Joani 8

1Ayili wejima wawu, iwu kwitala dindi, iwu kwitala dindi. Ilaŋa Yesu wayili kumpidi yaOliveta.

2Hakwijila cheŋi mutembeli budidi yayeni; antu ejima hiyakwinza kudi yena, yena hakushakama nakuyileja. 3Ansoneki nawaFwarisi hiyakumuletela mumbanda akwatawu dehi nakwila wuvumbi. 4Chanamushuwu mukachi hiyakumwila nawu, Eyi Nkuluŋaŋa, mumbandiwu anamukwati nakwila wuvumbi, anamushintakeshi wakushintakesha. 5Kunshimbi jaMosi atuleja nawu muntu wudi ichi chiŋa kumwasa malola; indi eyi neyi tumwili ŋahi? 6Chahosheluwu chenochu alondeli kumweseka, kulonda amoni hakumwinkela muloŋa. Ilaŋa Yesu hakubandama, hakusoneka namunu windi hamaseki. 7Chanamwihuluwu ihule-e, hakubanduka, hakuyila nindi, Muntu nabuli nshidi hakachi kenu asambili kunona ilola amwasi. 8Hakubandama cheŋi nakusoneka namunu windi hamaseki. 9Wena chanachitiyuwu, hiyakwidikamu, wumu, wumu, kutachikila kudi mukulumpi, ndo nikudi kansi. Yesu yoshala nikanka windi, namumbanda saŋa adiyi mukachi. 10Yesu hakubanduka, hakumwihula nindi, Eyi mumbanda, antu anakwinki muloŋa adi kudihi? Kwosi muntu nakuhishuku? 11Mumbanda nindi, Kwosi Mwanta. Yesu nindi, Hela ami hinakuhishuku; yaloŋa kweyi, kufumisha kulelu bayi wufuntilamu cheŋuku.

12Dichi Yesu hakuhosha cheŋi nawena, nindi, Ami yami chejeji champata yamunu mwishina, muntu wukunlondelami hakendela mumwidimaku, ilaŋa wakekala nachejeji chawumi. 13Dichi aFwarisi hiyakumwila nawu, Wadishimunaŋa eyi aweni; wunsahu weyi hiwalalaku. 14Yesu hakuyakula nindi, Hela neyi nadishimunaŋa ami aweni, wunsahu wami walala; muloŋa neluki kunafumini nikunukuya, ilaŋa enu himweluka kunafumini hela kunukuyaku. 15Enu mwasompeshaŋa mwasompeshaŋawu antu. Ami hinasompeshaŋa muntuku. 16Chalala, hela neyi nasompeshana, kusompesha kwami kwalala; Muloŋa hinekala kanka wamuku, nidi naTata wantemesheli. 17Chalala, hela munshimbi jenu anasoneki nawu, Wunsahu wawantu ayedi walala. 18Ami nadishimunaŋa ami aweni, niTata wantemesheli hakunshimuna wunsahu. 19Dichi hiyakumwihula nawu, Tata yeyi wekala kudihi? Yesu hakwakula nindi, Hela ami, hela Tata yami himwatwilukaku; neyi mwaŋilukami mwadi kwiluka niTata yami. 20Mazu awa wayihosheleli mwitala dakuswekela mali, chadiŋi nakuyilejayi mutembeli. Hi kwadiŋi muntu wamukwatiluku, muloŋa henohu mpinji yindi kanda yishiki.

21Dichi hakuyila cheŋi nindi, Ami hinukufumahu, enu mwakankeŋakeŋa, mwakafwa nanshidi yenu. Kunukuyami himukutwesha kushika kwoku. 22AYudeya hiyakwila nawu, Chaneliyi nindi, Kunukuyami himukutwesha kushika kwoku, keŋa adŋahi, tahindi? 23Yena hakuyila nindi, Enu mudi antu ampata yamunu mwishina, ami nidi wamwiwulu; enu mudi ampata yinu, ami hinidi wampata yinuku. 24Dichi chinayili nami, Mwakafwa nanyiloŋa yenu. Muloŋa neyi mukubula kuŋitiya nenu diyi ami, mwakafwa nanyiloŋa yenu. 25Dichi hiyakumwihula nawu, Ochu yeyinyi? Yesu hakuyila nindi, Nayileja dehi kufumisha kutachi. 26Nidi nayuma yayivulu yakuhosha nakusompesha hansaŋu yenu; hakwila yena wantemesheli walala, ami nahoshaŋa nawantu ampata yamunu mwishina mazu inatiyili kudi yena. 27Wena hiyelukili nawu nateni Tata yinduku. 28Dichi Yesu hakuyila nindi, Chimwamba kanyamuna Mwana kamuntu kwiwulu, henohu dihu mwamba kelukila nenu diyi ami; nenu hinelaŋa chuma chakanka wamuku, ilaŋa nahoshaŋa mazu awa mwomwanlejeluwu kudi Tata. 29Yena wantemesheli nekala hamu nindi, hananshiyi kanka wamuku; muloŋa nelaŋa yuma yamutiyishaŋa kuwaha mafuku ejima. 30Chadiŋi nakuhoshayi ochu antu amavulu amwitiya nikumwitiya.

31Yesu hakuhosha nawaYudeya amwitiyili nindi, Neyi mukushakama mumazu ami, mukwi kala atumbanji twami chalala; 32mukwiluka nsaŋu yalala, ninsaŋu yalala yikuyifumisha muwuduŋu. 33Wena hiyakumwakula nawu, Etu anyana kaAbarahama, kanda tushakamaŋahu dehi muwuduŋuku, indi eyi wunahoshi ŋahi neyi, Akuyifumisha muwuduŋu?

34Yesu hakuyakula nindi, Chalala chalala, nukuvileja nami, antu ejima avulumunaŋa, diwu anduŋu janshidi. 35Nduŋu hashakamaŋa mwitala haya nyakaku; mwana washakamaŋa haya nyaka. 36Dichi dinu, neyi Mwana wukuyifumisha muwuduŋu mukufumamu chalala. 37Neluki nami enu mudi anyana kaAbarahama; hela chochu, enu mwafwilaŋa kunjaha, muloŋa himukweti mwakutambwila mazu amuku. 38Ami nahoshaŋa yinamweni kudi Tata yami, enu mwelaŋa yuma yimwatiyili kudi tata yenu.

39Wena hiyakumwakula nawu, Tata yetu Abarahama. Yesu hakuyila nindi, Neyi mwadiŋi anyana kaAbarahama, mutenowu mwadi kwila nyidimu yaAbarahama. 40Ilaŋa dinu enu mwafwilaŋa kunjaha, ami muntu nayileja dehi mwalala munatiyili kudi Nzambi; hidichi chelili Abarahamaku. 41Enu mwelaŋa nyidimu yatata yenu. Hiyakumwila nawu, Hitudi anyana amuchiputaku, tukweti tata yetu wumu, yowu Nzambi. 42Yesu hakuyila nindi, Neyi Nzambi hitata yenu mwadi kukeŋami, muloŋa ami nafumini kudi Nzambi, diku nenjili; ami hinadinjila ami awenuku, yena diyi wantemesheli. 43Munakaŋenyidi kwiluka munahoshaŋa? Chinafumi hákubula kutiya mazu ami. 44Enu tata yenu diyabolu; mwakeŋa aŋa kwila mwafwilaŋayi tata yenu. Yena wadiŋi mbanji kufumisha kutachi; yena hemanaŋa munsaŋu yalalaku, muloŋa himwekala nsaŋu yalala mudi yenaku. Chahoshaŋayi yakutwamba wahoshaŋa yindi yomweni; yena hintwambi, hitata yachu. 45Enu mwabulaŋa kuŋitiya muloŋa nahoshaŋ: nsaŋu yalala. 46Mwinenwinyi wukunkonkolola nindi navulumuni Nzambi? Neyi nahoshaŋa nsaŋu yalala mwalekelaŋadi kuŋitiya? 47Muntu waNzambi watiyaloŋa mazu aNzambi. Chimunabuli kwikala antu aNzambi, dihu lianafumi kubula kutiya mazu indi.

48AYudeya hiyakwakula nawu, Chitwakutenaŋa netu eyi wukaSamariya wudi nademoni, hitwakutenaŋa mwalalaku? 49Kuchinka Yesu nindi, Hinikweti demonuku; ami nalemeshaŋa Tata yami, enu mwansawulaŋa. 50Ilaŋa hinakeŋi kudilemesha ami awenuku; wakeŋa aŋa kunlemesha yowu mukwakusompesha. 51Chalala chalala, nukuyileja nami, muntu wahembaŋa mazu ami hamba kamona kufwaku. 52AYudeya hiyakumwila nawu, Ichi dinu tuneluki netu wudi nademoni. Abarahama wafwa dehi, niatuprofwetu nawa, hakwila eyi hiwukwila neyi, Muntu wahembaŋa mazu ami hamba katompa kufwaku. 53Eyi wunabadiki tata yetu Abarahama niatuprofwetu afwili, tahindi? Wudi nakuditena neyi yeyinyi? 54Yesu hakwakula nindi, Neyi nukudilemesha ami aweni, kulema kwami kwamukunkulwayi. Tata yami diyi wanlemeshaŋa, iwu mwatenaŋa nenu Nzambi yenu. 55Enu himunamwilukuku, ilaŋa ami namwiluka. Neyi nukwila nami hinamwilukaku, nukwi kala ntwambi neyi enu. Ilaŋa namwiluka, nahembaŋa mazu indi. 56Tata yenu Abarahama waluŋili chamweniyi ifuku dami; chadimweniyi hakuzaŋalala. 57Dichi aYudeya hiyakumwila nawu, Kanda wushiki munyaka makumi atanu, wunamoni dehi niAbarahama? 58Yesu hakuyila nindi, Chalala chalala, nukuyileja nami, hadiŋi Abarahama kanda avwaliki, ami nidi hohu. 59Dichi hiyakunona malola nawu amwasi; Ilaŋa Yesu hakubatama, edika nimutembeli.

Currently Selected:

Joani 8: MW62

Highlight

Copy