Luka 8

1Chihanalehi chanti, Yesu hakuya nakuhitahita nimunyikala yamaneni nimunyikala yanyanya, hakuyishimwina nikuyitwela nsaŋu yawanta waNzambi yayiwahi, hamu nekumi nayedi, 2niambanda amakwawu okayi dehi ademoni, niyikatu; Mariya atenaŋawu nawu Mandaleni, mwafumini ademoni atanu nayedi; 3niYowana iŋoda Chuza kalama kaHerodi, niSuzana, ni akwawu amavulu adiŋi nakumukalakela namahetawu.

4Chikunapompi izaza dadeni, niantu amunyikala yamaneni ejima chanahwiluwu kudi yena, hakuyitila chishimu, 5nindi, Mukwakukuwa wayili nakukuwa mbutu yindi. Chakuwiliyi, yi kwawu yaholokeleli kunsa yanjila, hiyakuyidata nanyendu, hiyakuyidya kudi atujila ahaluzwizu. 6Yi kwawu yaholokeleli helola, chiyinabaluki hohenohu yuma nikuuma, muloŋa yabulili meji. 7Yi kwawu yaholokeleli munyiŋa, nyiŋa hiyikukulila hamu nambutu, hiyikuyijika. 8Yi kwawu yaholokeleli hamaseki amawahi, hiyikukula hiyikusoŋa, yadiŋi ibaŋu dimu hiyikwikala nkulakaji. Chanahoshiyi yumiyi hakubidika nindi, Yowu wukweti matu akutiya atiyi.

9Atumbanji twindi hiyakumwihula mwaya chishimu ichi. 10Yena hakuyila nindi, Enu anayiteji kwiluka nsaŋu jawanta waNzambi jajindawu, hakwila acheŋi akujitiyilaŋa muyishimu hohu; kulonda hela akumona, abuli kumona jiika, kutiya, akutiya kushinshikamu nehi. 11Dichi tiyenu mwaya chishimu ichi. Mbutu himaza aNzambi. 12Akunsa yanjila, wowu antu akwila chakuyitiyawu, diyabolu hakwinza nakuhukula mazu munyichima yawu, akenda kwitiya hiyakuhanda. 13Ahelola, wowu antu akwila chakuyitiyawu, hiyakutambula mazu namuzaŋalu; wena muji nehi, akwitiya kapinji kanti, chakamonawu yuma yakuyeseka, hiyakusenukamu. 14Yaholokeleli munyiŋa, wowu antu akwila chakutiyawu, hiyakudiyila kwawu; kwakama, nimaheta, nikutiya kuwaha nayuma yawumi wunu, hiyikuyijika, kusoŋa chalala nehi. 15Yahamaseki amawahi, wowu antu atiyaloŋa mazu namuchima wawu wawuwahi walumbuluka, hiyakuyikwata naŋovu, hiyakusoŋa nikutatakenamu chikupu.

16Muntu habutulaŋa inoŋu adisweka mwibaŋu hela muchaliluku, wadishaŋa hamesa kulonda antu akwijila mwitala akamoni to-o. 17Muloŋa hikwekala chuma chabutaŋawu chikubula kumwekana hatookaku; hela chuma chakujinda chikubula kutiyakanaku, chikwidika hatooka. 18Dichi babelenu chimukutiya; muloŋa muntu wukweti diyi akwinkawu; muntu wabula, akamutambula aka kanamoniyi nindi wudi naku.

19Kudi yena hikukwinza mama yindi nawana kwindi, hiyakukaŋanya kushika kudi yena naluntu iwadiŋuku. 20Hiyakumuleja nawu, Mama yeyi nawana kweyi anemani hanzi, anakukeŋi. 21Hakuyakula nindi, Mama yami nawana kwami wowawa akutiya mazu aNzambi hiyakwilamu.

22Wena mafuku owu, ifuku dimu hakwijila muwatu wumu, niyomweni niatumbanji twindi. Hakuyila nindi, Tuzambukenu kwishinadi dejiya; ashinjika niwatu. 23Chadiŋi nakwendawu yena aya ninamutulu; hejiya hihakukunka mpepela yasweja Ŋovu, watu hiwukuya nakwinzala meji, hivakukeŋa kufwa. 24Hiyakwinza nakumuhindwisha nawu, Mwanta, Mwanta, tunafwi! Hakuhinduka, hakuhoshola mpepela nimeji adiŋi nakubwankaŋila, amwena nizo-o, kuwunda nibe-te-te. 25Hakuyila nindi, Kukuhwelela kwenu kwokudihi? Atiya niwoma, hiyakudihayamina, hiyakudila wumu namukwawu nawu, Yeniwu akwovwahilawu kudi mpepela nimeji hinyi?

26Ashika nikwituŋa dawaGeraseni, domba mesu kuŋahliya. 27Chanafumiyi muwatu, nindi akanduki kwisaŋa, hikukumubulakana iyala wudi nakufuma mumukalowu, wazakuka dehi ademoni; halekeliyi kuvwala mahina hela kushakama mwitala halena dehi chacheni, chiŋa kushakama kumajamu hohu. 28Chanamumoniyi Yesu, hakukaluka, hakudinata kumesu indi, hakubidika naŋovu, nindi, Ni kweti nsaŋwinyi naneyi Yesu Mwana kaNzambi Mukwakubadika? Nalembi, bayi wunkabishaku. 29Muloŋa henohu wamwila dehi yenowu demoni wazonda nindi fumaku mudi muntu. Muloŋa wamukwatilaŋa kakavulu; wadiŋi muntu wakuhemba kudi akwawu hohu, wakukasa namaleŋi nituyanda twayikuŋu; chakukotolayi yena yumoyu, hiyakumupwapwila mumasaŋa kudi demoni. 30Yesu hakumwihula nindi, ijina deyi yeyinyi? Nindi, Yami Lejiyoni; muloŋa mudi yena mweŋila ademoni amavulu. 31Hiyakumulembelela nawu, Bayi wutuhaŋila mwikelaku. 32Kwenoku kwadiŋi izanvu dawaŋulu adiŋi nakudiila hampidi, hiyakumulembelela nawu ayiteji kwijila mudi aŋulu. Hakuyiteja. 33Ademoni afuma nimudi muntu, eŋila nimudi aŋulu; izanvu dawaŋulu danduka nikwanduka, hidikuya mwakunkumuka nankashi, nimwijiya chu-u, afwa nimumeji. 34Ayidiishilaŋa chanachimonuwu, hiyakutemuka, hiyakuya nakuleja antu adiŋi mumukala nimwituŋaodu. 35Hiyakuya nawu atali chuma chinamwekani; chanenzuwu kudi Yesu, hiyakuwana owu muntu munafumi ademoni, nashakami dehi kunyendu yaYesu, navwali chachiwahi, maanindi anamufuntili dehi; atiya niwoma. 36Antu achimweni hiyakuleja akwawu chanamukoleshuwu owu wazakukilaŋa ademoni. 37Antu adiŋi kumutamba wetuŋa dawaGeraseni ejima hiyakumwila nawu afumuku; muloŋa woma wunasweji dehi kuyikwata; yena hakwijila muwatu hakufunta cheŋi. 38Owu iyala munafumi ademoni, hakumulembelela nindi niyaloŋa neyi; ilaŋa yena hakumufuntisha, 39nindi, Funtaku kwitala deyi wuleji akwenu yuma yanakwililiyi Nzambi kutoha. Hakuya nakutiyakesha mumukala wejima yuma yamwilililiyi Yesu kutoha.

40Chafuntiliyi Yesu, izaza hidikumushikŋa chachiwahi, muloŋa wejima wawu adiŋi nakumutalila. 41Kutala hikukwinza iyala ijina dindi Jayirusa, nyuli yashikola, hakudinatila kunyendu yaYesu, hakumulembelela nindi ayi kwitala dindi; 42muloŋa wadiŋi namwanindi wamumbanda wumu hohu, wanyaka kafwampi ikumi nayiyedi, hakukeŋa kufwa. Hadiŋi nakuyayi, mazaza awantu hiyakujika kudi yena mbe.

43Mumbanda wumu wapwekelaŋa mashi nyaka ikumi nayiyedi, wamanisha dehi yuma yindi yejima kudi ayimbuki, kutwesha kumúuka nehi, 44hakwinza kunyima yaYesu, hakukunka kumukundulu wehina dindi; hohenohu mashi indi apwekelaŋa oma nichau. 45Yesu hakwihula nindi, Anankunki kudinyi? Chadikaliluwu antu ejima, Petulu nawakwawu adiŋuwu nawu hiyakwiia nawu, Mwanta, mazaza enda akushinjeka nikukuhumahuma. 46Yesu hakwila nindi, Hadi muntu nankunki; muloŋa neluka mudami munafumi Ŋovu. 47Owu mumbanda, chanamoniyi nakaŋanyi dehi kuswamana, hakwinza nakuzaala, hakudinata hamaseki kumesu indi, hakushimuna hatooka kumesu awantu ejima nsaŋu yamukunkililiyi, ninichi chanakoliyi dehi hohenohu. 48Yesu hakumwila nindi, Mwanami, kukuhwelela kweyi kunakukoleshi dehi; yaloŋa nakuwunda.

49Iku wuchidi kuhosha, kwitala danyuli hikukufuma muntu hakumuleja nindi, Mwaneyi nafwi dehi; bayi wumukabisha Nkuluŋaŋaku. 50Yesu chanachitiyiyi, hakumwakula nindi, Bayi wutiya womaku; kuminaku dakukuhwelela hohu, wukukola kwindi. 51Chanashikiyi kwitala, hetejeli kwipilamu namuntu wacheŋuku, chiŋa aPetulu naYowanu naYakoba, nitata yamwana namama yindi. 52Adiŋi nakumudila nikutumpa kudi antu ejima; yena hakuyila nindi, Bayi mudilaku; hanafuku, wudi namutulu. 53Hiyakumuseha chakumudiwula, muloŋa amumweni nafwi chikupu.

54Yena hakumukwata kuchikasa, hakumutambi ka nindi, Eyi mwana, nyamukaku. 55Spiritu yindi yifunta nicheŋi, yohinduka nihohenohu; hakuyila nindi, Mwinkenu yakudya. 56Anvwali jindi hiyakuhayama nankashi; hakuyileja naŋovu nindi, Bayi muleja muntu chumichuku.

Currently Selected:

Luka 8: MW62

Highlight

Copy