Mareka 11

1Chanaswiluwu kwakwihi naYerusalema, kuBetefwaji naBetani, kwokumpidi yaOliveta, hakutemesha atumbanji twindi ayedi, 2hakuyila nindi, Yenu mumukaia wudi kumbidi wuna. Chimukushikamu, hohenohu mukuwana mwana kachimbulu anamukasi, wakadi kukandamaŋahu dehi kudi muntu, mwakamusubuli mumuleti. 3Neyi hadi muntu wukuyila nindi, Mudi nakwiladi? mukwila nenu, Anamukeŋi kudi Mwanta; yena wukumufuntisha cheŋi swayi. 4Ayili kwawu, aweni mwana kachimbulu anamukasi kuchisu hanzi munjila kachi hiyakumusubula. 5Antu amakwawu emenuku hiyakuyila nawu, Mudi nakusubwiladi mwana kachimbulu? 6Hiyakuyileja mwomwayilejeliyi Yesu; hiyakuyiteja kuya nindi. 7Hiyakuleta mwana kachimbulu kudi Yesu; hiyakushahu mahinawu, yena hakukandamahu. 8Amavulu hiyakwala mahinawu munjila, amakwawu hiyakuhobola yiputa mumaha, hiyakuyala munjila. 9Ninawa atwaminini kumbidi ninawa alondeleli munyima hiyakubilela nawu, Hozana! Kisu kisu iwu wukwinza mwijina daYehova! 10Kisu kisu wanta wukwinza wowu watata yetu Davidi! Hozana mwiwulu dakubadika!

11Hakwijila muYerusalema nimutembeli lwe; chanataliyi yuma yejima, kwila nimelela, hakwidikamu, hakuya kuBetani nekumi nayedi.

12Chikunachi, helili anafumi dehi muBetani, hakutiya nzala. 13Hakumona mutondu wachikuyu kwakulehi, wukweti mafu; hakuyaku nindi amonuku nyikabu; chanashikiyi kumutondu kuwana kwamafu hohu, muloŋa hihadiŋi hachila aka chayikuyuku. 14Hakuwuhosha nindi, Kufuma kulelu bayi akadya nyikabu yeyi kudi muntu haya nyakaku. Atumbanji twindi achitiyili.

15Ashikili kuYerusalema. Hakwijila mutembeli, hakutachika kutemunamu adiŋi nakulandisha, niadiŋi nakulanda mutembeli, hakuhinona nŋimesa jawakwakuhimpa mali, nimatanda anawa alandishilaŋa tutela; 16hetejeli muntu kusenda chuma achihitishi mutembeluku. 17Hakuyileja nindi, Anasoneki nawu, Itala dami akaditena nawu itala dakulombela nyuza yejima. Hakwinza enu munadibalumuni dehi kwikala iyeŋu dawamakombi. 18Akulumpi jawatupristu niansoneki chachitiyiluwu, hiyakukeŋa hakumukisaŋena; muloŋa amutiyili woma, nanochu chahayaminuwu antu ejima kuleja kwindi.

19Hakufumaŋa muŋanda namelela hefuku hefuku.

20Chadiŋi nakupandakanawu budidi, hiyakumona owu mutondu wachikuyu wunomi dehi chau, kufumisha kunyiji. 21Petulu hakwanuka, hakumwila nindi, Eyi Rabi, tala mutondu wachikuyu washiŋa, wunomi dehi chau. 22Yesu hakuyakula nindi, Mukuhwelelenu Nzambi. 23Nukuyileja chalala nami neyi muntu wukwila mpidi iyi nindi, Tutulukaku wudinati mwijiya; mumuchima windi kutadika nehi, hakukuhwelela nindi ichi chanahoshiyi chikwila, wukuchitambula. 24Dichi nukuyileja nami, yuma yejima yimukulomba, yimukukeŋa, kuhwelelenu nenu munayitambuli dehi, mwakayitambula. 25Mafuku ejima chimukwimanaŋa nakulomba, neyi hadi mwinenu wudi nindi nansaŋu, mwanakenenu, kulonda tata yenu wudi mwiwulu ayanakeni nyiloŋa yenu nawa. 26Ilaŋa neyi enu mukubula kuyanakena akwenu, nitata yenu wudi mwiwulu hakuyanakena nyiloŋa yenuku.

27Hiyakwinza cheŋi kuYerusalema. Chadiŋi nakwendayi mutembeli, awakulumpi jawampristu niansoneki niakulumpi hiyakwinza kudi yena. 28Hiyakumwila nawu, Eyi welaŋa yumiyi nawantanyi? Indi nakwinki wantiwu wakwila yumiyi hinyi? 29Yesu hakuyila nindi, Nukuyihula chuma chimu muŋakuli, ninami nukuyileja wanta wunélaŋa nachu yumiyi. 30Chipapatishu chaYowanu chakwiwulu, tahindi chakudi antu? Ejakulenu. 31Hiyakudihujola muntu namukwawu nawu, Neyi tukwila netu chakwiwulu, wukutwila nindi, Indi dinu mwalekelelidi kumwitiya? 32Kwinza neyi tukwila netu chakudi antu—! Hiyakutiya nawa antu woma, muloŋa antu ejima elilaŋa nawu Yowanu chalala hikaprofwem. 33Hiyakumwakula Yesu nawu, Kwiji, etu kwiluka nehi. Yesu niyena hakuyila nindi, Ninami nawa hinukuyileja wanta wunelaŋa nachu yumiyuku.

Currently Selected:

Mareka 11: MW62

Highlight

Copy