Joani 21

1Kulondela hayumiyi, Yesu hakudimwekesha cheŋi kudi atumbanji kwijiya daTiberasi. Tiyenu mwadimwekesheleliyi. 2Adiŋi hamu niShimona Petulu, niTomasi atenaŋawu nawu Mpamba, niNataneli wakuKana wamuŊaliliya, nianyana kaZebedewu, niatumbanji twindi amakwawu ayedi. 3Shimona Petulu hakuyila nindi, Nukuya nakuta anshi. Hiya kumwila nawu, Ninetu tukuya neyi. Hiyakuya hiyakwijila muwatu; wena wufuku owu kukwata hela nikanti nehi.

4Chikunatachiki kucha, Yesu hakwimana hachi kumu, ilaŋa atumbanji kwiluka nawu diyi Yesu nehi. 5Dichi Yesu hakuyihula nindi, Anyikenu, mukweti yakudya? Hiyakumwakula nawu, Nehi. 6Yena hakuyila nindi, Lalu mwinenu wanda kumbavu yawatu yakuchidiilu, mukujimona. Dichi hiyakulalumuna. Akaŋanya nikuwukoka nawanshi kuvula. 7Dichi kambanji owu akeŋeluwu kudi Yesu hakumwila Petulu nindi, Diyi Mwanta. Shimona Petulu chanatiyiyi nawu diyi Mwanta, hakudikumbakesha chi kovwelu chindi, muloŋa wadiŋi nzekesi, hakudumbila mwijiya. 8Ilaŋa tumbanji amakwawu hiyakwinza mukawatu kanyanya nakukoka wanda wanshi; muloŋa hiyadiŋi kwakulehi nachikumuku, adiŋi neyi kwiji nkulakaji yayintampu yanyendu.

9Chanakandukuwu kumpata, hiyakumona kwenoku kesi kamakala, anashuhu inshi, nimankendi. 10Yesu hakuyila nindi, Letenuhu anshi ŋamu nakwati. 11Dichi Shimona Petulu hakuyaku, hakukokela wanda hachi kumu, wa-to nanshi jamaneni, nkulakaji namakumi atanu nanshi jisatu; hela jadiŋi jajivulu chochochu, wanda kutabuka nehi. 12Yesu hakuyila nindi, Inzenu mudawuli. Atumbanji ejima adiŋi nawoma wakumwihula nawu, Yeyinyi? muloŋa elukili nawu diyi Mwanta. 13Yesu hakwinza, hakunona mankendi, hakuyinka ninshi kumu. 14Didu ipampa damu chisatu dadimwekesheliyi Yesu kudi atumbanji, kufumisha hasaŋukiliyi mudi afu.

15Chanadawuluwu, Yesu hakumwihula Shimona Petulu nindi, Eyi Shimona mwana kaYowanu, wankeŋa chakubadikawa? Yena hakumwakula nindi, Eŋa Mwanta, eyi weluka chinakukunda. Yena hakumwila nindi, Diishaŋa twanami twanyikoku. 16Hakumwihula cheŋi kamuchiyedi nindi, Eyi Shimona mwana kaYowanu, wankeŋa? Hakumwakula nindi, Eŋa Mwanta, eyi weluka chinakukunda. Hakumwila nindi, Biŋaŋa anyikoku jami. 17Hakumwihula kamuchisatu nindi, Eyi Shimona mwana kaYowanu, wankunda? Petulu hakutiya chikela chanamwihuliyi Mwanta ipampa damu chisatu nindi, Wankunda? Hakumwila nindi, Mwanta, eyi weluka yuma yejima, eyi weluka chinakukunda. Yesu hakumwila nindi, Diishaŋa nyikoku jami. 18Chalala chalala, nukukuleja nami, chiwadiŋi kansi wadivwikilaŋa eyi aweni, wadiŋi nakuya kwonsu kuwunakeŋi kwoku. Ilaŋa chiwamba kekala kashinakaji, wamba kolola makaseyi, amba kakuvwika kudi wacheŋi, amba kakutwala kuwakabula kukeŋa. 19Chahosheliyi mwenomu, walondeli kushimuna nachu kufwa kwamba kalemeshayi nachu Nzambi. Chanamanishiyi kuhosha mwenimu, hakumwila nindi, Nlondaŋa.

20Petulu hakushetumuka, hakumona kambanji akeŋeluwu kudi Yesu, wudi nakulondela; yowu waKundameneni hebwambu dindi hadiililuwu, wehwili nindi, Mwanta, wukukufukeja hinyi? 21Dichi Petulu chanamumoniyi, hakumwihula Yesu nindi, Mwanta, indi yeniwu niyena wukwiladi? 22Yesu hakumwila nindi, Neyi nakeŋi nami yena akashaluhu nichinakenza, hinsaŋu yeyi? Eyi kumina dakunlondami. 23Dihu hafuma nikuhoshahosha ana kwawu nawu owu kambanji hamba kafwaku. Hakwila Yesu hamwilili nindi, Wakabula kufwaku; wamwilili nindi, Neyi nakeŋi nami yena akashaluhu nichinakenza, hinsaŋu yeyi?

24Diyi iwu kambanji nashimuni wunsahu wayumiyi, nasoneki yumiyi; etu tweluka netu mwanashimuniyi mwalala.

25Kudi niyuma yayivulu yi kwawu yehiliyi Yesu, yenoyu nayitoŋojoki nami neyi ayisoneka yejima, mpata yamunu mwishina hiyadi kumona hakutenteka nyikanda yadi kusonekawuku.

Currently Selected:

Joani 21: MW62

Highlight

Copy