Genese 28

1Isaka wamutambi kili Yakoba, wamukiswilili nkisu, wamulejelinindi, Bayi wakasumbula mumbanda wamunu muKenanuku. 2Nyamukaku, wuyi kuPadani Arama, kwaBetuweli, nkaka yeyi wavwelimama yeyi, wusumbwiluku mwana kamandumi yeyi Labani. 3Nzambi Chinaweji akakukiswili nkisu, akakukwilishi nsemi, akakuvulishi, wakeli mukanka waweni wanyichidi yawantu. 4Akakukiswili nkisu yaAbarahama, akakwinkichu nineyi nianyaneyi hamu, kulonda wakaswani ituŋa diwashakama, damwinkeluwu Abarahama kudi Nzambi. 5Isaka wamwilili Yakobanindi, Yaŋa; hakuya kwindi kuPadani Arama, kudi Labani, mwana kaka-Siriya Betuweli, yowu mana kwaRebeka, mama yaYakoba naEsawu.

6Esawu wamweni Isaka namukiswili dehi Yakoba nkisu, namutemeshi dehi nindi yaŋa kuPadani Arama wakasumbwiluku mumbanda; wamweni chamukiswilayi Isaka, hakumuleja nindi bayi wakasumbula mumbanda wamunu muKenanuku; 7wamweni Yakoba niyena novwahili dehi mamatindi natata yindi, nayi dehi nikuPadani Arama. 8Esawu wamweni komana tata yindi Isaka hayi keŋeli ambanda akuKenanuku, 9niyenaEsawu hakuya kwindi kudi Ishimeli, hakusumbwilaku Mahalati, mwanaka Ishimeli mwana kaAbarahama, muhela Nebayoti, alunjiki hadi aŋodi ŋindi adiŋiyi nawu.

10Yakoba wafumini kuBerisheba, hakuya kuHarana. 11Washikiliha kadisaŋa kamu, wakamini kwenoku wufuku wejima, muloŋa itaŋwadina humi dehi; wanoneni ilola dimu dakwenoku, wasachililuhu namutuwindi, wakambamini kwokwenoku. 12Waloteli ndalu yakwimika heseki, insa yayu yashika nimwiwulu; aŋelu jaNzambi hiyakukandaminahu, hiyakusulukilahu. 13Kutala Yehova nemani hewulu, hakwila nindi, Yami Yehova, Nzambi yatata yeyi Abarahama, Nzambi yaIsaka; ituŋa diwunakambami nakakwinkadu nineyi nianyaneyi. 14Anyaneyi akekala neyilunkuŋu lwahamaseki kuvula, eyi wakasambaŋena nikumujika nikumusela, nikukabeta nikukabeta; mudeyi nimudi anyaneyi, yisaka yejima yahamaseki yakamwenawu kukooleka. 15Tala, ami nidi neyi, nakakuhembaŋa kwejima kuwakaya, nakakufuntisha cheŋi mwituŋidi; hinamba kakushiyaku, chiŋa nakela mwejima munakuleji to-o. 16Yakoba watoneni, welili nindi, Komana chalala Yehova wudi kunu, ami kwami hinachilukaku. 17Watiyiliwoma, nindi, Hanu hafwana kwaamu. Komana kunu kwokwitala daNzambihohu, komana kwokuchisu chamwiwulu.

18Yakoba wahindukili ntetemena yayeni, hakunona ilola dasachililiyi namutu windi, hakudiimika kaposhi, yohuŋununa manji hewulu dadu. 19Kwenoku watumbiluku ijina, nindi kuBeteli; ilaŋa hakusambila ijinadamukala dadiŋi Luzi. 20Yakoba hakushiika, nindi, Neyi Nzambi wakekalaŋa nanami, neyi wakanhembaŋa munjila yinukwenda, neyi wakanyinkaŋani yakudya nimahina akuvwala, 21mwaka nakafunti cheŋi chachiwahi kwitala datata, Yehova wakekala Nzambi yami, 22niilolidi dinemikikaposhi dakekala itala daNzambi; yuma yejima yiwakanyinka nakabalulayibalu ikumi nakanonamu chimu nakukwinkachu.

Currently Selected:

Genese 28: MW62

Highlight

Copy