Joani 5

1Kulondela hayumiyi, kwadiŋi chawija chawaYudeya; Yesu hakukanduka kuYerusalema.

2MuYerusalema, kuchisu chanyikoku, kwekala ŋiya ijina dadu mwidimi daHeberu nawu Beteseda, dikweti makeki atanu. 3Mwenomu mwakaminaŋa izaza dawantu akata, niamputamesu, niayifwayi, niakwakalepa, hiyakuchiŋililaŋa hakuvundulawu meji; 4muloŋa kaŋelu wasulukilaŋa nakuvundula meji; hakuvundulawu meji, muntu wukusambilaŋahu dehi kudatamu hakukola kumusoŋu windi ngu. 5Kwenoku kwadiŋi iyala wumu wakata dehi nyaka makumi asatu nanyaka yitanu nayisatu. 6Yesu chamumweniyi nakami, welukili nindi wakata dehi hanalehi, hakumwihula nindi, Wukukeŋa akukoleshi tahindi? 7Owu iyala wakata hakumwakula nindi, Mwanta, hinikweti muntu wakuŋinŋa mwijiya havundulaŋawu mejuku; hinélaŋami nami niyumu, muntu wacheŋi hakunyakala kwijila mu. 8Yesu hakumwila nindi, Hiridukaku, sendaku yikaŋa yeyi, wendi. 9Hohe-nohu iyala yokola nikukola, hakusenda yikaŋa yindi, hakwenda.

10Dena ifuku odu dadiŋi dasabata. Dichi aYudeya hiyakumwila muntu anakoleshuwu dehi, nawu, Lelu hisabata, kusenda yikaŋa yeyi chinjila. 11Ilaŋa yena hakuyakula nindi, Muntu nankoleshi diyi naŋili nindi, Sendaku yikaŋa yeyi, wendi. 12Wena hiyakumwihula nawu, iyala wakwila nindi, Sendaku yikaŋa yeyi, wendi; hinyi? 13Ilaŋa owu muntu kwiluka wamukolesha nehi; Yesu nawomboloki dehi nezaza dawantu dadiŋuku. 14Chihanalehi chanti Yesu hakumuwana mutembeli, hakumwila nindi, Tala, eyi anakukoleshi dehi, bayi wakavulumuna cheŋuku, chuma chabadika kutama chakamba kakuwana. 15Owu iyala hakudiyila kwindi, hakuleja aYudeya nindi, Yesu diyi wankolesha.

16Cheliliyi Yesu yumiyi hasabata dichi chamukabishiluwu kudi aYudeya. 17Ilaŋa Yesu hakuyakula nindi, Tata yami wuchidi kukalakala nihanu, ninami nawa nidi nakukalakala. 18Henohu dihu hafumini aYudeya kukeŋa nankashi kumujaha, nawu hanakumini dakujilola kwasabataku, ilaŋa nateni niNzambi nindi Tata yami; hakudibwambula naNzambi.

19Dichi Yesu hakuyakula nindi, Chalala chalala, nukuyileja nami, Mwana hatweshaŋa kwila chuma chakanka winduku, chiŋa amona chadi nakwilayi Tata. Yuma yelaŋa Tata yejima, diyi yelaŋa ni mwana nawa. 20Muloŋa Tata wakeŋa a Mwana, wamulejaŋa yuma yejima yelaŋayi yomweni; wakamuleja ninyidimu yakubadika yeniyi, kulonda enu mwakahayami. 21Muloŋa chasaŋulaŋayi Tata afu nakuyihandisha, dichi nawa chahandishaŋayi Mwana antu anafuukuliyi. 22Tata hasompeshaŋa muntuku, nakunjiki kusompesha kwejima kudi Mwana; 23kulonda antu ejima alemeshi Mwana mwomwalemeshelaŋawu Tata. Muntu wabulaŋa kulemesha Mwana wabulaŋa kulemesha Tata yindi wamutemesheli. 24Chalala chalala, nukuyileja nami, muntu wukutiya mazu ami, hakukuhwelela yena wantemesheli, wukweti wumi wahaya nyaka; hakamona kumusompeshaku, nafumi dehi mukufwa, nepili dehi muwumi.

25Chalala chalala, nukuyileja nami, mpinji yikwinza, yashika dehi, mwakutiyilawu afu izu daMwana kaNzambi, akutiya akuhanda. 26Muloŋa chahetayi Tata wumi mudi yomweni, dichi chanamwinkiyi ni mwana Ŋovu yakuheta wumi mudi yomweni. 27Namwinki niwanta wakusompesha nanochu chadiyi Mwana kamuntu. 28Bayi muhayama chumichuku; mpinji yakenza henohu antu ejima adi mumajamu akatiya izu dindi; 29akedikamu; elili chachiwahi akasaŋukila wumi, akoŋeli chatama akasaŋukila kuyisompesha.

30Ami hinukutwesha kwila chuma chakanka wami hela chimuku. Munatiyaŋa dimu nasompeshelaŋa, nikusompesha kwami kwaloŋa; muloŋa hinalondaŋa muchima wamami awenuku, chiŋa muchima waTata wantemesheli. 31Ami neyi nukudishimwina wunsahu wamami aweni, wunsahu wami hiwukwikala walalaku. 32Wunsahu wami awushimunaŋa kudi wacheŋi; ami neluki mwakunshimunayi mwalala. 33Mwatemesheli antu kudi Yowanu, yena washimwini mwalala hohu. 34Ilaŋa wunsahu wunetejaŋami hiwakudi antuku; chinahoshaŋa mazu awa nalondi muhandi. 35Yena Yowanu wadiŋi inoŋu, dela nikubutuka nikutoŋaeka; enu mwetejeli kuzaŋalala chilaaka chimu muchejeji chindi. 36Ilaŋa wunsahu wunikwetami wabadika waYowanu, nyidimu yanyinkeliyi Tata kumanisha, yena nyidimu iyi vinelaŋa, diyi yanshimunaŋa wunsahu, nawu antemesheii kudi Tata. 37NiTata wantemesheli diyi nekali chinsahu chami, diyi nanshimuni dehi; enu kanda mutiyaloŋahu dehi izu dindi, hela kumumona chekalayi. 38Mazu aNzambi hiyashakamaŋa mudenuku, muloŋa ona atemesheliyi himwamwitiyaloŋaku. 39Enu mwatalatalaŋa munyikanda yajila, muloŋa mwatoŋojokaŋa nenu dimu mumukumwena wumi wahaya nyaka; yeniyi diyi yanshimunaŋami. 40Ilaŋa enu kwenu kwonti kwenu kwinza kudami kulonda mumoni wumi. 41Ami hinetejaŋa kunlemesha kudi antuku. 42Ilaŋa mi nayiluki, nami mudenu himwekala kukeŋa kwaNzambuku. 43Ami nenzi mwijina daTata yami, himunantambuluku; neyi wacheŋi wukwinza mwijina dindi yomweni, mukumutambula. 44Enu mwetejaŋa kuyilemesha kudi akwenu, ilaŋa kuyilemesha kudi Nzambi wumu hohu himwachikeŋaŋaku, mukutwesha kwitiya ŋahi? 45Bayi mutoŋojoka nenu ami yami nukuyiholokela kudi Tataku; kudi wumu wayiholokelaŋa, diyi Mosi, imwakuhwelelaŋa. 46Muloŋa neyi enu mwamwitiyili Mosi mutenowu mwadi kuŋitiya ninami, muloŋa yena wasonekeli nakuntenami. 47Ilaŋa neyi mukubula kwitiya nyikanda yajila yasonekeliyi yena, indi mazu inahoshaŋami mukuyiitiya ŋahi?

Currently Selected:

Joani 5: MW62

Highlight

Copy