Genese 9
9
1Nzambi wakiswilili niNowa ni anyanindi nkisu, hakuyila nindi, Semununenu, mwakavuli, mwakawanishi hamaseki. 2Akaya kamana kuyitiya woma kudi anyama ejima ahamaseki, nikudi atujila ejima ahaluzwizu; niyuma yejima yazalalaŋa hamaseki, nianshi ejima amukaluŋalwiji, anahani kudenu. 3Yuma yejima yendaŋa yikweti wumi yakela yakudya yenu; neyi chinayinkeli yisakola yituuta, nayinki yejima. 4Ilaŋa mbijinawumi wayu, wowu mashi ayu, bayi muyidyaku. 5Chalala, mashi enu, wowawumi wenu, wowu nakayihulawu; nakehulawu kudi anyama ejima, nikudi muntu, mwalala kudi antu ejima nakehulaku wumi wawana kwawu. 6Yowu wukumwaŋa mashi amuntu, niyena akamumwaŋa mashi indi kudi muntu; muloŋa Nzambi wamwilili muntu ekali chochekalayi yena. 7Ninenu semununenu, mwakavuli; vwalenu nankashi hamaseki, mwakavuliluhu.
8Nzambi walejeli Nowa nanyanindi hamu, 9nindi, Ami aweni, chalala amichi, hinukukolesha munatiyaŋana nanenu, nawanyanenu akulonde lamu; 10nayuma yayumi yejima yidi kudenu, hela atujila, hela ayimuna, hela anyama ejima ahamaseki hamu nenu; ejima akwidika muwatu, chalala anyama ejima ahamaseki. 11Nukukolesha munatiyaŋani nanenu, niakwanyi jimba ejima hiyamba kayijilumuna cheŋi nameji adibajuku; hikwambakenza nawa cheŋi dibaji dakujilumuna isekuku. 12Nzambi nindi, Chinjikijilu cha kutiyaŋana kunukutiyaŋana nanenu, nayuma yayumi yejima mudinayu enu, chakutiyaŋana nayisaka yejima yahaya nyaka, dichenichi, 13nashika suluŋunda kamihevu, kakela chinjikijilu chakutiyaŋana ami neseki. 14Chikwila chinukuleta ivu hewulu damaseki, kasuluŋunda kakumwe kanahevu, 15hinukwanuka nichitiyaŋenu chami chinatiyaŋani nanenu, nayumayayumi yejima yikweti nyijimba, nimeji hiyakela cheŋi dibaji dakujilumuna akwanyijimba ejimaku. 16Kasuluŋunda kakwikala hevu, nukukatala, kulonda nanukiluhu kutiyaŋana kwahaya nyaka kwatiyaŋeni Nzambi nayuma yayumi yejima yikweti nyijimba yekala hamaseki. 17Nzambi wamwilili Nowa, nindi, Chenichi dichi chinjikijilu chakutiyaŋana kunakole shina wantu ejima ekala hamaseki.
18Anyana kaNowa edi kili muwatu adiŋi iwu Shemi, iwu Hami, iwu Yafweta; Hami diyi tata yaKenani. 19Wenawa asatu diwu anyana kaNowa; wowenawa diwu awanishili hamaseki hejima.
20Nowa hakutachika kudima, hakudima itempa danyivinyu. 21Wanwinivinyu, hakusheta; mwitenti mwadiŋiyi mahinindi hiyakubeluka. 22Hami, tata yaKenani, wamweni tata yindi wudi nzekesi, hakuleja ana kwindi muyayedi wawu hanzi. 23AShemi naYafweta anoneni ihina dakuvwala, adishili hamafwiji awu muyayedi wawu, ayili mafuntanyima, amubutilitata yawu wadiŋi nzekesi; mesu awu atalili kukwinzawu, hiyamweni tatayawu chadiŋiyi nzekesuku. 24Nowa walaŋu mukili namutulu twakamini yina vinyu yindi, welukili mwana mukoŋiyi kabinda kindi. 25Hakwila nindi, Kenani ashiŋewi, kudi ana kwindi ekali kwindi nduŋu yawanduŋu. 26Nindi, Kisu kisu Yehova, Nzambi yaShemi; Kenani ekali kwindi nduŋuyindi. 27Nzambi amutoheshi Yafweta, ashakami kwindi mumatenti aShemi; Kenani ekali kwindi nduŋu yindi.
28Chimwahitili dibaji, Nowa washakamini nyaka makulakaji asatunanyaka makumi atanu. 29Nyaka yaNowa yejima kuyibomba yashi kili munyaka makulakaji atanu namakulakaji awana nanyaka makumi atanu; yofwa ni kufwa.
Currently Selected:
Genese 9: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
