NAANA 49

Yakubu sa'olɛkɛna a nɛ́nↄnɛ

1Yakubu a nɛ́nↄ sìsi, ben à bè:

À kↄ̃ kakↄ̃a

mà yã kɛ̀ eé a le ziakpɛɛ zĩ oare.

2À kↄ̃ kakↄ̃a ma nɛ́nↄ à swã kpá,

à a de Isaraili yã ma.

3Rubɛni ma daudu ma gbãaa,

ma kana gↄ̃ lɛ́zĩ nɛ́ káaku,

n bɛ̀ɛ dɛńla kↄ̃n n gbãaao.

4Ń pãsĩ lán ísↄ̃ bà,

mↄde nɛ́gↄ̃ dɛńlaro,

zaakɛ n didi n da n de gádoa,

n daɛ kↄ̃n ma nↄↄnↄ dokeo.

5Simɛↄ kↄ̃n Levio bé wà kↄ̃ gbɛ̃nↄ ũ,

aↄ̃ↄ pãsĩ kↄ̃n fɛ̃ɛdaao.

6Ma lɛ́ kú aↄ̃ kakↄ̃ana guuro,

ma baka kú aↄ̃ yãgↄ̃gↄ̃na guuro,

zaakɛ aↄ̃ gbɛ̃nↄ dɛ̀dɛ pↄfɛ̃ guu,

aↄ̃ zù gbátĩkyanↄ zↄ̃̀zↄ̃ lán aↄ̃ↄ yezi nà.

7Luda láari zĩḿma ń pↄfɛ̃ bíta yãnzi,

à lɛ́ kɛńnɛ ń pãsĩkɛ yãnzi.

Mɛ́ ń kɛ̃kↄ̃a Yakubu boriinↄ tɛ́,

mɛ́ ń boriinↄ fãakↄ̃a Isarailinↄ guu.

8Yuda, n gbɛ̃nↄ é n tↄ́ kpá.

Nɛ́ n ibɛɛnↄ kũ ń waaa,

n de nɛ́nↄ é kúɛnnɛ.

9Yuda dɛ lán músu bà,

ma nɛ́ pì è su kↄ̃n tofekao.

È gáɛ è daɛ a tòn.

dé bé é fↄ̃ à à fɛɛɛ?

10Kpata é gu Yudalaro,

à boriinↄ bé weégↄ̃ gò kũna

ai Silo gá mↄ́,

bori píngi é mì siɛnɛ.

11Eé a zaaki dↄ geepi lía,

eé a zaakinɛ yi geepi lí maaaa.

Geepiwɛ̃ɛ égↄ̃ dizimɛ

eé a pↄ́kãsãanↄ pípio

eé a uta pípi kↄ̃n geepi'io.

12Geepiwɛ̃ɛ é à wɛ́ɛ tɛ̃a kũ,

zwii é a swaa pura kũ.

13Zɛbuluni égↄ̃ kú ísiaa saɛ,

à bùsu égↄ̃ dɛ góro'itɛnↄ bàdↄkii ũ,

à bùsu lɛ́ é zɛ Sidↄ̃.

14Isaka dɛ lán zaaki gbãaa

kɛ̀ daɛna aso mɛ̀n plaaa dagura bà.

15Tó à boriinↄↄ è ń kámmabokii maa,

bensↄ̃ aↄ̃ bùsu pì vɛ̃ɛna nna,

aↄ̃é naɛ asosɛnanɛ wà zↄ̀zĩi kɛ.

16Dani é a gbɛ̃nↄ bↄ yãn

Isaraili boriinↄ doke ũ.

17Dani égↄ̃ dɛ lán mlɛ̃̀ kɛ̀ kú zɛ́ saɛ bà,

lán pitigoo kɛ̀ kú zɛ́wɛwɛ guu bà.

È sↄ̃ lɛ́ a gbáa,

lɛ gbɛ̃ kɛ̀ di à musu lɛ́ɛ a kpɛɛgãnda.

18Dii, mɛɛ̀ wɛ́ɛ dↄ n mìsinazi.

19Gada sↄ̃, zĩ̀kpɛɛnↄ é sińgu,

mↄde aↄ̃é lɛ́ɛ ń gbɛ̃ zãadeenↄa.

20Asa blɛwɛɛ égↄ̃ nↄ́si vĩ,

pↄ́blee kɛ̀ à blena nna kínanↄnɛn eé kpá.

21Nafatali dɛ lán gbɛ̃ɛ lí

kɛ̀ è gã̀ maaanↄ kɛɛ bà.

22Yusufu dɛ lán lí nɛ́'iri

kɛ̀ kú bia saɛ bà,

à gã̀nↄ è poro à da gũ̀la.

23Kàzurinↄ é íbɛtɛ kpáo,

aↄ̃é pɛ́a kↄ̃n kào.

24Eégↄ̃ a sá kũna degena sai

Yakubu Luda Gbãabitade gãzĩ,

à ↄ gbãaa égↄ̃ wãa

Isarailinↄ Gbɛ̀si kɛ̀ è dↄnɛ aɛ yãnzi.

25N de Luda é dↄnlɛ,

Gbãapingide é aubarika dangu

kↄ̃n lou'i kɛ̀ è bↄ musuo,

kↄ̃n aubarika kɛ̀ kaɛna tↄↄtɛ gĩzĩo,

lɛ n nↄↄnↄ kↄ̃n n pↄ́nↄ gↄ̃ dɛ nɛ́dandeenↄ ũ.

26Sa'olɛ kɛ̀ n de kɛ̀nnɛɛ

dɛ ma dezinↄ pↄ́la,

à bíta dɛ kpii ziinↄla.

Luda tó aubarika kɛ̀nↄ gↄ̃ Yusufu mìa,

gbɛ̃ kɛ̀ wà dìɛ adona a gbɛ̃nↄ tɛ́ musu.

27Bɛyãmi dɛ lán lɛwan pãsĩ bà,

eè lɛ́ɛ gbɛ̃nↄa kↄngↄ

eè ń pↄ́nↄ kpaatɛ uusiɛ.

28Isaraili bori mɛ̀n kuri awɛɛplaaanↄn gwe ń píngi. Sa'olɛ kɛ̀ aↄ̃ dee kɛ̀ńnɛn gwe baade kↄ̃n a pↄ́o.

Yakubu ga kↄ̃n à vĩinao

29Ben à bèńnɛ: Tó ma anduna tò, à ma vĩi ma dezinↄ gbɛ̀wɛɛ kɛ̀ kú Iti bori Ɛflↄnu buraa guu. 30Gbɛ̀wɛɛ pì kú Makpɛlamɛ, Mamare ↄfãntɛ̃bↄɛ kpa Kanaa bùsun, buraa kɛ̀ Ibraĩ lù Iti bori Ɛflↄnua mirawɛɛ ũ. 31Gwen wà Ibraĩ kↄ̃n a naↄ̃ Sarao vĩ̀in. Gwen wà Isaaku kↄ̃n a naↄ̃ Rɛbɛkao vĩ̀in. Gwen ma Lea vĩ̀in. 32Wà buraa pì kↄ̃n a gbɛ̀wɛɛo lù Itinↄamɛ. 33Kɛ̀ Yakubu lɛ́ dìɛ a nɛ́nↄnɛ à yã̀a, à ɛ̀ara à dàɛ, ben à gà.

Currently Selected:

NAANA 49: BBB

Highlight

Copy