Luka 12

1Henohu hadiŋi nakwilawu ochu, kupompa nimakombakaji awantu akwila hiyakudidata nikudidata; hakutachika kuleja atumbanji twindi chakusambila, nindi, Babelenu iluŋi dawaFwarisi, wowu wufwikiji. 2Muloŋa hikwekala chuma chabutaŋawu chibula kumwekana hatookaku; hela chajindaŋawu chibula kutiyakanaku. 3Dichi yuma yejima yimwakahoshela mumwidima yakatiyakana hamwaana; niyimwakashawutila mwitu namutupeka twamukachi, akayibidika hatuwumbu.

4Enu amabwambu jami nukuyileja nami, bayi mutiya woma wena ajahaŋa mujimbaku, akuminaŋa mwomwenomu hohu, kutwesha kwila chuma chikwawu nehi. 5Nukuyilejaŋahu dehi imukutiya woma; tiyenu woma yena wukweti Ŋovu jakwila ajaha anatila muntu mukaluŋa kachinana; eŋa, nukuyileja nami mutiyenu woma. 6Tujila twanyanya tutanu hiyatulandaŋa natumali tuyeduku? Hela chochu, hikwekala hela kamu kavulamenaŋawu kudi Nzambuku. 7Hela nsuki jenu jajeni ajichinda dehi jejima. Dichi bayi mutiyaloŋa womaku, kulema kwenu kwabadika kulema kwatujila twatuvulu.

8Nukuyileja nami antu ejima akuŋiteja kumesu awantu, ni mwana kamuntu niyena wakayiteja kumesu awaŋelu jaNzambi. 9Muntu wukudikala kumesu awantu nindi haŋilukaku, niyena nawa akadikalayi kumesu awaŋelu jaNzambi. 10Muntu wukuhosha izu dakutena Mwana kamuntu chatama, akamwanakenadu; hakwila wukuhosha Spiritu Wajila chatama hiyakamwanakenaku. 11Chakayitwalawu nakuyimika mumashikola kumesu awanyuli nawanyanta, bayi mwakaakama mwakwakwila hela mwakuhoshelaku. 12Spiritu Wajila wakayileja chatela kuhosha henohu.

13Muntu wahezaza dawantu wumu hakumwila nindi, Eyi Nkulupaŋa, mwili mana kwami twambuli nindi wuswana wetu. 14Yena hakumwila nindi, Eyi iyala, ananyinki kudinyi mudimu wakuyisompesha, hela wakuyipaŋila? 15Hakuyila nindi, Babalenu, dihembenu muleki lwisu lwejima, muloŋa wumi wamuntu hiwekalaŋa kukuvula kwamahetinduku. 16Hakuyitila chishimu nindi, Maha amukwakuheta wumu aswejeli kusoŋa nankashi; 17hakuhosha mumuchima windi nindi, Nukwila ŋahi chinabuli kwakuswekela kudya kwami? 18Hakwila nindi, Nukusanda nkalaŋa jami, nituŋa jamaneni, nakaswekumu tidiku yami yejima nimahetami. 19Nili wumi wami nami, Eyi wumi wami, wunalumbiki dehi maheteyi amavulu anyaka yayivulu; nookaku kweyi; dyaloŋa, nwaŋa, luŋaŋa. 20Nzambi hakumwila nindi, Eyi chisupi, anakeŋi kutambula wumi weyi wufuku owu, indi iyi yuma yiwunaloŋeshi yikushala nanyi? 21Chochakekala muntu wadilumbikilaŋa maheta amavulu, nindi indi yomweni hohu, hekalaŋa namaheta kumesu aNzambuku.

22Hakuyila atumbanji twindi nindi, Nukuyileja nami lekenu kwakama wumi wenu nenu tukudyadi? hela kwakama nyijimba yenu nenu tukuvwaladi? 23Wumi wabadika yakudya, mujimba wabadika yakuvwala. 24Toŋojokenu ayipuŋu, hiyakuwaŋaku, hiyamunaŋaku; hiyaheta hela nkalaŋa hela itala dakuswekelaku; ayidiishaŋa kudi Nzambi hohu. Komana kulema kwenwenu hikwabadika nankashi kwatujilaku? 25Mwinenwinyi wukwila akame-e, anuŋa kuchiminu chindi chikunku chakweseka munkotweli yachikasa? 26Chuma chantesha muchikaŋanya kuchila, indi mwaakaminaŋadi yuma yinashaluku? 27Tonojokenu wuluya chiwakulaŋa; hiwakabakanaŋaku, hiwashintaŋaku; nukuyileja nami mwalemeneniyi Solomoni mwejima, havweli chakweseka nawuluyiwu wumuku. 28Nzambi yovwika matahu amwiha chochichi, akwila lelu adi kwoku, kumadiki hiyakuyinatila mukesi, abuli kubadika kuvwikenu, enu mukweti kukuhwelela kwantesha? 29Bayi musha muchima kuyakudya hela kuyakunwaku; bayi mululutaŋaku. 30Muloŋa yuma yejimiyi diyi yakeŋaŋa nyuza yamunu mwishina. Tata yenu neluki chimunakaankili yumiyi. 31Dichi shenu muchima kuwanta windi, iyi yuma yejimiyi akayishilaku.

32Enu kamukanka kawanyikoku kantesha, bayi mutiyaloŋa womaku, Tata yenu watiyaloŋa kuwaha kuyinka wanta. 33Landishenu yimudi nayu muyinki atuzweŋi; namutuŋi yikwama yenu yabulaŋa kukula, maheta amwiwulu hiyanoŋaŋaku, mwiwulu himwashikaŋa ikombi nakwiyaku, hela kabubu kakukisaŋana. 34Muloŋa kukwikala mahetenu diku kukwikala ninyichima yenu nawa.

35Pimpilenu mahinenu, manoŋu enu abutukaŋa. Enu aweni ikalenu neyi antu adi nakutalila mwanta wawu wukufuma kumawija kwayiliyi, kulonda hakenzayi nakudondomwena akamwenzulwili hohenohu. 36Anduŋu akawanawu kudi nkaka yawu adi nakumutalila anakooleki; 37nukuyileja chalala nami nkaka yawu wakavwala chachiwahi, wakayishakamisha nakudya, wakenza nakuyikalakela. 38Neyi wakenza hachilu chamuchiyedi hela chamuchisatu, kuyiwana chochichi, anakooleki. 39Tiyenu mwiluki, mwini itala neyi welukili mpinji yikwinza ikombi, mutenowu watoneni, hadi kwiteja kumupundila itala dinduku. 40Dichi ninenu nawa babalenu, muloŋa mpinji yimukubula kutoŋojoka, diyi yakenzayi Mwana kamuntu.

41Petulu hakumwila nindi, Mwanta, ichi chishimu wunatili etu hohu, tahindi munatili niantu ejima? 42Mwanta nindi, Kalama washinshika wukweti maana yowinyi, akushilawu kudi mwanta windi mudimu wakutala mukala windi, enkaŋa aŋamba jindi yakudya yawu hayinkelaŋawu?

43Nduŋu akawanawu kudi nkaka nindi wudi nakwila mwenimu nakooleki.

44Nukuyileja chalala nami, wakamukunjika mudimu wakuhemba yuma yahetayi yejima. 45Hakwila owu nduŋu, neyi wakahosha mumuchima windi nindi, Nkaka yami wuchidi kulaba; hakutachika kweta akwawu anduŋu amayala nawambanda, hakudya, hakunwa, hakusheta, 46mwanta wanowu nduŋu hakumukasumwisha mwifuku dákubula kumutalilayi, hela mumpinji yákubula kwilukayi; wakamuvupola nankashi, hakumusha kwijiku dawakadi kwitiya. 47Nduŋu welukili mwakeŋa a kwilayi mwanta windi, yena kuloŋeshamu nehi, hela kwilamu nehi, akamweta yikoti yayivulu; 48hakwila muntu wabulili kwiluka, neyi neli yuma yatela kumwetela, akamweta yikoti yanti. Muntu anenkuwu yayivulu, akakeŋelaku nawa yayivulu; muntu anashiluwu yayivulu, akehwilaku nawa yasweja kuvula.

49Ami nenzi nakunatila kesi hanu hamaseki, nakeŋi nami kabutuki; indi neyi kanabutuki dehi, ami nakela ŋahi? 50Nidi nachipapatishu chakampapatishawu nachu; chinankatishi kumuchima nankashi nami chimani. 51Munatoŋojoki nenu ami nenzi nakuleta kumwena hanu hamaseki, tahindi? Nukuyileja nami, ami hinenzi nakuleta kumwenaku, nenzi nakwambola. 52Muloŋa kufumisha hanu, mwitala mudi antu atanu, asatu akaambuka kudi akwawu ayedi, ayedi akaambuka kudi asatu. 53Tata yamuntu wakadambula namwanindi weyala, mwana weyala wakadambula natata yindi; mama yamuntu wakadambula namwanindi wamumbanda mwana wamumbanda wakadambula namama yindi; mawenu yamuntu wakadambula namuku windi wamumbanda, muku wamumbanda wakadambula namawenu yindi.

54Hakuyila mazaza awantu nindi, Mwelaŋa chimukumona ivu dikusela kumuji ka, himukuhosha nenu, Kukunoka kuvula; chalala kwaamu mwomwenomu. 55Chimukumona mpepela yikukunka nakufmna kukabeta kakuchidiilu, himukuhosha nenu, Kukuholoka nkanza yasweja iyena; chalala kwaamu mwomwenomu. 56Enu anfwikiji! Muneluki kulumbulula nsaŋu jayuma yahamaseki niyamuluzwizu, indi munakaŋenyidi kulumbulula mukuya nsaŋu jamakonu? 57Enu aweni mwakaŋenyaloŋadi kwiluka mukuya yuma yaloŋa? 58Neyiwudi nakuya kudi mukwakusompesha namuntu nakwinki muloŋa, esekaku kumanisha muloŋa hiwuchidi nindi munjila; mukunkulwayi wukukutwala kudi mukwakusompesha, mukwakusompesha hakukuhana kudi mukwakaleya, niyena hakukusha mukaleya. 59Nukukuleja nami hiwamba kafuma mwokuku, kufumamu chiŋa wunafuti muloŋa wejima, nikadali kanyanya kakushalaku nehi.

Currently Selected:

Luka 12: MW62

Highlight

Copy