Mareka 16

1Sabata chiyinahiti, Mariya Mandaleni, niMariya mama yaYakoba, niSalomi, alandili nyitondu yamavumba amawahi, kulonda enzi nakumuwayisha. 2Habudidi yayeni hefuku damulungu damuchimu, hiyakwinza kwijamu itaŋwa datuntuka dehi. 3Hiyakuhoshahosha mukachi kawu nawu, Wukutulaŋumwina ilola difumi kuchisu chejamu hinyi? 4Chataliluwu hiyakumona ilola anadilaŋumunuku dehi; muloŋa dadiŋi deneni nankashi. 5Chaneŋiluwu mwijamu hiyakumona mukwenzi weyala nashakami kumbadi yachidiilu, navwali chi kovwelu chitooka; hiyakuhayama. 6Yena hakuyila nindi, Bayi muhayamaku; mudi nakukeŋa Yesu kaNazareta apopeleluwu kukulusu; wasaŋuka dehi mudi afu; hadi munuku; talenu hamukamikiluwu! 7Ilaŋa yenu mwakaleji atumbanji twindi, niPetulu, nenu hakuyaloŋahu dehi kuŊaliliya; diku kumwakamumwena, mwomwayilejelaŋayi. 8Hiyakwidikamu, hiyakufuma kwijamu lufuchi, kunayiwani dehi nikuzaala nikuhayama; hiyahosheli chuma namuntuku, muloŋa atiyili woma.

9Cheliliyi nasaŋuki dehi habudidi hefuku damulungu damuchimu, wásambilili kumwekana kudi Mariya Mandaleni afumishiliyi ademoni atanu nayedi. 10Yena hakuya nakuleja adiŋiyi nawu, chadiŋuwu nakuneŋa nikudila. 11Wena chatiyiluwu nawu wamumi, niyena Mariya namumoni dehi, hiyetiyili kwawuku.

12Kulondela hayumiyi, amumwekesheli mwacheŋi kudi akwawu ayedi chadiŋi nakufumawu kunanda nakuya kumukala wawu. 13Niwena ayili nakuyileja akwawu; hela wena nawa kuyiitiya nehi.

14Nkumininaku amumwekesheli kudi awenawu ikumi nawumu chashakaminuwu nakudya; hakuyihoshola nansaŋu jantadi jawu nikuchinchika nyichima, nanochu chabuliluwu kwitiya wena amumweni heliliyi Nasaŋuki dehi. 15Hakuyila nindi, Yenu mumatuŋa ejima ampata yamunu mwishina nakushimuna nsaŋu yayiwahi kudi ejima aleŋawu. 16Muntu wukwitiya, wukupapatishewa, wakahanda; ilaŋa wukubula kwitiya wakatanya. 17Tiyenu yinjikijilu yakalondela mudi wena akwitiya chakukuhwelela; akafumisha ademoni mwijina dami; akahosha namadimi amaha; 18akanyamuna tupela; neyi akanwa yafwana hiyakayikatisha nihantuku; akanaŋika akata makasawu, akakola.

19Dichi Mwanta Yesu cheliliyi nahoshi dehi nawu, hiyakumutambula mwiwulu, hakushakama kuchikasa chaNzambi chachidiilu. 20Wena hiyakuya nakushimuna kwejima, Mwanta hakukoŋa nawu chimu, hakukolesha mazu nayinjikijilu yalondelumu. Amena.

Currently Selected:

Mareka 16: MW62

Highlight

Copy