MAAKU 11

Gbãakɛkpana Yesuzi Yerusalɛmu

(Mat 21:1-11, Luk 19:28-40, Yoh 12:12-19)

1Kɛ̀ aↄ̃ kà kĩi kↄ̃n Yerusalɛmuo, aↄ̃ kà Bɛtɛfage kↄ̃n Bɛtani kɛ̀ kú Kùkpɛ sĩ̀sĩgɛɛzio, ben Yesu a ìbanↄ zĩ̀ gↄ̃ↄn plaa 2à bèńnɛ: À gá lakutu kɛ̀ káɛ a aɛ kɛ̀kãa guu. Tó a gɛ̃ gↄ̃ↄ, é zaakinɛ bↄ̀rↄ e bàdↄna gwe, gbɛ̃kee e dia zikiro. À poro à suo. 3Tó wà a la wà bè, bↄ́n ée kɛɛ gwe, à be Dii bé à yezi, eé ɛara à suo tia. 4Ben aↄ̃ gàa aↄ̃ zaaki è bà dↄna kpɛɛlɛa bàazi. Kɛ̀ aↄ̃ↄe poroo, 5ben gbɛ̃ kɛ̀ aↄ̃ↄ zɛ gweenↄ ń lá wà bè: Bↄ́n ée kɛɛ zaaki pìo kɛ̀ ée poroo? 6Aↄ̃ wèńla lán Yesu òńnɛ nà, ben wà ń tó aↄ̃ táo. 7Aↄ̃ sù zaaki pìo Yesunɛ, aↄ̃ ń utanↄ kpàɛa, ben Yesu dìa. 8Gbɛ̃nↄↄ e ń utanↄ kpaɛɛ zɛ́ guu pari, gbɛ̃kenↄ e lánↄ zↄ̃ↄ sɛ̃̀n aↄ̃ↄe kpaɛɛ dↄ. 9Gbɛ̃ kɛ̀ aↄ̃ↄ tɛ́ aɛzĩnↄ kↄ̃n gbɛ̃ kɛ̀ aↄ̃ↄ tɛ́ kpɛɛnↄↄ e wii lɛɛ wèe bee:

Ǹ gbãaa kɛ!

Aubarikadeen gbɛ̃ kɛ̀ èe mↄↄ kↄ̃n Dii tↄ́o ũ.

10Luda aubarika da wa dezi Dauda kpata kɛ̀ èe bↄↄ gupuraaan.

Wà gbãakɛ kpázi ai ludambɛ.

11Kɛ̀ Yesu kà Yerusalɛmu, à gɛ̃̀ Luda ua, ben à baabↄ píngi gwà à lìgazi. Kɛ̀ ↄfãntɛ̃ e gɛ̃ɛ kpɛ́n yãnzi, ben à bↄ̀ à gàa Bɛtani kↄ̃n a ìba gↄ̃ↄn kuri awɛɛplaaanↄ.

Kãkã lí kana kↄ̃n Yesu kuuna Luda uao

(Mat 21:12-22, Luk 19:45-48, Yoh 2:13-22)

12Kɛ̀ guu dↄ̀, aↄ̃ bↄ̀ Bɛtani, ben nↄaa e Yesu dɛɛ. 13À kãkã lí è kãaa à lá kù. Ben à gàa gwa ke tó à bɛɛ vĩ. Kɛ̀ à kà gwe, èe pↄ́ke ero, sé à lánↄ, zaakɛ kãkã magurↄↄ e ká kↄ̀ro. 14Ben à bè lí pìnɛ: Gbɛ̃ke é n bɛɛ ble ziki dↄro. À ìbanↄ yã pì mà.

15Kɛ̀ aↄ̃ kà Yerusalɛmu, Yesu gɛ̃̀ Luda ua guu, ben à pɛ̀ laayarinↄa kↄ̃n laalurinↄ à ń bↄɛ. À ↄↄlendekɛrinↄ teebunↄ kↄ̃n pↄ̃tɛ̃ɛyarinↄ kìtanↄ yĩ̀pa à kwɛ̀ńnɛ. 16Èe we gbɛ̃ke a asoo sɛ̀ à gɛ̃̀tɛo Luda ua guuro. 17Ben à yã dà gbɛ̃nↄnɛ à bè: Wà kɛ̃̀ Luda yãn wà bè: Ma kpɛ́ égↄ̃ dɛ aduakɛkpɛ ũ bori pínginɛ, ben á kɛ̀ gbɛ̃blerinↄ tò ũ. 18Sa'orikinↄ kↄ̃n ludayãdannɛrinↄ yã pì mà, ben aↄ̃ↄe zɛ́ wɛtɛɛ wà à dɛ. Aↄ̃ↄe vĩa kɛɛnɛ, zaakɛ à yãdannɛna bↄ̀ baade píngi saɛ. 19Kɛ̀ uusiɛ kɛ̀, ben Yesu kↄ̃n a ìbanↄ bↄ̀ɛ wɛ́tɛ pì guu.

20Kɛ̀ guu dↄ̀, aↄ̃ↄe gɛ̃tɛɛ, ben aↄ̃ kãkã lí pì è à gàga kↄ̃n a kãsãao. 21Ben à yã dↄ̀ Pitan, ben à bè Yesunɛ: Rabi, ǹ kãkã lí kɛ̀ ń kà gwa, à kori kũ̀. 22Yesu wèńla à bè: Àgↄ̃ Luda náanɛ vĩ. 23Yãpuraan mɛ́ɛ ooare, tó gbɛ̃ ò kpiii kɛ̀nɛ à fɛɛ à a zĩnda sɛ́ à zu sɛ̀bɛn, tó èe seka kɛ a nↄ̀sɛ guuro, tó à náanɛ vĩ kɛ̀ yã kɛ̀ à ò pì é kɛ, eé kɛnɛmɛ. 24Beee yãnzi mɛ́ɛ ooare, tó ée adua kɛɛ, yã kɛ̀ a à wɛ́ɛ kɛ̀ píngi, à diɛ à gĩakɛ á è kↄ̀, é sↄ̃ e. 25Tó a fɛɛ ée adua kɛɛ, tó á nↄ̀sɛ zaaa vĩ gbɛ̃keo, à kɛ̃nɛ, lɛ a De kɛ̀ kú musu a durunnↄ kɛ̃are dↄ. 26Tó ée gbɛ̃nↄ kɛ̃ sↄ̃ro, a De kɛ̀ kú musu é a taarinↄ kɛ̃are sero.

Yesu gbekana a ikozi

(Mat 21:23-27, Luk 20:1-8)

27Ben aↄ̃ kà Yerusalɛmu. Lán Yesu e lili oo Luda ua guu nà, sa'orikinↄ kↄ̃n ludayãdannɛrinↄ kↄ̃n gbɛ̃nsinↄ mↄ̀ 28wà à là wà bè: Iko kpareen nɛ́ɛ yã kɛ̀nↄ kɛɛo? Dé bé à n gba yã pì kɛna iko? 29Ben Yesu wèńla à bè: Yã mɛ̀n doon mɛ́ gbekaawa. À wemala, mɛ́ iko kɛ̀ mɛ́ɛ yã kɛ̀nↄ kɛɛo oare. 30À omɛ. Yaaya gbɛ̃nↄ batisikɛna bↄ̀ Luda kiian yↄ́, ke gbɛ̃ntee kiiamɛ? 31Ben aↄ̃ yã gↄ̃̀gↄ̃ wà bè: Tó wa bè Luda kiiamɛ, eé wa la bↄ́yãnzin wée Yaaya yã sírozi. 32Tó wa bè gbɛ̃ntee kiiamɛ sↄ̃, tↄ̀! Aↄ̃ gbɛ̃nↄ vĩa vĩ, zaakɛ gbɛ̃ píngi Yaaya annabikɛɛ sì. 33Ben aↄ̃ wè Yesula wà bè: Wá dↄ̃ro. Ben Yesu bèńnɛ: Ɛ̃ndɛ̃ mapi se, mɛ́ iko kɛ̀ mɛ́ɛ yã kɛ̀nↄ kɛɛo oarero.

Currently Selected:

MAAKU 11: BBB

Highlight

Copy