MAAKU 14

Lɛ́kpakↄ̃sↄ̃na Yesuzi

(Mat 26:1-5, Luk 22:1-2, Yoh 11:45-53)

1Banla zĩbaa kↄ̃n Burɛdi Sɛ́sɛ'ɛ̃zɛ̃sai zĩbaao gↄ̃̀ gurↄ plaa, ben sa'orikinↄ kↄ̃n ludayãdannɛrinↄↄ e zɛ́ wɛtɛɛ ↄ̃ndↄ̃ↄo wà Yesu kũ wà dɛ. 2Zaakɛ aↄ̃ bè: Wàton kɛ zĩbaa zĩro, lɛ gbɛ̃nↄ tón zↄka káro yãnzi.

Nↄ́si gũ nna kuna Yesu mìa

(Mat 26:6-13, Yoh 12:1-8)

3Gurↄↄ kɛ̀ Yesu kú Bɛtani, Simↄ kusu bɛ, èe pↄ́ blee gɛɛkɛsɛkɛna, ben nↄgbɛ̃ ke sↄ̃̀zi à gbaaa nɛ́ngo kɛ̀ nↄ́si gũ nna bori maa ↄↄdee kú à guu kũna. Ben à gbaaa pì waa ɛ̀, à nↄ́si pì kù Yesu mìa. 4Gbɛ̃kenↄ kú gwe, aↄ̃ pↄↄ fɛ̀ɛ wà bè: Bↄ́n nↄ́si pì laalaakɛna ũu? 5Weé fↄ̃ wà yá dɛ kondogi wàa do kpɛ́ basↄↄroola wà à ↄↄ kpá takaasideenↄa. Ben aↄ̃ lɛ́fↄtↄↄ kà nↄgbɛ̃ pìzi. 6Ben Yesu bè: À à tó gwe. Bↄ́yãnzin ée ĩa daaazi? À zĩ maaa kɛ̀mɛmɛ. 7Takaasideenↄ égↄ̃ kúao gurↄ píngi, gurↄↄ kɛ̀ á yezi, é fↄ̃ à kɛńnɛ. Mapi sↄ̃ mɛ́gↄ̃ kúao gurↄ píngiro. 8À kɛ̀ a gbãa lɛ́mmɛ, à gĩakɛ à nↄ́si kù ma mɛ̀a lɛ à ma gɛ̀ kɛomɛ. 9Yãpuraan mɛ́ɛ ooare, guu kɛ̀ wèe ma baaru nna waazi kɛɛn anduna guu píngi, weégↄ̃ yã kɛ̀ nↄgbɛ̃ pì kɛ̀ oo à dↄngu yãnzi.

Yudasi bↄna Yesu kpɛɛ

(Mat 26:14-16, Luk 22:3-6)

10Beee gbɛra gↄ̃ↄn kuri awɛɛplaaanↄ doke kɛ̀ wè benɛ Yudasi Isikariↄti gàa sa'orikinↄ kiia, lɛ à Yesu kpáḿma. 11Kɛ̀ aↄ̃ à yã mà, ben aↄ̃ pↄↄ kɛ̀ nna, ben aↄ̃ lɛ́ gbɛ̃̀nɛ kɛ̀ weé ↄↄ kpáa. Ben èe zɛ́ wɛtɛɛ à Yesu kpáḿma.

Banla pↄ́ble kɛkɛna

(Mat 26:17-25, Luk 22:7-14,21-23, Yoh 13:21-30)

12Burɛdi Sɛ́sɛ'ɛ̃zɛ̃sai zĩbaa gurↄ káakudee zĩ kɛ̀ wè Banla sãnɛ bↄ̀rↄ kòto kpá, Yesu ìbanↄ à là wà bènɛ: Mán ń yezi wà gá kɛkɛnnɛ ǹ Banla pↄ́ blen? 13Yesu gↄ̃ↄn plaaa zĩ̀ a ìbanↄ tɛ́ à bèńnɛ: À gá wɛ́tɛ guu. Gↄ̃gbɛ̃ ke é daalɛ à í sɛna kↄ̃n looo. À tɛ́zi 14ai ua kɛ̀ eé gɛ̃n. À o ua pì bɛdeenɛ, dannɛri bè mán a pitakii kún, guu kɛ̀ é Banla pↄ́ blen kↄ̃n a ìbanↄo? 15Eé kpɛ́ musu bíta kɛ̀ wà kɛ̀kɛ ↄdↄaare. À pↄ́bleyã kɛkɛwe gwe. 16Yesu ìba pìnↄ dà zɛ́n, aↄ̃ gↄ̃̀ wɛ́tɛ pì guu, ben aↄ̃ↄ è lán à òńnɛ nà. Ben aↄ̃ Banla pↄ́bleyã kɛ̀kɛ gwe.

17Kɛ̀ uusiɛ kɛ̀, ben Yesu gàa gwe kↄ̃n a gↄ̃ↄn kuri awɛɛplaaa pìnↄ. 18Kɛ̀ aↄ̃ vɛ̃̀ɛ wèe pↄ́ blee, ben à bè: Yãpuraan mɛ́ɛ ooare, a gbɛ̃ mɛ̀n doo kɛ̀ wée pↄ́ blee lɛdoo é ma kpáḿma. 19Aↄ̃ nↄ̀sɛ yàka, ben aↄ̃ↄe à laa doodo: Asa mámbeeroo? 20Ben à bèńnɛ: A gↄ̃ↄn kuri awɛɛplaaanↄ doke kɛ̀ wée pↄ́ blee taa guu lɛdomɛ. 21Gbɛ̃ntee Nɛ́ é kpá guuzi lán à kɛ̃na a yã musu nà, mↄde wãiyoo gbɛ̃ kɛ̀ eé bↄ Gbɛ̃ntee Nɛ́ kpɛɛ pì. Eé kɛ sã̀ↄ adeenɛ tó wèe à i yãro.

Dii pↄ́blee

(Mat 26:26-30, Luk 22:14-20, 1Kↄ 11:23-25)

22Kɛ̀ aↄ̃ↄe pↄ́ blee, Yesu burɛdi sɛ̀ à aubarika dàn, ben à lìkↄ̃rɛ à kpà a ìbanↄa à bè: À sí, ma mɛ̀n yɛ̀. 23Ben à togoo sɛ̀ à aubarika dàn à kpàḿma, ben aↄ̃ↄ mì ń píngi. 24Ben à bèńnɛ: Ma arun yɛ̀, Luda bà kuuna kↄ̃n gbɛ̃ pariinↄ aru ũ, kɛ̀ eé bↄɛmaa. 25Yãpuraan mɛ́ɛ ooare, mɛ́ geepi'i mi gĩa dↄro ai kpata kɛ̀ bↄ̀ Luda kiia gá bↄo gupuraaa, gbasa mà à dufu mi sa. 26Kɛ̀ aↄ̃ lɛ̀ sì, ben aↄ̃ bↄ̀ɛ wà gàa Kùkpɛ sĩ̀sĩgɛɛzi.

Yesu gĩakɛ à dↄ̃ yã kɛ̀ Pita é kɛ

(Mat 26:31-35, Luk 22:31-34, Yoh 13:36-38)

27Ben Yesu bèńnɛ: A píngi é fuma, zaakɛ wà kɛ̃̀ Luda yãn wà bè: Mɛ́ sãdãri lɛ́, sãanↄ é fãakↄ̃a. 28Mↄde ma fɛɛna gbɛra mɛ́ dↄare aɛ gana Galili. 29Ben Pita bènɛ: Baa tó aↄ̃ fù ń píngi, mɛ́ furo. 30Ben Yesu bènɛ: Yãpuraan mɛ́ɛ oonnɛ, gwãavĩa ai koo gↄ̃ gá lɛ́ zu gɛ̃̀n plaa, nɛ́ lɛ́ sɛ́mazi gɛ̃̀n aagↄ̃. 31Ben Pita bè mámmam: Baa tó mɛ́ gà mà ganyo, mɛ́ lɛ́ sɛ́nzi zikiro. Ben aↄ̃ↄ ò lɛ se ń píngi.

Yesu aduakɛna zaa Gɛtɛsɛmani

(Mat 26:36-46, Luk 22:39-46)

32Aↄ̃ kà guu kɛ̀ wè be Gɛtɛsɛmani, ben Yesu bè a ìbanↄnɛ: À vɛ̃ɛ kɛ̀ ai mà gá adua kɛ. 33À Pita kↄ̃n Yemisio kↄ̃n Yohanao sɛ̀ à gàańyo. Sósobi à kũ̀ à nↄ̀sɛyↄgↄ sì. 34Ben à bèńnɛ: Ma pↄↄ sia kũ̀ maamaa ai gaa lɛ́zĩ. À zɛ kɛ̀ à itɛ̃ kɛ. 35Kɛ̀ à gàa aɛ féte, ben à kùɛ tↄↄtɛ à adua kɛ̀ tó eé sí kɛ, gurↄ zaka pì gɛ̃tɛala. 36À bè: Baa, ma De, baabↄ píngi è sí kɛnnɛ. Ǹ togo'i kɛ̀ síma, mↄde èe kɛ yã kɛ̀ má yezinlo, sé kɛ̀ ń yezi. 37Ben à lìara à sù à a ìbanↄ lè, aↄ̃ↄe ii oo. Ben à bè Pitanɛ: Simↄ, nɛ́ɛ ii oon yↄ́? Nɛ́ɛ fↄ̃ n itɛ̃ kɛ̀ baa awa doroo? 38À itɛ̃ kɛ àgↄ̃ adua kɛɛ lɛ àton fu yↄ̃agwanaaro yãnzi. Ninii yezi, mↄde mɛ̀ busɛ. 39À lìara à gàa adua kɛ, ben à yã dↄ̃nkↄ̃ pì ò dↄ. 40Kɛ̀ à lìara à sù à ń lé, aↄ̃ↄe ii oo, zaakɛ aↄ̃ↄe imioo dɛdɛɛ. Aↄ̃ dↄ̃ dian weé yã onɛ nàro. 41À suna gɛ̃̀n aagↄ̃deeo à bèńnɛ: Ée ii oo, ée kámma boo ai tian yↄ́? À mↄ̀ lɛ. Gurↄↄ kà sa. À gwa, wà Gbɛ̃ntee Nɛ́ kpà durunkɛrinↄa. 42À fɛɛ wà gá. Gbɛ̃ kɛ̀ ma kpaḿma pì e mↄↄ fá.

Yesu kũna

(Mat 26:47-56, Luk 22:47-53, Yoh 18:3-12)

43Kɛ̀ à kpɛ́ èe yã pì oo, ben Yudasi à gↄ̃ↄn kuri awɛɛplaaanↄ doke mↄ̀ kↄ̃n pariio, aↄ̃ↄ fɛ̃ɛdaanↄ kũkũna kↄ̃n gònↄ. Aↄ̃ bↄ̀ sa'orikinↄ kↄ̃n ludayãdannɛrinↄ kↄ̃n gbɛ̃nsinↄ kiia. 44Bↄnkpɛɛdee pì sↄ̃ sèeda òńnɛ à bè: Gbɛ̃ kɛ̀ mɛ́ lɛ́ pɛ́a, àmbe gwe. À à kũ gbãa à táo. 45Ben à mì pɛ̀ Yesua gↄ̃ↄ à bènɛ: Rabi! Ben à lɛ́ pɛ̀a. 46Ben wà ↄ pɛ̀ɛ Yesua wà à kũ̀ gíngin. 47Ben gbɛ̃ kɛ̀ aↄ̃ↄ zɛna gweenↄ doke a fɛ̃ɛdaa wòto à sa'oriki ìsi zĩ̀ri ke lɛ̀o à à swã gò. 48Ben Yesu bèńnɛ: Kpãi wɛ́ɛdewɛn ma ũ, kɛ̀ a mↄ à ma kũ kↄ̃n fɛ̃ɛdaanↄ kↄ̃n gònↄoↄ́? 49Mɛɛ̀gↄ̃ kúao Luda ua lán guu e dↄↄ nà, mɛɛ̀gↄ̃ yã daaare, ée ma kũro. Mↄde sé yã kɛ̀ wà kɛ̃̀ Luda yãn papa. 50Ben à ìbanↄ bàa lɛ̀ ń píngi aↄ̃ à tòn.

51Gↄ̃kparɛ kee tɛ́zi à pↄ́ke danaro, táaru bisan à kùala. Kɛ̀ wà à kũ̀, 52ben à bↄ̀ ń ↄzĩ à a bisa tòńnɛ gwe à bàa sì à tà bũu.

Yuda gbãadeenↄ yãkpaɛkɛna kↄ̃n Yesuo

(Mat 26:57-68, Luk 22:54-55,63-71, Yoh 18:13-14,19-24)

53Ben aↄ̃ gàa Yesuo sa'oriki ìsi bɛ. Sa'orikinↄ kↄ̃n gbɛ̃nsinↄ kↄ̃n ludayãdannɛrinↄ kàkↄ̃a gwe ń píngi. 54Pita tɛ́ à kpɛɛ kãaa ai à gàa à gɛ̃̀ sa'oriki ìsi bɛ ua guu. À vɛ̃̀ɛ gwe, èe tɛ́ kpákpaa kↄ̃n dogarinↄ lɛdo. 55Sa'orikinↄ kↄ̃n Yuda yãkpaɛkɛrinↄ ń píngi e sèeda wɛtɛɛ Yesuzi wà à dɛ, ben aↄ̃ↄe ero. 56Wà ɛgɛyã dìdia pari, mↄde aↄ̃ yãkee e kↄ̃ sɛ́ro. 57Ben gbɛ̃kenↄ fɛ̀ɛ wà ɛgɛyã dìdia wà bè: 58Wá mà à bè é Luda kpɛ́ kɛ̀ gbɛ̃ntee bò wí é à pãnde bo gurↄ aagↄ̃ↄ dagura kɛ̀ gbɛ̃ntee e boro. 59Baa kↄ̃n beeeo aↄ̃ yã e kↄ̃ sɛ́ro. 60Ben sa'oriki ìsi fɛ̀ɛ à zɛ̀ ń aɛ à Yesu gbèka: Ń yãke vĩ ǹ weńlaroo? Yã kɛ̀ wèe didiimmaa kɛ̀ dɛ diaa? 61Yesu yĩtɛ kpɛ̃ èe yãke weàlaro, ben sa'oriki ìsi pì ɛ̀ara à à gbèka: Ḿbe Mɛsaya, Luda Aubarikade Nɛ́ ũↄ́? 62Ben Yesu bè: Mámbe à ũ. É Gbɛ̃ntee Nɛ́ e vɛ̃ɛna Gbãapingide ↄplaazi, bensↄ̃ é à suna e ludambɛ luguun. 63Ben sa'oriki ìsi pì a utanↄ gà à kɛ̃̀ à bè: À kɛ̀ dia wée sèedade pãnde kenↄ wɛtɛɛ dↄee? 64Á mà lán à dↄkɛ̀ Ludao nà. Yã kpareen a zɛo tiaa? Ben aↄ̃ yã dààla ń píngi aↄ̃ bè wà à dɛ. 65Ben gbɛ̃kenↄ fɛ̀ɛ wà lóu sùa. Ben wà pↄ́ yìnɛ à uua, wèe à lɛ́lɛɛ ↄkũo wèe beenɛ: Ǹ annabikɛyã o ǹ gbɛ̃ kɛ̀ n lɛɛ o. Ben dogarinↄ à kũ̀ aↄ̃ à swãn kɛ̀kɛ.

Pita lɛ́sɛna Yesuzi

(Mat 26:69-75, Luk 22:56-62, Yoh 18:15-18,25-27)

66Pita kú ua guu gĩzĩ, ben sa'oriki ìsi zↄ̀nↄkparɛnↄ doke mↄ̀ gwe. 67Kɛ̀ à Pita è èe tɛ́ kpákpaa, ben à wɛ́ɛ pɛ̀a à bènɛ: Mpi sↄ̃ nɛɛ̀gↄ̃ kú lɛdo kↄ̃n Yesu Nazarɛtiomɛ. 68Ben à lɛ́ sɛ̀ à bè: Má à dↄ̃ro, mɛ́ɛ yã kɛ̀ nɛ́ɛ oo dↄ̀rↄ dↄ̃ro. Ben à fɛ̀ɛ à gɛ̃̀ gãnun. 69Kɛ̀ zↄ̀nↄkparɛ pì à è gwe dↄ, ben à ò gbɛ̃ kɛ̀ aↄ̃ↄ zɛna gweenↄnɛ à bè: Aↄ̃ gbɛ̃ mɛ̀n doon yɛ̀. 70Ben Pita lɛ́ sɛ̀ dↄ. Kɛ̀ à kɛ̀ saa féte, gbɛ̃ kɛ̀ aↄ̃ↄ zɛna gweenↄ bè Pitanɛ: Yãpuramɛ aↄ̃ gbɛ̃ doon n ũ, zaakɛ Galili gbɛ̃n n ũ. 71Ben à fɛ̀ɛ à e a zĩnda kà à la dà à bè: Má gbɛ̃ kɛ̀ ée à yã oo pì dↄ̃ro. 72Zaa gwe gↄ̃ↄn koo lɛ́ gɛ̃̀n plaadee zù, ben yã kɛ̀ Yesu ò dↄ̀ Pitan, kɛ̀ à bè, ai koo gↄ̃ gá lɛ́ zu gɛ̃̀n plaa, eé lɛ́ sɛ́azi gɛ̃̀n aagↄ̃. Ben à nà ↄ́ↄdↄnaa.

Currently Selected:

MAAKU 14: BBB

Highlight

Copy