LUKU 15

Pɔ́ sãtɛnanɔ

(Mat 18:12-14)

1Bɛ'ɔgɔsirinɔ kũ durunnakɛrinɔ tɛn na Yesui de ò a yã ma ń pínki. 2Akũ Farisinɔ kũ ludayãdannɛrinɔ yãkete kà ò pì: Gbɛ̃ díkĩna dì durunnakɛrinɔ sí à pɔ́ ble kũńwo lɛɛlɛ. 3Akũ Yesu yã díkĩna lɛ̀kɔ̃ańnɛ à pì: 4Ò pì á gbɛ̃ke sã vĩ mɛ̀n basɔɔro, akũ a do sã̀tɛ, àdi a basɔɔro donsari tó sɛ̃̀n à pɛ́tɛ sã kũ à sã̀tɛ pìii ari à gɛ́ leroo? 5Tó à bòa, àdi a sɛ́ à da a gã̀n kũ pɔnnao 6à táo bɛ, à a gbɛ̃nnanɔ kũ a fárandidenɔ sísi à pińnɛ: À pɔnna kɛ kũmao. Ma a sã kũ à sã̀tɛ pìi lè. 7Lɛmɛ dɔ matɛn oárɛ, oni pɔnna kɛ ludambɛ durunnakɛri mɛ̀n do kũ à nɛ̀sɛɛ lìtɛ yã musu de gbɛ̃ mana gbɛ̃nɔn basɔɔro donsari kũ ò nɛ̀sɛlitɛna ni vĩronɔla.

8Nɔgbɛ̃ kũ à andurufu ɔgɔwapu vĩ mɛ̀n kuri sɔ̃ bi, tó a mɛ̀n do sã̀tɛ, àdi fitila na à kpɛ́ wara, à wɛtɛ busɛbusɛ ari à gɛ́ leroo? 9Tó à bòa, àdi a gbɛ̃nnanɔ kũ a fárandidenɔ sísi à pińnɛ: À pɔnna kɛ kũmao. Ma a andurufu ɔgɔ kũ à sã̀tɛ pìi lè. 10Lɛmɛ dɔ matɛn oárɛ, Luda malaikanɔ dì pɔnna kɛ durunnakɛri mɛ̀n do kũ à nɛ̀sɛɛ lìtɛ yã musu.

Nɛ́gɔ̃gbɛ̃ kũ à sã̀tɛ

11Yesu pì dɔ: Gbɛ̃ke mɛ́ à kun à nɛ́gɔ̃gbɛ̃nɔ vĩ mɛ̀n pla. 12Akũ Sabi pì a denɛ: Baa, ǹ ma baka kũ manigɔ̃ vĩ túbi gũn kpáma. Akũ de pì a aruzɛkɛ kpàatɛtɛńnɛ. 13Adi kɛ gɔrɔ plaro, akũ Sabi a pɔ́nɔ nàkɔ̃a pínki, à tà bùsu pãnden zã̀zã. Gwen à a aruzɛkɛ kàkatɛn pãpãkɛnaa gũn. 14Kũ à pɔ́ kũ à vĩnɔ dɛ̀ pínki, akũ nà gbãna kà bùsuu pìn, akũ à gɔ̃̀ kũ takasio. 15À gɛ̀ɛ à nà bùsuu pì gbɛ̃kei zamalingakɛri ũ, akũ gbɛ̃ pì a gbàrɛ a bura à pɔ́ble kpá alɛdɛnɔa. 16Àdigɔ̃ ye à pɔ́ tɛ̀kɛ kũ alɛdɛnɔ tɛn ble ble à kã, ama òdi pɔ́ke kpáaro. 17Kũ à laakarii sù à pì: Ma de zamalingakɛrinɔn pɔ́ble vĩ dińyĩ, akũ matɛn ga kũ nàao la. 18Mani futɛ mà tá ma de kĩnaa, mani pinɛ: Baa, ma durunna kɛ̀ Ludanɛ kũ mɔkɔ̃nwo, 19mádi ká ò ma sísi n nɛ́ ũ doro. Ǹ ma ditɛ n zamalingakɛrinɔ do ũ. 20Akũ à fùtɛ àtɛn tá a de kĩnaa. Kũ à tɛ́ zã̀ àtɛn su, a de pì a è, akũ à kɛ̀nɛ wɛ̃nda. À bàa sì à gɛ̀ɛ à kùsia, à lɛ́ pɛ̀a. 21Akũ nɛ́ pìi pìnɛ: Baa, ma durunna kɛ̀ Ludanɛ kũ mɔkɔ̃nwo, mádi ká ò ma sísi n nɛ́ ũ doro. 22Akũ de pìi pì a zĩkɛrinɔnɛ: À gɛ́ likalika, à uta zɔ̃kɔ̃ mana kũ à de a kparanɔla sɛ́ à suo à danɛ, à tãnka danɛ, à kyate kpánɛ. 23À zùsanɛ bɔ̀rɔ mɛ̀kpana kũ à dɛ, ò só pɔnnakɛnaa gũn, 24zaakũ ma nɛ́ pìi gà à fùtɛmɛ. À sã̀tɛmɛ, akũ ma a lè. Akũ ò nà pɔnnakɛnaaa.

25Woru sɔ̃ à kpɛ́ bura. Kũ àtɛn su à kà kãni kũ bɛo, akũ à bata ũ mà dɔ kũ kɔ̃kɔ̃ kĩnio. 26Akũ à zĩkɛrinɔ do sìsi, à a là bɔ́n òtɛn kɛɛ. 27Akũ à wèa à pì: N dakũna mɛ́ à sù, akũ n de zùsanɛ bɔ̀rɔ mɛ̀kpana dɛ̀, kũ à a lè aafia yãi. 28Akũ Woru pɔ fɛ̃̀, à gì gɛ̃ ɔnnyĩ. Kũ a de bò, à kútɛ kɛ̀nɛ, 29akũ Woru pìi pì a denɛ: É'e! À kà wɛ̃̀ ũgbangba kũ matɛn zĩ kɛnnɛ, mádi gí n yãi zikiro, akũ bee blèkofĩni gokũ ńdi kpáma mà pɔnna kɛo kũ ma gbɛ̃nnanɔoro. 30Kũ n nɛ́ kũ à n aruzɛkɛ kàkatɛ karuanɔnɛ pìi sù, n zùsanɛ bɔ̀rɔ mɛ̀kpanaa dɛ̀nɛ. 31Akũ a de pìnɛ: Ma nɛ́, ń kú kũmao gɔrɔ sĩnda pínki. Pɔ́ kũ má vĩ pínki n pɔ́mɛ. 32À kɔ̃ sìo ò pɔ́ ble kũ pɔnnaomɛ, zaakũ n dakũna pìi gà à fùtɛ. À sã̀tɛmɛ, akũ ò a lè.

Currently Selected:

LUKU 15: BB2005

Highlight

Copy