Joani 6

1Kulondela hayumiyi Yesu hakufumaku, hakuya kwishinadi di kwawu dejiya daŊaliliya dodaTiberasi. 2Hikukumulondela izaza deneni dawantu muloŋa anamoni dehi yinjikijilu yelililiyi akata. 3Yesu hakukanduka mpidi, hakushakama kwenoku nawatumbanji twindi. 4Henohu paseka, chawija chawaYudeya, chashika dehi kwakwihi. 5Dichi Yesu hakufumbula mesu, hakumona antu amavulu adi nakwinza kudi yena, hakumwila Fwilipu nindi, Kudya tukupawila kudihi kulonda antu awa adiyi? 6Chenochu wachihosheli nindi amutompi nachu; muloŋa yomweni neluki chakukeŋa kwilayi. 7Fwilipu hakumwakula nindi, Yakudya yakulanda namali makulakaji ayedi kulonda antu ejima atambuli kanti kanti, hiyikuwaninaku. 8Kambanji kindi wumu, Anderi mana kwaShimona Petulu, 9hakumwila nindi, Kunu kudi kansi wukweti mankendi abali atanu, nitunyisaŋi tuyedi; indi yeniyi antu amavulu chishi ka hichi akuyiwanina? 10Yesu hakwila nindi, Yishakamishenu antu. Henohu hadiŋi matahu amavulu. Amayala ashakamini; kuyichinda ashikili neyi kwiji makombakaji atanu. 11Yesu hakutambula owu mankendi; chanasakililiyi, hakuyipaŋila antu anashakami; ninyisaŋi nawa mwomumu, mwonsu mwakeŋa eluwu. 12Chanekutuwu, hakuyileja atumbanji twindi nindi, Nonenu yibalu yinashaluhu kulonda tubuli kuyikisaŋana. 13Ayinona nikuyinona, hiyakwinzesha mabaŋu ikumi nayedi nayibalu yamankendi abali atanu yashiyiluwu antu heliluwu anadyi dehi. 14Dichi antu chanamonuwu chinjikijilu cheliliyi, hiyakwila nawu, Chalala yeniwu diyi kaprofwetu elaŋawu nawu wakenza mumpata yamunu mwishina.

15Yesu chanamoniyi antu hiyakukeŋa kwinza nakumukwata naŋovu amudiishi wanta, hakuwombolokela kumpidi kwakanka windi.

16Chikuneli dehi melela atumbanji twindi hiyakukunkumukila kwijiya, eŋila nimuwatu. 17Hiyakuzambuka hejiya, nawu ayi kuKaperinawu. Henohu kuneli dehi wufuku, Yesu niyena wuchidi kanda enzi kudi wena. 18Ŋiya hidikutachika kwila mankanda amaneni, muloŋa wampepela yeneni yadiŋi nakukunka. 19Cheliluwu wena anavuwi dehi kilometa jiwana indi kwiji jitanu, hiyakumona Yesu wudi nakwenda hewulu dameji, wudi nakuswila kwakwihi nawatu. Afwa nimutentu. 20Yena hakuyila nindi, Yami aweni, bayi mutiyawomaku. 21Atiya nikuwaha kumwiŋija muwatu; hohenohu watu wushika nikuchikumu kwadiŋi nakuyawu.

22Chikunachi, izaza dasheli kwishinadi dejiya amona nawu kwadiŋi watu wumu hohu, nawu Yesu heŋila muwatu owu hamu nawatumbanji twinduku, afumakukanka wawu. 23Ilaŋa kuTiberasi hikukufuma tumaatu twacheŋi, hitukushika kwakwihi nakwadiilawu mankendi, hasakililayi Mwanta. 24Dichi izaza dawantu chabulili kumonawu Yesu, hela atumbanji twindi, wena hiyakwijila namutumaatu otu, hiyakuya nakumukeŋakeŋa Yesu kuKaperinawu.

25Chanamuwanuwu kwishinadi dejiya hiyakumwila nawu, Eyi Rabi, wenza kunu ifukwinyi? 26Yesu hakuyakula nindi, Chalala chalala, nukuyileja nami, chimunankeŋakeŋi hichinafumi hakumona yinjikijiluku, chinafumi hakwikuta mankendi mwadya. 27Bayi mukalakelaŋa yakudya yanoŋaŋaku, chiŋa yakudya yashikaŋa nikuwumi wahaya nyaka yakuyinkayi Mwana kamuntu, diyi anafunduwu mufunda kudi Tata Nzambi. 28Hiyakumwihula nawu, chiŋa twili ŋahi kulonda tukalakalaŋa nyidimu yaNzambi? 29Yesu hakwakula nindi, Mudimu wakumukalakela Nzambi yowu kwitiya yena atemesheliyi. 30Dichi wena hiyakumwihula nawu, Wukwila chinjikijilwinyi tuchimoni, tukwitiyi? Wakalakalaŋadi? 31Ankakulula jetu adiilaŋa manina mwisaŋa, mwomwanasonekuwu munyikanda yajila nawu, Wayinkeli yakudya yakufuma mwiwulu, adiyi. 32Kuchinka Yesu nindi, Chalala chalala, nukuyileja nami, Mosi hidiyi wayinkeli yakudya yakufuma mwiwuluku. Tata yami diyi wayinkaŋa a yakudya yalala yakufuma mwiwulu. 33Muloŋa yakudya yaNzambi yowu wasulukili mwiwulu, wahandishaŋa ntu ampata yamunu mwishina. 34Hiyakumwila nawu, Mwanta, atwinki yakudya oyu mafuku ejima.

35Yesu hakuyila nindi, Ami yami nshima yawumi; muntu wukwinza kudami hakutiya cheŋi nzalaku, muntu wukunkuhwelela hamba katiya cheŋi mpwilaku. 36Ilaŋa mi nayileji dehi nami, munanmoni dehi, enu kwitiya nehi. 37Ejima akunyinkayi Tata diwu akwinza kudami; muntu wukwinza kudami, ami hinakamúumbaku. 38Ichi chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli. 39Muchima wayena wantemesheli, nakeŋi yuma yejima yananvinkiyi nibuli kujimbeshahu hela chimu, chiŋa nakachisapula hefuku dakukuminina. 40Muloŋa muchima waTata yami, nakeŋi antu ejima atalaŋa Mwana amwitiyaloŋa chakukuhwelela, muntu himuntu, amoni wumi wahaya nyaka, ninami nakamusaŋula hefuku dakukuminina.

41AYudeya hiyakumutobela nanochu cheliliyi nindi, Yami nshima yasulukili mwiwulu. 42Hiyakwila nawu, Yeniwu hidiyi Yesu, mwana kaYosefuku? Tata yindi namama yindi twayiluka. Indi yena welaŋa ŋahi nindi, Ami nasulukili mwiwulu? 43Yesu hakuyakula nindi, Bayi mutobapaku. 44Kwosi muntu natweshi kwinza kudami chakadi kumukoka kudi Tata wantemesheluku, ninami nakamusaŋula hefuku dakukuminina. 45Anasoneki munyikanda yawatuprofwetu nawu, Antu ejima akayileja maana kudi Nzambi. Antu ejima anatiyi kudi Tata, anashinshiki, diwu akwinza kudami. 46Hikwekala muntu wamonahu dehi Tataku, chiŋa iwu wafumini kudi Nzambi, diyi namoni Tata. 47Chalala chalala, nukuyileja nami, muntu wukwitiya chakukuhwelela wukweti wumi wahaya nyaka. 48Ami yami nshima yawumi. 49Ankakulula jenu adiili manina mwisaŋa; afwili dehi. 50Nshima yakudyayi muntu abuli kufwa, diyi yasulukili mwiwulu. 51Ami yami nshima yayumi yasulukili mwiwulu. Neyi muntu wukudya kunshimiyi wakahandaŋa haya nyaka. Eŋa, nshima yinakahana kulonda antu ampata yamunu mwishina ahandi, diyi musunyi wami.

52AYudeya hiyakutadika ntadi mukachi kawu, nawu, Muntu iwu wukutwesha kutwinka musunyi windi ŋahi, mwaka tuwidyi? 53Dichi Yesu hakuyila nindi, Chalala chalala, nukuyileja nami, neyi mukubula kudya musunyi waMwana kamuntu, mubula kunwa nimashi indi, himukwikala nawumi mudenu awenuku. 54Muntu wadyaloŋa musunyi wami, wanwaŋa nimashi ami, diyi wukweti wumi wahaya nyaka; ami nakamusaŋula hefuku dakukuminina. 55Muloŋa musunyi wami hikudya kwalala, mashi ami hikunwa kwalala. 56Muntu wadyaloŋa musunyi wami, wanwaŋa nimashi ami, diyi washakamaŋa mudami, ninami mudi yena. 57Chantemesheliyi Tata wamumi, ninami chinukuhandila kudi Tata, dichi chakahandaŋa nimuntu waŋudyaloŋa. 58Diyi yakudya yasulukili mwiwulu; hiyidi neyi yadiili ankakululaku, niwena afwa dehi; muntu wukudya yakudya iyi wakahanda haya nyaka. 59Mazu awa hakuyihoshela mushikola chadiŋi nakulejayi antu kuKaperinawu.

60Chachitiyiluwu atumbanji twindi amavulu hiyakwila nawu, Mazu awa akala; wukutwesha kutiyamu hinyi? 61Yesu welukili mumuchima windi chadiŋi nakutobawu atumbanji hachumichi; hakuyila nindi, Munamoni chumichi kukala, tahindi? 62Indi neyi mwakamona Mwana kamuntu hakukandama kwadiŋilaŋayi? 63Spiritu diyi wahandishaŋa, kumujimba hiwukumwenaku chumaku. Mazu awa nahoshi nanenu, diyi spiritu, diwu wumi. 64Ilaŋa hadenu hadi amu abula kwitiya. Muloŋa Yesu welukili kufumisha kutachi, ninawa abulili kwitiya, niwamba kamufukeja. 65Yena nindi, Dichi nayileji nami, kwosi muntu wukutwesha kwinza kudamuku, chiŋa amwinkachu kudi Tata.

66Henohu atumbanji twindi amakwawu hiyakufuntamu, kwenda nawa cheŋi nindi nehi. 67Dichi Yesu hakwihula ikumi nayedi nindi, Ninenu nawa keŋa muyi kwenu, tahindi? 68Kuchinka Shimona Petulu nindi, Tukuyakudinyi? Eyi yeyi wukweti mazu awumi wahaya nyaka. 69Tunetiyi, tuneluki netu eyi yeyi Wajila waNzambi. 70Yesu hakuyakula nindi, Ami hinayitondeli enu ikumi nayeduku? Ilana mwinenu wumu hidiyabolu. 71Komana hakutena Yudasi, mwana kaShimona Isakaroti, muloŋa diyi wamba kamufukeja, diyi wahekumi nayedi.

Currently Selected:

Joani 6: MW62

Highlight

Copy