ROMUDENƆ 16

Fɔkpammanaa

1Matɛni ó dãre Febe, Kɛnkɛrɛa sɔsi gbɛ̃nɔ zĩ̀ri naárɛ á ɔĩ. 2À a sí Dikiri gũn, lákũ à mana Luda gbɛ̃nɔ kɛ kũ kɔ̃o nà. À kpái kũ pɔ́ kũ à yei á kĩnaao pínki, zaakũ à kpà gbɛ̃nɔi dasi kũ makũo se.

3À fɔ kpá Pirisila kũ Akilaooa. Ma zĩkɛri dakenɔmɛ Kirisi Yesu zĩ gũn.#Zĩr 18:2 4Ò sì ò ń zĩda da kari gũn ma yãi. Adi kɛ makũmɛ madoro, buri pãnde sɔsinɔ gbɛ̃nɔ tɛni ń sáabu kpá pínki dɔ.

5À fɔ kpá sɔsi gbɛ̃ kũ òdigɔ̃ kɔ̃ kakara ń ɔnnnɔa.

À fɔ kpá ma gbɛ̃ yenyĩde Ɛpɛnɛtua, àkũ kũ à Kirisi náani kɛ̀ Asia bùsun káaku.

6À fɔ kpá Mariamaa, àkũ kũ à zĩ kɛ̀árɛ manamana.

7À fɔ kpá Andarɔniku kũ Yuniaooa. Ma buri dake kũ ò ó dá kpɛ́siran lɛɛlɛnɔmɛ. Ò tɔ́ bò Luda zĩ̀rinɔ tɛ́, akũsɔ̃ ò kú Kirisi gũn ma ã.

8À fɔ kpá Ampliatu kũ à de ma gbɛ̃ yenyĩde ũ Dikiri gũnwa.

9À fɔ kpá Ubanu kũ à de ó zĩkɛri dake ũ Kirisi zĩ gũnwa kũ ma gbɛ̃ yenyĩde Satakio.

10À fɔ kpá Apɛlɛ kũ à zɛna gbãna Kirisi gũnwa.

À fɔ kpá Arisitɔbulu bedenɔa.

11À fɔ kpá ma Yuda dake Hɛrɔdiɔ̃a.

À fɔ kpá Nasisu bede kũ ò kú Dikiri gũnnɔa.

12À fɔ kpá Tirifɛna kũ Tirifosaooa. Nɔgbɛ̃ pìnɔ dì zĩ kɛ Dikirinɛ manamana.

À fɔ kpá Pɛsia. Nɔgbɛ̃ yenyĩde pì zĩ kɛ̀ Dikirinɛ manamana.

13À fɔ kpá Rufu kũ à bò ado Dikiri zĩ gũnwa kũ a da kũ matɛn gwa ma da ũo.

14À fɔ kpá Asinkiritua kũ Flɛgɔ̃o kũ Ɛmɛsio kũ Patarobao kũ Ɛmao kũ ń Yesude dake kũ ò kú lɛɛlɛnɔ ń pínki.

15À fɔ kpá Filɔlɔgua kũ Yuliao kũ Nɛrɛuo kũ a dãreo kũ Ɔlimpao kũ Luda gbɛ̃ kũ ò kú lɛɛlɛnɔ ń pínki.

16À fɔ kpákɔ̃a kũ Luda gbɛ̃nɔ lɛ́pɛmmanaao. Kirisi sɔsinɔ gbɛ̃nɔ fɔ kpàáwa ń pínki.

Lɛ́zammanaa

17Ma gbɛ̃nɔ, matɛn oárɛ à laakari kɛ gbɛ̃ kũ ò bò yã kũ a dàda kpɛnɔi. Òdi gbɛ̃nɔ kɛ̃kɔ̃a ò gbɛ̃nɔ sãtɛ. À kɛ̃ḿma, 18zaakũ gbɛ̃ bire takanɔ dì do ó Dikiri Kirisiiro, sé ń gbɛrɛ yã. Òdi taarisaridenɔ sãtɛ kũ lɛ́nnao kũ yãdɔ̃o. 19Gbɛ̃ sĩnda pínki á mìnatɛna Dikirinɛ baaruu mà. Matɛn pɔnna kɛ á yã musu. Má ye àgɔ̃ yã mana ɔ̃ndɔ̃ vĩ àgɔ̃ wɛ́siradenɔ ũ yã vãni musu. 20Luda Aafiade ni Setan dúgu zɔ̃ á gbá zĩtɛ tera. Ó Dikiri Yesu gbɛ̃kɛ kɛárɛ.

21Ma zĩkɛri dake Timɔti#Zĩr 16:1 kũ ma buri dakenɔ Lusiu kũ Yasɔ̃o kũ Sosipatao fɔ kpàáwa.

22Makũ Tɛtiu kũ ma takada dí kɛ̃̀ fɔ kpàáwa Dikiri gũn.

23-24Ma bede Gayusi#Zĩr 19:29 kũ sɔsi gbɛ̃nɔ dì kɔ̃ kakara a ɔnn fɔ kpàáwa. Wɛ̃tɛ ɔgɔ'utɛri Erasatu fɔ kpàáwa kũ ó gbɛ̃ndo Kaatuo.

Luda tɔ́bɔnaa

25Tera sà Luda ni fɔ̃ à á gba gbãna kũ Yesu Kirisi baaru kũ matɛn kpáo, lákũ asiriyã kũ à utɛna zaa káaku kũ ò bìriamɛnɛo de nà. 26Luda kũ àdigɔ̃ kun gɔrɔ sĩnda pínki dìtɛ ò yã kũ à kɛ̃na annabinɔ takadanɔ gũn pì bo gupuraa sà, de buri sĩnda pínki le à dɔ̃ ò Luda náani kɛ ò gɔ̃ a yãmarinɔ ũ. 27Ò Luda mɛ̀n do ɔ̃ndɔ̃de tɔ́ bo Yesu Kirisi gãi ari gɔrɔ sĩnda pínki! Aami.

Currently Selected:

ROMUDENƆ 16: BB2005

Highlight

Copy