bambile ngayi, “Nyankupa, shimba mukazobe na bana bobe babili babambuyama mufumemo, ngayi mubule kuyawa wumi wenu ha kuloba kwa nou munzi.” 16#2Pita 2:7. Ngoboni Lote wancincazalile. Nyambi ya Ngula wekalile na nceshe hahendi, nohobene baya balume bamukwatile ku liboko na mukazendi na bana bendi babambuyama, pe babakokelele ha munkanda wa munzi. 17Oho babakokelelele ha munkanda umo ku mangeloyi wambile ngayi, “Tinishenu wumi wenu, hinga mu shetuka kunyima, hinge kwimana, yitukilenu ku mapili, ngayi mukabule kuzihiwa.” 18Ngoboni Lote wambile ngayi, “Byo, hekulu hinga utenda noho. 19Enu muna wahilili na nami kami munapulwishi wumi wami, ngoboni mapili ali kwakutali shikuma, kuloba kukangwana oho shilolo nikumeko. 20Kati obe wufwako ku mona uya munzi wawushe ndi? Niwo uli hahepi shikuma, kuyo nikutwesha kukumako, Ndehenu nitinineko, niwo unengi tuhu munzi wawushe, pe wumi wami ukapuluka.”

21Muntu uya wakumbwile ngayi, “Nikwitabila noho, kukalobesha luya lukena nifwako. 22Nyankupisha, yituka. Kutwesha kutenda shuma shimo nifwako hantu unakakumuko.” Nibyo batumbilile uya munzi ngayi Zowa.

Kuloba kwa Shondoma na Ngomola

23Mutena watutikilenga oho Lote akumine ku Zowa. 24#Mat 10:15; 11:23, 24; Luka 10:12; 17:29; 2Pita 2:6. Niho Nyambi ya Ngula alokeshele muhenga na mundilo wafumine kuyilu hali Shondoma na Ngomola. 25Pe walobeshele zinkena na zimbuwa nimwazo, hamo na bantu nimwabo bekalilemo na zimbuto nimwazo zamenene kuyo. 26#Luka 17:32. Ngoboni mukaza Lote ou wekalile munyima ya mukokwendi washetukile kunyima, pe wafutukile kwinga linkamate lya mushele.

27Oho kwashile lumenemene Abulahama wanyankupile kuya ku mbalila oku emanine ku meho a Nyambi ya Ngula. 28Wapenzele mu nceto ku Shondoma na Ngomola na tungulungwa nimwato, wamonene wishe watutuminenga ngonehe wishe wakufuma ha ngaanze. 29Oho Nyambi ya Ngula alobeshele ziya zinkena nimwazo za muya mu litunga azikilenga Lote, wanukile Abulahama mu mutima na kwitabilisha Lote ngayi apuluke shiwahe.

Shitatiko sha Bamowambi na Baamoni

30Ndaba Lote watinine kwikala mu Zowa, niye na bana bendi babili ba bambuyama bayile mu mapili, oku bekalile mu linzolongoma. 31Mwanendi wa mbuyama wa mweli wambile kuli mukonzo wendi ngayi, “Tatiyetu hikakulukazi, pe kowa balume kuno tuli ba kutuyeka ngayi tutweshe kuwana bana. 32Yeka, tumunwishe waine akolwe, tutweshe kulangana nendi ngayi mwanga tuwaneko bana kuli tatiyetu.” 33Uyo wushiku bamunwishile waine, pe mwanendi wa mukulwane walanganine na tatiyendi, ngoboni tatiyendi ndaba wakolwele shikuma wabulile kulimuka shuma shatendiwilenga.

34Oho kwashile mwanendi wa mukulwane wambile kuli mukonzo wendi ngayi, “Ami na langana na tatiyetu wushiku wa nzona. Haya tokoko, tumunwishe wushiku walelo ngayi nobe kami wulangane nendi, niho nimwetu twikale na bana ba kuli tatiyetu.” 35Pe ha wushiku wuya bene banwishile tatiyabo waine, wakolwele, pe mwanendi wa mukaala niho alanganine na tatiyendi. Ngoboni Lote wakolwele shikuma kaliha walimukile shuma shatendiwilenga. 36Mu nzila eye nimo bawaninine mavumo bana ba Lote a kuli tatiyabo. 37Mwanendi wamukulwane wabelekele mwana wamulume wamutumbile lizina ngayi Mowambi,#19:37Mowambi: Lizina elye likuyuvwanika ngonehe lizu lya mu shihebelu ngayi, “Wakuli tate.” niye nkaka Bamowambi kuleta na ku mutena walelo. 38Wakanuke wabelekele mwana wa mulume, wamutumbile lizina ngayi Mbena Ami#19:38 Mbena Ami: Lizina elye mu Shihebelu likutontoloka ngayi, “Mwana kawushinda wami wamulume,” pe likuyuvwanika ngo lizu lyamu Shihebelu ngayi, “Kaamoni.” niye nkaka ya Baamoni kuleta naku mutena walelo.

Currently Selected:

Shitatiko 19: LLK

Highlight

Copy