Joani 11

1Kwadiŋi muntu wakata, Lazaru wakuBetani, wakumukala waMariya namana kwindi wamumbanda Mata. 2Diyi Mariya wawayishili Mwanta malasha, wakombweli nyendu yindi nansuki jindi, diyi wukweti mana kwindi Lazaru wakata. 3Dichi ahelindi hiyakumutemeshela mazu, nawu, Eyi Mwanta, tiya, mukwenu wakeŋa a wakata. 4Yesu chanachitiyiyi hakwila nindi, Kukatiku liikwakufwaku; kwakulemesha nachu Nzambi, kulonda akalemeshi nachu Mwana kaNzambi.

5Yesu wakeŋa eli Mata nimana kwindi wamumbanda niLazaru. 6Dichi chanatiyiyi nawu wakata, hakushakama kwenoku mafuku ayedi. 7Henohu hakuyila atumbanji twindi nindi, Tuyenu cheŋi muYudeya. 8Atumbanji hiyakumwila nawu, Eyi Rabi, aYudeya mafuku awa akeŋa kukwasa malola, wuyuku nawa cheŋi? 9Kuchinka Yesu nindi, Ifuku dimu hidekala naora ikumi najiyeduku, tahindi? Neyi muntu wukwenda namwa ana hakudituntulaku, nanochu chanamoniyi mwaana wamunu mwishina. 10Ilaŋa neyi muntu wukwenda nawufuku wukudituntola, muloŋa nabuli chejeji mudi yomweni. 11Chanahoshiyi mazu awa, hakunupaku nindi, Ibwambu detu Lazaru nayi dehi namutulu; ami hinukuya nakamuhindwishi namutulu. 12Dichi atumbanji hiyakumwila nawu, Eyi Mwanta, neyi nayi namutulu wukuhanda. 13Komana Yesu nateni kufwa kwindi; hakwila wena adiŋi nakutoŋojoka nawu nateni kunooka namutulu. 14Dichi Yesu hakuyileja chalumbuluka chikupu nindi, Lazaru wafwa dehi. 15Chinabuli kwikala kwenoku natiyi kuwaha hansaŋu yenu, kulonda enu mwaketiyi. Hela chochu, tuyenu kudi yena. 16Dichi Tomasi, atenawu nawu Mpamba, hakuyila akwawu atumbanji nindi, Tuyenu ninetu nawa, twakafwili hamu nindi.

17Yesu chanashikiyi hakuwana wakama dehi mwijamu mafuku awana.

18KuBetani kwadiŋi kwakwihi naYerusalema, neyi kwiji kilometa jisatu.

19Henohu aYudeya amavulu enza dehi nakukundeja Mata naMariya nansaŋu yamana kwawu. 20Dichi Mata chatiyiliyi nawu Yesu wudi nakwinza, hakuya nakumukinkilila, Ilaŋa Mariya hakushakama tuhu mwitala. 21Dichi Mata hakumwila Yesu nindi, Eyi Mwanta, neyi eyi wadiŋi kunu, mutenowu mana kwami hanafuku. 22Hela katataka neluki nami Nzambi wukukwinka chejima chiwukulomba. 23Yesu hakumwila nindi, Mana kweyi wukusaŋuka mukufwa. 24Mata hakumwila nindi, Neluki nami wamba kasaŋuka, hamba kasapukawu afu hefuku dakukuminina. 25Yesu hakumwila nindi, Yami kusaŋuka; Yami kuhanda. Muntu wankuhwelelami, hela wukufwa wakahanda. 26Muntu wamumi nankuhwelelami hamba kafwaku. Eyi wunetiyi mwenimu? 27Yena hakumwila nindi, Eŋa Mwanta, netiyi nami yeyi Kristu, Mwana kaNzambi, yowu elaŋawu nawu wakenza mumpata yamunu mwishina.

28Chahosheliyi omu hakuya kwindi, hakutambika mana kwindi Mariya hambadi nindi, Nkuluŋaŋa wudi kunu, nakutambiki. 29Niyena chanachitiyiyi, hakunyamuka swayi, hakuya kudi yena. 30Henohu Yesu kanda ashiki kumukala, wuchidi kwamukinkilililiyi Mata. 31AYudeya adiŋiyi nawu mwitala adiŋi nakumukundeja, chamwenuwu Mariya hakunyamuka swayi hakwidika, hiyakumulondela, atoŋojokeli nawu kwiji wudi nakuya nakudilila kwijamu. 32Dichi Mariya chashikiliyi kwadiŋiyi Yesu, chamumweniyi hakudumbila kunyendu yindi, hakumwila nindi, Mwanta, neyi eyi wadiŋi kunu, mutenowu mana kwami hanafuku. 33Dichi Yesu chamumweniyi wudi nakudila, niaYudeya enjiliyi nawu adi nakudila, hakudishishimuna muspiritu, atiya nikukala. 34Nindi, Munamukamiki kudihi? Hiyakumwila nawu, Mwanta, inzaŋa wutali. 35Yesu hakudila. 36Dichi aYudeya hiyakwila nawu, Talenu chamukeŋayi! 37Ilaŋa hadiŋi amakwawu nawu, Yeniwu watonesheli mesu anowu wadiŋi mputamesu, akaŋanyi kulekesha iwu iyala kufwa, tahindi?

38Dichi Yesu, iku wudi nakudishishimuna, hakwinza kwijamu. Komana hiiyeŋu, akunjikaku niilola. 39Yesu hakuyila nindi, Fumishenuku ilola. Mata, muhelanowu wafwa, hakumwila nindi, Mwanta, hanu hakununka, muloŋa munahiti dehi mafuku awana. 40Yesu hakumwila nindi, Hinakuleji nami, neyi wukukuhwelela wukumona kulema kwaNzambuku, tahindi? 41Afumishaku niilola. Yesu hakufumbula mesu kwiwulu, hakwila nindi, Tata nakusakilili chiwunantiyi. 42Ninami neluka nami eyi wantiyaloŋa mafuku ejima, ilaŋa natoŋojoki awa antu amavulu anemani kunu, dichi chinahoshi; kulonda wena etiyi nawu yeyi wantemesheli. 43Chanahoshiyi mwenomu, hakubidika nezu daŊovu nindi, Eyi Lazaru, idikakumu! 44Muntu wadiŋi wafwa hakwidikamu, chochamujiŋajiŋawu kumakasa nikunyendu namahina akujiika nachu, kumesu ajiŋiluku ihina. Yesu hakuyila nindi, Musubulenu ayi.

45Dichi amavulu ahadi aYudeya enjili kudi Mariya, amweni ochu cheliliyi Yesu, hiyakumwitiya. 46Ilaŋa makwawu hiyakuya kwawu kudi aFwarisi, hiyakuyileja mwaneliyi Yesu. 47Dichi awakulumpi jawatupristu niaFwarisi hiyakupompesha chota nawu, Tukwila ŋahi? muloŋa iwu muntu hakukoŋa yinjikijilu yayivulu. 48Neyi tukumuleka tuhu chochichi, antu ejima akumwitiya, niaRoma akenza nakututambula mpata yetu nimuza wetu. 49Ilaŋa mwinawu wumu ijina dindi Kayafwasi, wadiŋi kapristu muneni hamwakowu, hakuyila nindi, Himweluka chuma nichimuku. 50Munabuli kushinshika chakwila nenu chinawahi muntu wumu kufwila awa antu, kulonda muza wejima wubuli kunoŋa. 51Chahosheliyi ochu, hahosheli chakumuchima winduku; wahosheli nanochu chadiŋiyi kapristu muneni hawena mwakowu, hakuprofweta nindi, Yesu akafwili owu muza. 52Hakafwila kwamuzowu hohuku; chiŋa akapompesheli hamu anyana kaNzambi anaŋalaŋani. 53Kufumisha kwifuku odu hiyakutiyaloŋana nawu tumujahi.

54Dichi Yesu hendeli nawa cheŋi hatooka mukachi kawaYudeyaku, wafuminuku, hakuya mwisaŋa didi kwahwihi nekuna, hakwijila mumukala wumu ijina dawu Efweremi, hakulabilaku hamu nawatumbanji twindi.

55Chawija chawaYudeya chapaseka chinashiki dehi kwakwihi, antu amavulu hiyakufumafuma munyikala, hiyakukanduka kuYerusalema, hachidi paseka kanda, kulonda kudijilika. 56Hivakukeŋakeŋa Yesu. Hiyakudihujola hadiŋi nakwimajalawu mutembeli, nawu, Munatoŋojoki nenwidi? Nenu hakwinza kuchawija ku, tahindi? 57Akulumpi jawatupristu niaFwarisi aleja dehi antu nawu, neyi muntu neluki kwadiyi amushimuni kulonda amukwati.

Currently Selected:

Joani 11: MW62

Highlight

Copy