Yowano 10

Chishimo chalimba lyamikoko

1Mwamuchano vene nangumilweza ngwami, Ou mwazeneka kwingilila kuchikolo chalimba lyamikoko, oloze mwanyinyina heka, ikiye napu mwiji, napu nawa chihwanga.

2Oloze ou eji kwingililanga kuchikolo, ikiye kafunga kamikoko.

3Ikiye ou navasokolwela kuli muka-kulama kuchikolo. Mikoko veji kwivwanga lizu lyenyi, kaha eji kusanyikanga mikoko jenyi halijina halijina nakuvatwaminyinako hakuvalovola.

4Omu nalovolamo venyi vosena, himwavatetekela, kaha mikoko hinavamukavangiza, mwomwo vatachikiza lizu lyenyi.

5Oloze weka kaveshi kumukavangizako, navamuchina, mwomwo kavatachikiza lizu lyawekako.

6Yesu ahanjikile nachishimo chino kuli vakiko, oloze vize apwile nakuvalweza kavyavalumbunukilileko.

Yesu Ikiye Kafunga wamwenemwene

7Shikaho Yesu avambile cheka ngwenyi, Mwamuchano vene nangumilweza ngwami, Ami yami Chikolo chamikoko.

8Vosena#10:8 Vaze vosena, vavuluka weshowo alivulukile kupwa Chikolo chamikoko (tala 10:7), chipwe ngwenyi, Ami jila yakuheta kuli Kalunga, chipwe ngwenyi, Ngumulwilo wavatu. véjile shimbu kanda Ami, vapwa veji navihwanga, oloze mikoko kavavevwililileko.

9Ami yami Chikolo. Weshowo mwengilila hali Ami navamulwila, kaha mwengila nakulovoka nakuwana kuulilo.

10Mwíji hakwiza akava kwiva nakujiha nakwenyeka. Ami nguneza mangana vapwenga namwono, kaha vapwenga nawo wakulisala.

11Ami nguKafunga wamwenemwene. Kafunga wamwenemwene mwasuula mwono wenyi hali mikoko jenyi.

12Ou vánakambe, ázeneka kupwa kafunga, ou keshi mwenya mikokoko, hakumona kangunge ali nakwiza, mwaseza mikoko nakuchina, kaha kangunge mwavahukula nakuvapuzumuna.

13Mwachina hakupwa wakukamba, mwomwo kazakamina mikokoko.

14Ami nguKafunga wamwenemwene. Ngwatachikiza vami, kaha vami nawa vangutachikiza.

15Ngana omu angutachikiza Tata, mukiko nawa ngwatachikiza Tata, kaha nangusuula mwono wami hali mikoko jami.

16Kaha nguli namikoko vakwavo nawa, ava kavapwa vakulimba linoko. Navakiko nawa kuvanga nguvanehe, kaha navakevwa lizu lyami. Ngocho nakukapwanga utanga umwe naKafunga umwe.

17Hakiko vene anguzangila Tata, mwomwo Ami nangusuula mwono wami mangana nguutambule cheka.

18 Naumwe mwangutambulawo wauchi, oloze nánguusuula Ami Ivene. Ngukwechi ngolo jakuusuula, kaha ngukwechi ngolo jakuutambula cheka. Omu mukiko ángulweza Tata.

19Cheka nawa muli vaYuleya mwapwile kulihandununa hamazu awa.

20Vavavulu muli vakiko vapwile nakwamba ngwavo, Ali nandemone, kaha nazaluka, namumwivwilila ngachilihi?

21Vakwavo vambile ngwavo, Awa kaweshi mazu amuka-ndemoneko. Ndemone mwahasa kutonesa meso akapuputa numba?

Yesu navamukana kuli vaYuleya

22Haze vene kuYelusalema kwapwile Chiwanyino chaKujilika#10:22 Chiwanyino Chakujilika, chapwile chiwanyino chakwanuka kutungulula Tembele yaSolomone kuYelusalema nakuyijilika. hangonde yachishika.

23Kaha Yesu apwile nakutambuka muTembele, musenge yaSolomone.

24Kaha vaYuleya vamujingilikile nakumwamba ngwavo, Naututwamisa mukuhuhwasana palanga nakumwaka uka? Nge Ove yove Kulishitu, tulweze mwakulumbunuka.

25Yesu avakumbulwile ngwenyi, Ngwamilwezele, kaha enu kamwafwelelako. Milimo eyi ngwéji kuzatanga#10:25 MuchiHelase ngwavo, Milimo eyi ngwalinga. muLijina lyaTata, yeji kuhananga unjiho hali Ami.

26Oloze enu kamwafwelelako, mwomwo kamweshi muvahali mikoko jamiko.

27Mikoko jami veji kwivwanga lizu lyami, kaha Ami ngwavatachikiza, kaha nawa veji kungukavangizanga.

28Ami ngwavahana mwono wázeneka kukuma, kaha kaveshi kwiza kukanongako, kaha nawa kakweshi umwe mwavahukula mulivoko lyamiko.

29Tata, Ou nanguhanevo, ahambakana vosena, kaha kakweshi umwe mwahasa kuvahukula mulivoko lyaTatako.

30 Ami naTata twapwa Umwe.

31VaYuleya vanonele cheka malolwa mangana vamwase.

32Yesu avakumbulwile ngwenyi, Ngunamisolwela milimo yamwaza yayivulu yakuli Tata. Hamulimo muka namungwashila malolwa?

33VaYuleya vamukumbulwile ngwavo, Keshi hamulimo wamwaza hakiko natukwashila malolwako, oloze hakumusaula Kalunga, mwomwo Ove uMutu, uli nakulilingisa kupwa uKalunga.

34Yesu avakumbulwile ngwenyi, Kumana kavasoneka kuJishimbi jenuko ngwavo,

Ngwambile ngwami, Enu mutulunga?

35Nge vaze kwejile Lizu lyaKalunga avavulukile kupwa tulunga (kaha Mazu-vasoneka-ajila kaveshi kuhasa kuwalumunako),

36kumana Ou vajilika kuli Tata nakumutuma hakaye, mumwambe ngwenu, Unasaula Kalunga, omu ngunambe ngwami, NguMwanaKalunga?

37Nge kangweshi nakuzata milimo yaTatako, kaha kanda namungufwelelako,

38oloze nge nguli nakuyizata, chipwe kamwangufwelelako, yifwelelenu milimo yivene mangana mutachikize, chimilumbunukile ngwenu Tata ali muli Ami, nayAmi nawa muli Tata.

39 Cheka nawa vasakile kumukwata, oloze afumine mukachi kavo.

40Yesu ayile cheka musali yaYotau, kuze ápwile nakujimikila Yowano hakavanga, kaha atwamine kuze.

41Kaha vavavulu vejile kuli Ikiye. Vahanjikile ngwavo, Yowano kalingile chinjikizoko, oloze vyosena ávulukile Yowano hali Ou vyamuchano.

42Kaha vavavulu vamufwelelele kuze.

Currently Selected:

Yowano 10: LUE

Highlight

Copy