Yowano 17

Yesu mwalombela tumbaji twenyi

1Hakukumisa kuhanjika mazu awa, Yesu atalile mwilu nakwamba ngwenyi, Ove Tata, lwola lunahete. Solola upahu wayAmi Mwanove, Ami Mwanove nawa ngusolole upahu wove,

2hakupwa unanguhane wata hali vatu vosena#17:2 MuchiHelase ngwavo, Vakwechi mijimba vosena., mangana veshovo unanguhane, nguvahane mwono wázeneka kukuma.

3Kaha ou ukiko mwono wázeneka kukuma, mangana vatachikizenga Ove uka wove Kalunga wamuchano, nayAmi Yesu Kulishitu wátuma.

4Ami ngunasolola upahu wove hano hamavu, hakukumisa mulimo wanguhanyine kulinga.

5Oholili jino, Ove Tata, solola upahu wami kumeso ayOve Ivene naupahu uze ngwapwilenga nawo nayOve hamwe shimbu kaye kapwile kachili kanda.

6Lijina lyove ngunavasolwelalyo vatu ava wanguhanyine vamuli vaka-kaye. Vapwile vove, kaha wanguhanyinevo, kaha vanalingi mwaya mazu ove.

7Jino vanatachikiza ngwavo, vyosena unanguhane vyafuma kuli Ove.

8Mwomwo mazu wanguhanyine ngunavahanewo, vakiko vanawatambula nakutachikiza mwamuchano ngwavo ngwafuma kuli Ove, kaha vanafwelela ngwavo Ove wangutumine.

9Ami nguli nakuvalombela; kangweshi nakulombela vaka-kayeko, oloze nguli nakulombela ava unanguhane, mwomwo vapwa vove.

10Kaha vyami vyosena vyapwa vyove, vyove vyapwa vyami, kaha upahu wami unasolokela muvikiko.

11Kaha kangweshi hakaye chekako#17:11 Mukulomba chenyi, Ivene Mwata namono mulimo wakutufwila kukulusu nakumisa lyehi, kaha nafumu lyehi hakaye nakuya kuli Ise., oloze vakiko vali hakaye, kaha Ami nguli nakwiza kuli Ove. Ove Tata wajila, valamenga mulijina lyove eli wanguhana, mangana vapwenga umwe ngana omu twapwa Etu.

12Shimbu ngwapwanga navo, Ami ngwavalamanga mulijina lyove eli wanguhana. Ngunavakinginga, kaha naumwe wavo wauchi nanongoho, shina kaha uze wakuya nakunonga, mangana Mazu-vasoneka-ajila atesemo.

13Oholili nguli nakwiza kuli Ove. Evi nguli nakuvihanjika hakaye mangana muli vakiko kuwahilila chami chitesemo.

14Ami ngunavahane mazu ove, kaha vaka-kaye vanavahungu, mwomwo vakiko kaveshi vaka-kayeko, ngana omu Ami kangwapwa ngumuka-kayeko.

15Kangweshi nakulomba mangana uvafumise hakayeko, oloze ngwami, Uvakingenga kuli uze wamupi.

16Vakiko kaveshi vaka-kayeko ngana omu Ami kangwapwa ngumuka-kayeko.

17Vajilike mumuchano. Mazu ove akiko muchano.

18Ngana omu wangutumine hakaye, mukiko nawa ngunavatumu Ami hakaye.

19Kaha hali vakiko hoho vene ngwalijilikila Ami, mangana navakiko nawa vavajilike mumuchano.

20Kaha nawa kangweshi nakuvalombela ava kahako, oloze navaze navakangufwelela hamazu avo#17:20 Nge ngwavo, hakwambulula chatumbaji.,

21mangana vosena vakapwenga umwe kaha, ngana omu Ove Tata uli muli Ami, nomu Ami nawa nguli muli Ove, mangana vakiko nawa vakapwenga muli Etu, mangana vaka-kaye vakafwelele ngwavo, Ove wangutumine.

22Ngunavahane upahu uze wanguhana Ami, mangana vakapwenga umwe, ngana omu twapwa Etu umwe;

23Ami muli vakiko nayOve nawa muli Ami, mangana vavakupwise mwosena hakupwa umwe, mangana vaka-kaye vatachikize ngwavo, Ove wangutumine, kaha wavazanga ngana omu wanguzanga Ami.

24Ove Tata, ava unanguhane ngunasake ngwami oku ngwatwama Ami, navakiko nawa vakatwamengako, mangana vakamonenga upahu wami wanguhana, mwomwo wanguzangile shimbu chapwile chihela chakaye chichili kanda.

25Ove Tata wakwoloka, chipwe vaka-kaye kavakutachikizako, oloze Ami ngwakutachikiza, kaha naava vanatachikiza ngwavo Ove wangutumine.

26Ngwavajimbwilile lijina lyove, kaha nangukavajimbwilangalyo lika, mangana zangi eyi wanguzanga yitwamenga muli vakiko, nayAmi nawa muli vakiko.

Currently Selected:

Yowano 17: LUE

Highlight

Copy