Yowano 15

Yesu Ikiye Muvinyo wamuchano

1 Ami yami Muvinyo wamuchano, kaha Tata Ikiye Njimi.

2Wose mutango wamuli Ami wakuzeneka kwima mihako#15:2 Njimi mwazundula mutango kaweshi nakwimanga mihakoko, pamo uli hamavu, ufume muvize vili nakuuhonesa kwima mihako, mangana upwenga helu nakutambula musana navula numba uhase kwima kanawa. mwauzundula#15:2 MuchiHelase, lizu linalumbunuka 1, kuzundula; 2, kutwala kweka. Tunamono ngwetu, kuzundula, hilizu linatemo., kaha wose weji kwimanga mihako mwautomesanga#15:2 Mutango ou uli nakwima mihako, Njimi mwasaka kuvulisa mihako, shikaho mwawahisa mutango hakuusondola, nakufumisa vyose vili nakuzeyesa mutango. mangana wimenga mihako yayivulu.

3Enu munatomo lyehi hamazu ngunahanjika kuli enu.

4 Twamenunga muli Ami, nayAmi nawa muli enu. Ngana omu mutango kaweshi kuhasa kulimina mihako hauka wawoko kuvanga unatwame kumuvinyo, ngocho nayenu nawa, kuvanga mutwamenga muli Ami.

5Ami yami Muvinyo, enu mumitango. Ou mwatwamanga muli Ami nayAmi nawa muli ikiye, kaha mwemanga mihako yayivulu, mwomwo chikeshi Ami kachi kamweshi kuhasa kulinga chuma nachimweko.

6Weshowo keshi kutwamanga muli Amiko, navamumbila nge mutango, mwominyina, kaha veji#15:6 Vatu navambwatula ou keshi nakulinunga kanawa naMwatako, hakumona puho yenyi yayipi. kuyikongolanga nakuyimbila mukakahya, hinayiwema.

7Nge namutwamanga muli Ami, kaha mazu ami nawa nawatwamanga muli enu, lombenu cheshocho munasake, kaha navamilingilacho.

8 Navalishilaho upahu waTata hakwima chenu mihako yayivulu, ngocho namupwanga mutumbaji twami chikupu.

9 Ngana omu anguzanga Tata, mukiko mungunamizangila nayAmi nawa. Twamenunga muzangi yami.

10 Nge namulinganga mwaya vize ngwámilweza, namutwamanga muzangi yami, ngana omu ngunalingi mwaya vize ángulweza Tata, kaha ngwatwama muzangi yenyi.

11 Evi ngunavihanjika kuli enu mangana kuwahilila chami chipwenga muli enu, kaha kuwahilila chenu chipwenga chakutamo.

12Echi chikiko ngwámilweza ngwami, Lizangenunga mwenu mwenu ngana omu ngwamizangila.

13 Naumwe wauchi ali nazangi yakuhambakana eyi, yakusuwila masepa jenyi mwono wenyi.

14 Nge namulinga mweshomwo nangumilweza, kaha mumasepa jami.

15Kangweshi kumivuluka ngwami, muvandungoko, mwomwo ndungo katachikiza mumwalinga kaka yenyiko. Oloze ngunamivuluka ngwami mumasepa jami, mwomwo ngunamijimbwila vyosena ovyo ngwevwile kuli Tata.

16Enu kamwangusakwile Amiko, oloze Ami ngwamisakwile enu, kaha ngunamitongola ngwami enu muyenga nakwima mihako — mihako yenu yikatwalilileho — mangana cheshocho namulomba Tata mulijina lyami akamihanecho.

17Evi ngunamilwezevyo mangana mulizangenga mwenu mwenu.

Navakamihunga kuli vaka-kaye

18 Nge vaka-kaye navamihunga, tachikizenu ngwenu vavangilile kunguhunga Ami, numbanyi enu.

19Nge mwapwanga muvaka-kaye, kachi vaka-kaye vanamizange hakupwa muvakwavo#15:19 MuchiHelase ngwavo, Ocho chavo kachi vaka-mavu vanachizange.. Enu kamweshi muvaka-kayeko, oloze Ami ngwamisakwile muli vaka-kaye, shikaho vaka-kaye vamihunga.

20Anukenunga mazu aze ngwamyambulilile ngwami, Ndungo kahambakana kaka yenyiko. Nge Ami vali nakunguyanjisa, nayenu nawa navakamiyanjisa. Nge valingile mwaya mazu ami, kaha navakalinga nawa mwaya mazu enu.

21Oloze vyosena evi navakavilinga kuli enu halijina lyami, mwomwo Uze ángutuma kavamutachikizako.

22 Nge kangwejile nakuhanjika kuli vakikoko, kachi kaveshi nashiliko, oloze oholili kaveshi nahakulipekela hashili yavoko.

23Ou anguhunga Ami ahunga naTata nawa.

24 Vilinga evi ngwalingile mukachi kavo nge vavilingaho lyehi kuli weka, kachi kaveshi nashiliko#15:24 MuchiHelase ngwavo, Kachi nge Ami kangwalingile mukachi kavo vilinga evi kavalingile kuli wekako, kachi kaveshi nashiliko.. Oloze oholili vanatumono, kaha vanatuhungu nayAmi naTata.

25Oloze chapwa ngocho mangana mazu aze vasoneka kuJishimbi javo atesemo ngwavo,

Vanguhungile tuhu chawana.

26Oloze hakwiza Muka-kumikafwa, Uze nangukamitumina Ami wakufuma kuli Tata, Ivene Shipilitu wamuchano Ou mweza kufuma kuli Tata, Ikiye mwakahananga unjiho wenyi hali Ami.

27Kaha nayenu nawa namukahananga unjiho wenu, mwomwo munapunga nayAmi hamwe kufuma kukuputuka#15:27 Nge ngwavo, kukuputuka chamilimo yaMwata hakaye..

Currently Selected:

Yowano 15: LUE

Highlight

Copy