MAAKU 6

Nazarɛtideenↄ gina Yesuzi

(Mat 13:53-58, Luk 4:16-30)

1Yesu bↄ̀ gwe à gàa a bɛ wɛ́tɛ, à ìbanↄↄ tɛ́zi. 2Kɛ̀ kámmabogurↄↄ kà, ben èe yã daańnɛ aduakɛkpɛn. Ben parii kɛ̀ aↄ̃ à yã mànↄ bídi kɛ̀ wà bè: Mákpan gↄ̃gbɛ̃ pì yã kɛ̀nↄ èn? Ɔ̃ndↄ̃ kpareen wà kpàa, ben èe dabuyã kɛ̀ takanↄ kɛɛ? 3Àmbe lí'ari ũroo? Mariama nɛ́nloo? Yemisi kↄ̃n Yusufuo kↄ̃n Yudao kↄ̃n Simↄnↄ vĩ̀in gweroo? À dãrenↄ bé wà kúwao kɛ̀roo? Ben aↄ̃ gìzi. 4Ben Yesu bèńnɛ: Annabi ègↄ̃ bɛ̀ɛ sairo, sé à bɛ wɛ́tɛ kↄ̃n à danɛnↄ kiiao kↄ̃n à uao baasiro. 5Yesu e fↄ̃ à dabuyã ke kɛ̀ gwero, sé gyãree kɛ̀ à ↄ kɛ̀ḿma à ń kɛ̃kↄ̃a kenↄ baasiro. 6Kɛ̀ aↄ̃ↄe à náanɛ kɛro, aↄ̃ yã bↄ̀ à saɛ maamaa.

Yesu zĩ̀rinↄ zĩna

(Mat 10:5-15, Luk 9:1-6)

Ben à gàa lakutu kↄ̃n lakutuo, èe yã daańnɛ. 7Ben à a ìba gↄ̃ↄn kuri awɛɛplaaanↄ sìsiazi, ben à ń zĩ gↄ̃ↄn plaplaa, à ń gbá iko aↄ̃ zĩnnↄ goḿma. 8À bèńnɛ: Àton pↄ́ke sɛ́ à gáoro, kũsãɛ ke bↄ̀kↄlogomma ke ↄↄ, sé gò. 9À kyatee kpá, mↄde àton uta da mɛ̀n plaaro. 10Ua kɛ̀ a pitan, àgↄ̃ kú gwe ai à gá bↄo wɛ́tɛ pì guu. 11Guu kɛ̀ wèe a sín ke wèe swã kpá a yãziro, tó ée taa, à lutɛ̃ gogo a gbánↄa ń tona kↄ̃n Ludao sèeda ũ. 12Ben aↄ̃ dà zɛ́n. Aↄ̃ nↄ̀sɛliɛna waazi kɛ̀ gbɛ̃nↄnɛ 13aↄ̃ zĩnnↄ gòḿma pari, aↄ̃ nↄ́si màma gyãreenↄa pari aↄ̃ ń kɛ̃kↄ̃a.

Yaaya Batisikɛri gana

(Mat 14:1-12, Luk 9:7-9)

14Kí Hɛrↄdu yã pìnↄ mà, zaakɛ Yesu tↄ́ kà gu píngia. Gbɛ̃kenↄ e bee Yaaya Batisikɛri bé à fɛ̀ɛ bↄna gaan, beee yãnzin à gbãaa è èe dabuyãnↄ kɛɛzi. 15Gbɛ̃kenↄ bè Iliamɛ, gbɛ̃kenↄ bè annabimɛ lán annabi yãanↄ doke bà. 16Kɛ̀ Hɛrↄdu mà à bè: Yaaya kɛ̀ ma à mì zↄ̃̀ bé à fɛ̀ɛ bↄna gaan.

17-18Zaakɛ Hɛrↄdu dↄ̃nkↄ̃ pì bé à a vĩ̀i Filipi naↄ̃ Hɛrↄdia sìa à sɛ̀. Kɛ̀ Yaaya ègↄ̃ oonɛ à vĩ̀i nↄ sinaa maaro, ben Hɛrↄdu tò wà Yaaya kũ̀ wà mↄ̀ kàa wà à dà kpɛ́siaan. 19Hɛrↄdia sↄ̃ↄ Yaaya pɛ̃tɛ̃ kũna à yezi à à dɛ, mↄde èe zɛ́ ero, 20zaakɛ Hɛrↄdu dↄ̃̀ kɛ̀ Yaaya nɛ́ Luda gbɛ̃ súusumɛ, ben è vĩa kɛnɛ è tó wà ĩa daaro. Tó à gàa à à yã ma, laasuu è gɛ̃mmɛ. Baa kↄ̃n beeeo ègↄ̃ ye à fàadibonazi.

21Hɛrↄdia zɛ́ è Hɛrↄdu igurↄ làa kↄ̃kↄ̃ zĩ. Hɛrↄdu gbãadeenↄ kↄ̃n soza gbɛ̃nsinↄ kↄ̃n Galili gbɛ̃ gírimadeenↄ kàkↄ̃a pↄ́blekiia. 22Ben Hɛrↄdia nɛ́nↄkparɛ gɛ̃̀ à ↄ̃ wã̀. À kɛ̀ Hɛrↄdunɛ nna kↄ̃n a nibↄnↄ ń píngi, ben kína bè nɛ́ pìnɛ: Pↄ́ kɛ̀ ń yezi ǹ à wɛ́ɛ kɛma, mɛ́ n gba. 23Ben à ɛ̀ara à bènɛ: Ma la dànnɛ pↄ́ kɛ̀ n à wɛ́ɛ kɛ̀ma píngi, mɛ́ n gbamɛ, baa ma kpata kpaatɛ. 24Ben nɛ́nↄkparɛ pì bↄ̀ à gàa à a da gbèka à bè: Bↄ́n mɛ́ wɛ́ɛ kɛa? Ben à da bènɛ, Yaaya Batisikɛri mì. 25Gwe gↄ̃ↄ à lìara à sù kpakpaa à gàa à ò kínanɛ: Má yezi ǹ ma gba Yaaya Batisikɛri mì dana pɛrɛnti guu kɛ̀ tia.

26Ben kína pↄↄ yàka maamaa, mↄde kɛ̀ à la dà nibↄnↄ wáa yãnzin èe fↄ̃ à gì dↄro. 27Ben kína pì a dogari ke zĩ̀ gↄ̃ↄ, à bènɛ à gá à à mì zↄ̃ à mↄ́o. Ben à gàa à à mì zↄ̃̀ kpɛ́siaan 28à dà pɛrɛnti guu à mↄ̀ à kpà nɛ́ pìa, ben à kpà a daa. 29Kɛ̀ Yaaya ìbanↄ yã pì mà, ben aↄ̃ mↄ̀ wà à gɛ̀ sɛ̀ wà vĩ̀i.

Pↄ́blekpana gↄ̃ↄn bↄrↄ sↄↄroonↄa

(Mat 14:13-21, Luk 9:10-17, Yoh 6:1-15)

30Yesu zĩ̀ri pìnↄ sù à kiia, ben aↄ̃ yã kɛ̀ aↄ̃ↄ kɛ̀nↄ kↄ̃n yã kɛ̀ aↄ̃ↄ dàńnɛnↄ ònɛ píngi. 31Wèe gaa wèe suu, ben Yesu kↄ̃n a zĩ̀rinↄↄ e zɛ́ e aↄ̃ pↄ́ blè sero parii yãnzi. Ben à bèńnɛ: À mↄ́ wà gá gusaɛ watɛ̃ɛ wà kámma bo féte. 32Ben aↄ̃ dà zɛ́n góro'itɛ guu aↄ̃ↄe gaa gusaɛ ńtɛ̃ɛ. 33Kɛ̀ gbɛ̃nↄ ń gana è, aↄ̃ ń dↄ̃, ben aↄ̃ bↄ̀ wɛ́tɛ kↄ̃n wɛ́tɛo pari wà bàa lɛ̀ kɛ̀sɛ wà kà gwe ń ã. 34Kɛ̀ Yesu bↄ̀ góro guu, à gbɛ̃nↄ è paripari, ben aↄ̃ kɛ̀nɛ wɛ̃nda, zaakɛ aↄ̃ↄ dɛ lán sãa kɛ̀ aↄ̃ↄ dã̀ri vĩroonↄ bàmɛ. Ben èe yã daańnɛ maamaa.

35Kɛ̀ ↄfãntɛ̃ bùsa, ben à ìbanↄ sↄ̃̀zi aↄ̃ bè: Gura kɛ̀kii nɛ́ sɛ̃̀tɛ pↄ̀rↄtumɛ, bensↄ̃ guu e sii. 36Ǹ gbɛ̃nↄ gbarɛ aↄ̃ tá bura kↄ̃n lakutu kɛ̀ kú kĩinↄa, aↄ̃ pↄ́ wɛtɛ wà lú wà ble. 37Ben Yesu wèńla à bè: À pↄ́ kpáḿma aↄ̃ ble. Ben aↄ̃ bènɛ: Ń yezi wà gá burɛdi lú kondogi ↄↄ wàa do wà kpáḿma aↄ̃ blen yↄ́? 38Ben Yesu ń lá à bè: Burɛdi mɛ̀n ũgban á vĩi? À gá gwa. Kɛ̀ aↄ̃ kà, aↄ̃ bè: Burɛdi kuu mɛ̀n sↄↄro kↄ̃n kpↄ̀o mɛ̀n plaa.

39Ben à bèńnɛ: À gbɛ̃nↄ vɛ̃ɛvɛ̃ɛ sɛ̃̀la bↄ̀rↄa gãliagãlia. 40Ben aↄ̃ vɛ̃̀ɛvɛ̃ɛ gãli kↄ̃n gãlio, gãli kenↄ gↄ̃ↄn basↄↄro, gãli kenↄ gↄ̃ↄn baplaa akuri. 41Ben Yesu burɛdi mɛ̀n sↄↄro kↄ̃n kpↄ̀o mɛ̀n plaaa pìo sɛ̀ à wɛ́ɛ sɛ̀ musu à aubarika dàn. Ben à burɛdi pì lìlikↄ̃rɛ à kpà a ìbanↄa, aↄ̃ↄ kpàatɛtɛ gbɛ̃nↄnɛ. Ben à kpↄ̀ mɛ̀n plaaa pìnↄ kpàatɛtɛńnɛ ń píngi. 42Aↄ̃ pↄ́ blè wà kã̀ ń píngi. 43Ben wà burɛdi kpaa kↄ̃n kpↄ̀ kpaaa kɛ̀ gↄ̃̀nↄ sɛ̀ɛ gbíi kuri awɛɛplaaa pà. 44Gↄ̃gbɛ̃ kɛ̀ aↄ̃ pↄ́ blènↄ kà gↄ̃ↄn bↄrↄ sↄↄro.

Yesu táa'ona sɛ̀bɛla

(Mat 14:22-33, Yoh 6:16-21)

45Yesu gã nà a ìbanↄa gↄ̃ↄ aↄ̃ gɛ̃ góro'itɛn, lɛ aↄ̃ dↄnɛ aɛ gana Bɛtɛsaida ai àgↄ̃ parii gbarɛ. 46Kɛ̀ à lɛ́ zàḿma, ben à dìdi kpiii musu à gàa adua kɛ. 47Kɛ̀ uusiɛ kɛ̀ góro'itɛ kú sɛ̀bɛ dagura, Yesu sↄ̃ↄ kú í baa ado. 48Ben à è górofĩna e ĩa daaḿma, kɛ̀ ĩa gbãaa e kakaańzi yãnzi. Gudↄnao à gàa ń kiia èe táa oo íla, ben à kɛ̀ dian á yezi à gɛ̃ńlaa bà. 49Kɛ̀ aↄ̃ à è èe táa oo íla, aↄ̃ↄe daa gɛ̀wãadeemɛ, ben aↄ̃ wii lɛ̀. 50Zaakɛ aↄ̃ à è ń píngi, ben swɛ̃̀ kɛ̃̀ńgu. Ben Yesu yã bèńnɛ gↄ̃ↄ: À a làakari kpáɛ, mámbee! Àton tó vĩa a kũro. 51Kɛ̀ à gɛ̃̀ góro guu, ben ĩa zɛ̀, ben yã pì bↄ̀ ń saɛ maamaa, 52zaakɛ aↄ̃ wɛ́ɛ e kɛ̃ burɛdi yãaro kɛ̀ laasuu kɛ̃̀sãḿma yãnzi.

Yesu gyãreenↄ kɛ̃kↄ̃ana zaa Gɛnɛsarɛti

(Mat 14:34-36)

53Kɛ̀ aↄ̃ bikũ̀ baa, aↄ̃ kà Gɛnɛsarɛti, ben aↄ̃ ń góro bà dↄ̀ gwe. 54Kɛ̀ aↄ̃ bↄ̀ɛ góro guu, wà Yesu dↄ̃̀ gↄ̃ↄ, 55ben aↄ̃ bàa lɛ̀ wà gàa bùsu pì lakutu píngia, wà gyãreenↄ sɛ̀ɛ kↄ̃n ń daɛbↄnↄ, guu kɛ̀ wà mà à kún píngi wègↄ̃ mↄ́ńyo à kiia. 56Guu kɛ̀ à gàan píngi, lakutunↄ ke wɛ́tɛnↄ ke buraanↄ, wègↄ̃ mↄↄnɛ gyãreenↄ ai wà ń káɛ yàranↄa, ben wè wɛ́ɛ kɛa lɛ wà ↄ kɛ baa à uta lɛ́a. Ben gbɛ̃ kɛ̀ aↄ̃ ↄ kɛ̀anↄ kɛ̃̀kↄ̃a ń píngi.

Currently Selected:

MAAKU 6: BBB

Highlight

Copy