NAANA 24
24
Nↄwɛtɛna Isaakunɛ
1Ibraĩ zi kũ̀ à gurↄↄnↄ kà zã̀, ben Dii aubarika dàn yã píngi guu. 2Ben à ò a zↄ̀blerinↄ gbɛ̃nsi kɛ̀ dɛ a pↄ́ píngi yãgↄ̃gↄ̃ri ũunɛ à bè: Ǹ ↄ sↄtↄ ma gbáda gbáru, 3mɛ́ tó ǹ sí kↄ̃n Dii musu kↄ̃n tↄↄtɛo Luda tↄ́o kɛ̀ nɛ́ Kanaa kɛ̀ má kú ń tɛ́nↄ nↄↄ sɛ́ ma nɛ́nɛro. 4Ǹ gá ma bɛ bùsun ma danɛnↄ guu, ǹ nↄↄ sɛ́ ma nɛ́nɛ gwe. 5Ben à zↄ̀bleri pì à là à bè: Tó nↄgbɛ̃ pì e we à tɛ̀mazi à sùmao bùsu kɛ̀kiin sↄ̃ro nɛ́? Mɛ́ gá kↄ̃n n nɛ́o bùsu kɛ̀ n bↄnn yↄ́? 6Ibraĩ bènɛ: Ǹ làakari kɛ! Ǹton gá kↄ̃n ma nɛ́o gwero. 7Dii Luda Musude ma bↄ ma de bɛ ma danɛnↄ bùsun, ben à yã òmɛ à la dà à bè é bùsu kɛ̀kii kpá ma boriinↄamɛ. Àmbe eé a Malaika zĩ à dↄnnɛ aɛ. Gwen nɛ́ nↄↄ sɛ́n ma nɛ́nɛ. 8Tó nↄgbɛ̃ pì e we à tɛ̀nziro, n bↄ ladana kɛ̀ ń la dàmɛɛ kɛ̀ guu. Ǹton gá gwe kↄ̃n ma nɛ́oro fá! 9Ben à zↄ̀bleri pì a ↄↄ sↄ̀tↄ a dii gbáda gbáru, à la dànɛ yã pì musu.
10Zↄ̀bleri pì a dii lakuminↄ sɛ̀ mɛ̀n kuri kↄ̃n a dii auziki bori píngio, ben à fɛ̀ɛ à gàa Nao bɛ wɛ́tɛ zaa Siria Mɛsↄpↄtamia bùsun. 11Kɛ̀ à kà gwe, à tò lakuminↄ kámma bò lↄ̀gↄ saɛ wɛ́tɛ kpɛɛ. Kɛ̀ uusiɛ kɛ̀, gurↄↄ kɛ̀ nↄgbɛ̃nↄ è bↄɛ í tↄ́, 12ben à adua kɛ̀ à bè: Dii, ma dii Ibraĩ Luda, ǹ gbɛ̃kɛɛ kɛ ma diinɛ ǹ tó ma tá kɛ nna uusiɛa. 13Ǹ gwa, má zɛna lↄ̀gↄ saɛ. Tó wɛ́tɛ nↄkparɛnↄ bↄ̀ɛ í tↄ́, 14nↄkparɛ kɛ̀ má ònɛ à a loo pita à í tↄ́mɛ mà mi, tó à bèmɛ mà mi, ben à kpà ma lakuminↄa dↄ, ɛ̃ndɛ̃ mɛ́ dↄ̃ kɛ̀ n gbɛ̃kɛɛ kɛ̀ ma diinɛ, nↄgbɛ̃ kɛ̀ ń dìɛ n zↄ̀bleri Isaaku pↄ́ ũun gwe. 15Èe yã pì o à yã̀aro, ben Bɛtuɛli nɛ́ Rɛbɛka bↄ̀ kↄ̃n looo dina a gã̀n. Bɛtuɛli nɛ́ Ibraĩ vĩ̀i Nao nɛ́ kɛ̀ à ì kↄ̃n a naↄ̃ Milikaomɛ. 16Nɛ́ pì maa bensↄ̃ à lɛzimɛ, gↄ̃gbɛ̃ kee e daɛo zikiro. À mↄ̀ lↄ̀gↄzi, à í tↄ̀ à a loo pà, ben à lìara èe taa. 17Ben zↄ̀bleri pì bàa lɛ̀ à gàa à zɛ́ zↄ̃̀nɛ à bè: Ǹ ma gba í mà mi, baa féte. 18Nↄgbɛ̃ pì bè: Ǹ mi Baa! Ben à a loo pìta gↄ̃ↄ à í kpàa à mì. 19Kɛ̀ à í kpàa à mì à yã̀a, à bè: Mɛ́ tↄ́ n lakuminↄnɛ dↄ, aↄ̃ mi ai aↄ̃ kã. 20Ben à a lo'i kà pↄ́nↄ ímibↄn gↄ̃ↄ, à lìara à bàa lɛ̀ à gàa à í tↄ́ lↄ̀gↄn, ben à í tↄ̀ lakuminↄnɛ píngi. 21Gↄ̃gbɛ̃ pì zɛna èe à gwaa tíii, lɛ à e à dↄ̃ tó Dii é tó a tá kɛ nna, ke eé kɛ nnaro. 22Kɛ̀ lakuminↄ í mì aↄ̃ yã̀a, ben gↄ̃gbɛ̃ pì vura tãnga maaa dà nↄↄ pìnɛ a yĩa, à vura zãa dànɛ mɛ̀n plaa. Tãnga pì tìisi kà giramu sↄↄro, zãa pìnↄ sↄ̃ giramu basↄsↄↄro. 23Ben à à là à bè: Ǹ omɛ, dé nɛ́n n ũu? Wé ikii e n de bɛↄ́? 24Ben à wèàla à bè: Bɛtuɛli nɛ́n ma ũ, Milika kↄ̃n Nao dio. 25Sɛ̃̀ kↄ̃n tàgaao din wa bɛ, ben ikii kuu dↄ. 26Ben gↄ̃gbɛ̃ pì kùɛ à dↄnzi kɛ̀ Diinɛ à bè: 27Dii ma dii Ibraĩ Luda aubarika vĩ kɛ̀ èe gí gbɛ̃kɛ kↄ̃n náanɛo yã kɛnɛro yãnzi. Mapi sↄ̃, Dii dↄ̀mɛ aɛ ma dii danɛnↄ bɛ.
28Ben nↄkparɛ pì bàa lɛ̀ à gàa à yã pì tↄ̃kɛ̃̀ a bɛdeenↄnɛ. 29Rɛbɛka pì dãgↄ̃ vĩ kɛ̀ wè benɛ Labã. À bↄ̀ wɛ́tɛ kpɛɛ kↄ̃n bào à gàa à gↄ̃gbɛ̃ pì lè lↄ̀gↄ lɛ́a, 30zaakɛ à è a dãre tãnga kↄ̃n zãao dana, ben à yã kɛ̀ gↄ̃gbɛ̃ pì ònɛ mà. Kɛ̀ à gàa à à lè kↄ̃n lakuminↄ lↄ̀gↄ lɛ́a, 31à bè: Ǹ mↄ́ mmↄn kɛ̀ Dii aubarika dàngu! À kɛ̀ dia ń zɛna wɛ́tɛ kpɛɛ? Ma kpɛ́ kɛ̀kɛnnɛ kↄ̃n lakuminↄ bàdↄkiio. 32Gↄ̃gbɛ̃ pì gɛ̃̀ ua, ben Labã lakuminↄ asoo pòro à sɛ̃̀la kori kↄ̃n tàgaao kpàḿma à í kpà gↄ̃gbɛ̃ pìa à a gbá pípio kↄ̃n à gbɛ̃nↄ ń píngi.
33Wà pↄ́blee dìɛnɛ, ben à bè: Mɛ́ pↄ́ ble gĩaro ai mà yã kɛ̀ ma mↄo o. Ben Labã bè: Ǹ o. 34Ben à bè: Ibraĩ zↄ̀blerin ma ũ. 35Dii aubarika kɛ̀ ma diinɛ maamaa, ben à gↄ̃̀ auzikidee ũ. À à gbà sãanↄ kↄ̃n zùnↄ kↄ̃n kondogio kↄ̃n vurao kↄ̃n gↄ̃gbɛ̃ zĩkɛrinↄ kↄ̃n nↄgbɛ̃ zĩkɛrinↄ kↄ̃n lakuminↄ kↄ̃n zaakinↄ. 36Ma dii pì naↄ̃ Sara nɛ́ ì gↄ̃gbɛ̃ ũ a zikũ guu, ben ma dii pↄ́ kɛ̀ à vĩi kpà nɛ́ pìa píngi. 37Ma dii tò ma la dà, zaakɛ à bè màton Kanaa kɛ̀ à kú ń tɛ́nↄ nↄↄ sɛ́ a nɛ́nɛro. 38À bè mà gá a de bɛ a borii guu mà nↄↄ sɛ́ a nɛ́nɛ gwe. 39Ben ma a dii là ma bè, tó nↄgbɛ̃ pì e we à tɛ́mazi sↄ̃ro nɛ́? 40À wèmala à bè, Dii kɛ̀ a táa òo bé eé a Malaika zĩ à gá zɛmɛ, lɛ ma tá kɛ nna, mɛ́ nↄↄ sɛ́ a nɛ́nɛ a de bɛ danɛnↄ tɛ́. 41À bè tó ma gaa a borii kiia, tó wèe wero, mɛ́ bↄ ladana kɛ̀ má la dàaree guu. 42Kɛ̀ ma ka lↄ̀gↄ kiia gbã̀a ma bè: Dii, ma dii Ibraĩ Luda, tó n we, ǹ tó ma tá kɛ nna. 43Má kú lↄ̀gↄ lɛ́a. Nↄkparɛ kɛ̀ mↄ̀ í tↄ́, ben ma bènɛ à ma gba í féte mà mi, 44tó à bè mà mi, ben à tↄ̀ ma lakuminↄnɛ dↄ, mɛ́ dↄ̃ kɛ̀ nↄkparɛ kɛ̀ ń dìɛ à kɛ ma dii nɛ́ pↄ́ ũun gwe. 45Ai màgↄ̃ yã pì o ma nↄ̀sɛ guu mà yãa, ben Rɛbɛka bↄ̀ kↄ̃n looo dina a gã̀n à mↄ̀ lↄ̀gↄ lɛ́a à í tↄ̀. Ben ma bènɛ à ma gba í mà mi. 46À a loo pìta gↄ̃ↄ, à bè mà mi, é kpá ma lakuminↄa dↄ. Kɛ̀ má mì, ben à kpà ma lakuminↄa. 47Ben ma à là, dé nɛ́n à ũu? À bè Bɛtuɛli nɛ́n a ũ, Milika kↄ̃n Nao dio. Ben ma tãnga dànɛ a yĩa, ma zãa dànɛ a ↄↄnↄa. 48Ben ma kuɛ ma dↄnzi kɛ̀ Dii ma dii Ibraĩ Ludanɛ ma sáabu kpàa, zaakɛ à dↄ̀mɛ aɛ zɛ́ maaa guu, lɛ mà a dii vĩ̀i dio sɛ́ à nɛ́nɛ. 49Tia sa tó é we à gbɛ̃kɛ kↄ̃n náanɛo yã kɛ ma diinɛ, à omɛ. Tó ée we sↄ̃ro, à omɛ, mɛ́ gá gu pãndea. 50Labã kↄ̃n Bɛtuɛlio wèàla wà bè: Yã pì bↄ̀ Dii kiiamɛ, wá yãke ona vĩro, à maaa ke à zaaa. 51Rɛbɛkan yɛ̀, ǹ à sɛ́ ǹ táo, à gↄ̃ n dii nɛ́ naↄ̃ ũ lán Dii ò nà. 52Kɛ̀ Ibraĩ zↄ̀bleri pì ń yã mà, à dàɛ tↄↄtɛ Diinɛ. 53Ben à zãblebↄ kɛ̀ wà kɛ̀ kↄ̃n kondogio kↄ̃n vurao kↄ̃n pↄ́kãsãanↄ bↄ̀ɛ à kpà Rɛbɛkaa. À à vĩ̀i kↄ̃n à dao gbà pↄ́ ↄↄdeenↄ dↄ. 54Ben àpi kↄ̃n gbɛ̃ kɛ̀ aↄ̃ↄ kúonↄ pↄ́ blè aↄ̃ í mì, ben aↄ̃ ì gwe.
Kɛ̀ aↄ̃ fɛ̀ɛ kↄngↄ à bè: À ma gbarɛ mà tá ma diizi. 55Nↄↄ vĩ̀i kↄ̃n à dao bè: Ǹ tó nɛ́ pì gↄ̃wao baa gurↄ kuri, é gbasa à tá. 56Ben gↄ̃gbɛ̃ pì bèńnɛ: Lán Dii ma tá kɛ̀ nna nà lán kɛ̀ bà, àton ma dãdã dↄro. À ma gbarɛ mà tá ma dii kiia. 57Ben aↄ̃ bè: Wà nɛ́ pì sísi wà à la. 58Ben wà Rɛbɛka sìsi wà à là wà bè: Nɛ́ tá kↄ̃n gbɛ̃ pìoↄ́? Ben Rɛbɛka bè: Mɛ́ táo. 59Ben aↄ̃ Rɛbɛka gbàrɛ kↄ̃n gwàri kɛ̀ à à gwà zaa à nɛ́ngo zĩo, aↄ̃ↄe taa kↄ̃n Ibraĩ zↄ̀blerio kↄ̃n à gbɛ̃nↄ. 60Aↄ̃ sa maaa ò Rɛbɛkanɛ wà bè:
Nɛ́, ǹ gↄ̃ gbɛ̃ pariinↄ dazi ũ,
n boriinↄ gↄ̃ gbãa vĩ ń zangurinↄa.
61Ben Rɛbɛka fɛ̀ɛ kↄ̃n a nↄgbɛ̃ zĩkɛrinↄ, aↄ̃ dì lakuminↄ kpɛɛ aↄ̃ↄ tɛ́ gↄ̃gbɛ̃ pìzi, ben à tàńyo.
62À mↄ̀ à lè Isaaku sù kↄ̃n lↄ̀gↄ kɛ̀ wè be Ludabɛ̃ɛkɛema'eeo à vɛ̃̀ɛ Nɛgɛvi bùsun. 63À bↄ̀ à gàa à laasuu lɛ́ sɛ̃̀n uusiɛ, ben kɛ̀ à wɛ́ɛ sɛ̀, à è lakuminↄↄ e mↄↄ. 64Rɛbɛka wɛ́ɛ sɛ̀ à Isaaku è se, ben à pìta a lakumi kpɛɛ kpakpaa 65à zↄ̀bleri pì là à bè: Dén gↄ̃gbɛ̃ kɛ̀ èe táa oo sɛ̃̀n èe mↄↄ dawalɛ kãaa ũu? Ben zↄ̀bleri pì wèàla à bè: Ma diimɛ. Ben Rɛbɛka a pↄ́dangãn sɛ̀ à kù a uua. 66Kɛ̀ aↄ̃ kà Isaaku kiia, zↄ̀bleri yã kɛ̀ à kɛ̀ tↄ̃kɛ̃̀nɛ píngi. 67Isaaku gɛ̃̀ kↄ̃n Rɛbɛkao a da Sara bisakutaan, ben à à sɛ̀ à gↄ̃̀ à nↄↄ ũ. À ye nↄↄ pìzi, ben à làakari kpaɛna a da gaa gbɛra.
Currently Selected:
NAANA 24: BBB
Highlight
Share
Copy
Want to have your highlights saved across all your devices? Sign up or sign in
Bokobaru Bible with New Testament and OT Portions © Sim International, 2005.
