ROMUDENƆ 3

1Karana kpaten dena Yuda ũ vĩi? Àre kpaten tɔ̃̀zɔ̃na vĩi? 2À karana vĩ zɔ̃kɔ̃ yã sĩnda pínki gũn. Káaku gĩa Luda a yã nàńnɛ ń ɔĩmɛ. 3Kũ ń gbɛ̃kenɔ náani vĩro, bɔ́n abirekũ vĩi? Ń kunna náani sari ni Luda náani gboro yá? 4Oi! Lɛnlo! À tó Luda gɔ̃ yãpura vĩ, bee kũ gbɛ̃ sĩnda pínki bi ɛ́kɛdemɛ, lákũ ò kɛ̃̀ Luda yãn nà ò pì:

Tó n yã ò, n yã nigɔ̃ zɛ́ vĩ,

tó n yãkpatɛ kɛ̀ kũńwo, n yã ni ble.#Zab 51:4

5Tó ó vãnikɛ dì Luda manakɛ bo gupuraa, bɔ́ yãn óni oo? Óni pi Luda vãni kũ àdi pɔfɛ̃ kipawá yãin yá? Matɛn o lán bisãsiri onaa bàmɛ. 6Oi! Lɛnlo! Tó Luda yãzɛ vĩro, à kɛ̀ dera ani fɔ̃ à yãkpatɛ kɛ kũ anduniaoo? 7Gbɛ̃ke ni pi, tó a ɛ́kɛkɛ tɛn Luda náani kara, akũsɔ̃ àtɛni a tɔ́ bo, bɔ́yãi ani yã daala lán durunnakɛrii bàa? 8Tó n ò lɛ ntɛni pi ò yã vãni kɛ, yã mana ni bon. Gbɛ̃kenɔ ma tɔ́ vãni sì ò pì lɛn madì o lɛ. Luda yãdanlana kɔ̃ sì kũńwo.

Gbɛ̃ke manaro

9Tɔ̀! Ókɔ̃nɔ Yudanɔ ó sã̀nan yá? Lɛnlo fá! Zaakũ ma Yudanɔ kũ buri pãndenɔ bòbo ń dàn ń pínki kɔ̀, ń pínki bi durunna zɔ̀nɔmɛ. 10Ò kɛ̃̀ Luda yãn ò pì:

Gbɛ̃ke manaro, bee mɛ̀n do.

11Laakaride ke kunlo, Luda ki wɛtɛri ke kunlo.

12Ò sã̀sã ń pínki ò gɔ̃̀ dɔ̀rɔɔ sari,

yãmanakɛri ke kunlo, bee mɛ̀n do.#Zab 53:1-3

13Ń kòto de lán mira wɛ̃naa bàmɛ.

Òdi lɛ́nna kɛńnɛ,

ń lɛ́gbɛ bi pitiko sɛwɛmɛ,#Zab 5:9, 140:3

14yã ĩni kũ gbɛ̃kanaao ń lɛ́ pà.#Zab 10:7

15Ò wãna kũ gbɛ̃dɛnaao,

16òdi suńyĩ kũ kisirao kũ wɛ́tãmmao,

17ò aafia zɛ́ dɔ̃ro,

18ń wɛ́ dìgɔ̃ Luda wé'i vĩro.#Zab 36:1

19Ó dɔ̃ kũ Luda doka pínki de gbɛ̃ kũ ò na doka pì ɔĩnɔ pɔ́ ũmɛ, de gbɛ̃ sĩnda pínki lɛ́ gɔ̃ nakɔ̃ana, andunia gbɛ̃ sĩnda pínki gɔ̃ taaride ũ Luda kĩnaa. 20Zaakũ gbɛ̃ke ni bo mana Luda kĩnaa doka pì kũna yãiro.#Zab 143:2, Gal 2:16 Luda doka mɛ́ àdi tó ò durunna dɔ̃.

Deran Luda dì tó yã bo kũńwo nna nà

21Deran Luda dì tó yã bo kũńwo nna nà bò gupuraa sà, lákũ a yã kɛ̃na Musa doka kũ annabinɔ takadanɔ gũn nà. Adi kɛ a doka kũna yãnlo. 22Luda dì tó yã bo kũńwo nna Yesu Kirisi náanikɛna yãimɛ. Gbɛ̃ kũ àtɛni a náani kɛ sĩnda pínki pɔ́mɛ. Gbɛ̃ke bona adoro, 23zaakũ baadi durunna kɛ̀, ò kĩ̀a Luda gakurii. 24Luda dì tó yã bo kũńwo nna gba ũ a gbɛ̃kɛ yãi kũ Kirisi Yesu kũ à ń bó gbãnao. 25Àkũmɛ Luda kpà durunna kútɛkɛbɔ ũ gbɛ̃ kũ òtɛni a aru náani kɛnɔnɛ, de à mɔ́ baadi pínkinɛ kũ adì yã kɛ a zɛ́aamɛ. À mɛna yã, adi durunna zĩnɔ yã daro, 26akũ à mɔ̀ńnɛ tera kũ adì yã kɛ a zɛ́a. Deran Luda dì yã kɛ a zɛ́a nàn gwe, akũsɔ̃ àdi tó yã bo kũ Yesu náanikɛrinɔo nna.

27Bisãsirinɔ ni fɔ̃ ò ĩa dã dɔ yá? Abirekũ ni sí kɛro. Bɔ́yãii? Zaakũ à de zĩkɛna dokaa yã ũro, Yesu naanikɛna yãmɛ. 28Zaakũ ma è yã dì bo kũ gbɛ̃o nna Yesu náanikɛna yãimɛ, zĩkɛna dokaa baasi. 29Luda bi Yudanɔ Ludamɛ ńtɛ̃nɛ yá? Buri pãndenɔ Ludan seroo? Ee, buri pãndenɔ Ludamɛ dɔ. 30Zaakũ Luda mɛ̀n domɛ. Ani tó yã bo kũ gbɛ̃ kũ à tɔ̃̀ɔ zɔ̃̀ɔo nna a náani kũ àtɛn kɛ yãimɛ, akũsɔ̃ ani tó yã bo kũ gyɔfɔrɔdeo nna a náani dokɔ̃nɔ pìi musu. 31Ótɛn doka da pɔ́ke ũro ludanaanikɛna yãin yá? Lɛnlo, ótɛn gbãna kpáaamɛ.

Currently Selected:

ROMUDENƆ 3: BB2005

Highlight

Copy