Luka 3
3
1Chanashakamiyi Kesari Tiberusi muwanta nyaka ikumi nayitanu, hadiŋiyi Pontusi Pilatu nguvulu yamuYudeya, hadiŋiyi Herodi mwanta wikuŋalihya, mana kwindi Fwilipu mwanta wakumpata yakuItureya naTarakonita, niLisaniyasi mwanta wakuAbileni; 2hadiŋuwu aAnasi naKayafwasi atupristu amaneni, izu daNzambi hidikwinza kudi mwana kaZakariya, Yowanu, hadiŋiyi mwisaŋa. 3Yena hakwinza mumatuŋa ejima adiŋi kwakwihi naYodana, nakushimuna kupapatisha kwakubalumuka mumuchima kulonda kwanakena antu nyiloŋa; 4neyi chanasonekuwu mumukanda wamazu akaprofwetu Isaya nawu, Mbila yamuntu wukubidika mwisaŋa nindi, Loŋeshenu mwakendelayi Yehova, ololenu njila jindi jatulolu. 5Akashikili yinekineki yejima, akashikumuni mapidi ejima ninyikandu yejima; akololi haheŋa, akalambishi njila jamankulokela. 6Antu ejima akamoni chakayamwinawu kudi Nzambi.
7Dichi yena hakuyila mazaza ayili kudi yena nakuyipapatisha nindi, Enu anyana katubandayula, mwayikonkomweneni kutemuka kuzuwa kwakenza hinyi? 8Ilenu yuma yatelela antu anabalumuki munyichima. Bayi mutachika kuhosha munyichima yenu nenu tukweti nkakulula yetu Abarahamaku. Tiyenu niyileji, nami Nzambi natweshi kutetula anyana kaAbarahama mumalolawa. 9Katataka anashi dehi chizembi kumuji wanyitondu; dichi nyitondu yejima yikubula kusoŋa nyikabu yayiwahi akayitemamu, akayinatila mukesi.
10Mazaza hiyakumwihula nawu, Indi dinu chiŋa twila ŋahi? 11Hakuyakula nindi, Muntu wukweti yi kovwelu yiyedi amwinkuhu mukwawu nabuli, niwukweti yakudya eli mwomumu nawa. 12Ansonkeshi hiyakwinza kudi yena nawu ayipapatishi, hiyakumwila nawu, Eyi nkuluŋaŋa, etu tukwila ŋahi? 13Hakuyila nindi, Bayi mudyaloŋa yanyilami nakubadisha mwayilejawuku. 14Mashidika niwena nawa hiyakumwihula nawu, Etu nawa tukwila ŋahi? Hakuyila nindi, Bayi mukabisha muntuku, hela kutwambila muntu; kuminenu dakutiya kuwaha nawufwetu wenu.
15Chadiŋi nakujinokawu antu, antu ejima hiyakutoŋojoka munyichima yawu nawu kwiji diyi Kristu. 16Yowanu hakuyakula wejima wawu nindi, Chalala ami nayipapatishaŋa mumeji, ilaŋa kudi nakwinza wambadika Ŋovu, mwonji wankwabilu jindi ami kutela kuwusubula nehi; diyi wakayipapatisha mudi Spiritu Wajila nakesi. 17Muchikasa chindi mudi lwalu lwakutookesha nachu mwitala dindi dakuhulila; wakapompesheli tidiku munkalaŋa yindi, hakwila mafulu wakayocha mukesi kakajimaŋa.
18Dichi hakuyishimwina antu nsaŋu yayiwahi, nikuyilejaleja mazu amakwawu amavulu. 19Ilaŋa Mwanta Herodi, chanamukonkololuwu kudi Yowanu nansaŋu yaŋodamana kwindi Herodiya, niyuma yi kwawu yatama yelilaŋayi Herodi yejima, 20hakulunjikaku nichuma chikwawu chakumusha Yowanu mukaleya.
21Chelili namanishi dehi kupapatisha antu ejima to-o, niYesu anamupapatishi dehi, yena Yesu hakulomba, iwulu hidikubaluka; 22Spiritu Wajila hakuzelumukila hadi yena namujimba wudi neyi katela; mwiwulu himukufuma izu nawu, Yeyi Mwanami nakeŋa, natiyaloŋa kuwaha nankashi mudeyi.
23Henohu Yesu nashiki dehi kafwampi munyaka makumi asatu, hiyakumutoŋojoka nawu mwana kaYosefu; ankakulula jindi adiŋi iwu Heli, 24iwu Matata, iwu Levi, iwu Meliki, iwu Yanayi, iwu Yosefu, 25iwu Matatiyasi, iwu Amosa, iwu Nahumi, iwu Eseli, iwu Naŋayi, 26iwu Mayata, iwu Matatiyasi, iwu Semeni, iwu Yoseki, iwu Yoda, 27iwu Yowanani, iwu Resa, iwu Zerubabeli, iwu Sheyaleteli, iwu Neri, 28iwu Meliki, iwu Adi, iwu Kosama, iwu Elimadama, iwu Eri, 29iwu Yesu, iwu Eliyezeri, iwu Yorimi, iwu Matata, iwu Levi, 30iwu Simeyona, iwu Yudasi, iwu Yosefu, iwu Yonama, iwu Eliyakimi, 31iwu Meleya, iwu Mena, iwu Matata, iwu Natani, iwu Davidi, 32iwu Jesi, iwu Obedi, iwu Bowazi, iwu Salemoni, iwu Nashoni, 33iwu Aminadabi, iwu Arama, iwu Hezeroni, iwu Perezi, iwu Yuda, 34iwu Yakoba, iwu Isaka, iwu Abarahama, iwu Tera, iwu Nahori, 35iwu Seruŋa, iwu Rewu, iwu Peleka, iwu Eberi, iwu Shela,
36iwu Kanani, iwu Arafwasadi, iwu Shemi, iwu Nowa, iwu Lameki,
37iwu Metusela, iwu Enoki, iwu Yareda, iwu Mahaleli, iwu Kanani,
38iwu Enosi, iwu Seti, iwu Adama, mwana ka Nzambi.
Currently Selected:
Luka 3: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
