YUHANA 4

Yesu kũ Samaria nɔgbɛ̃o

1Farisinɔ mà kũ Yesu tɛn gbɛ̃nɔ da'itɛ kɛ àtɛn ìbanɔ le de Yahayala. 2Adi kɛ Yesu mɛ́ àdi ń da'itɛ kɛ a zĩdaro, a ìbanɔ mɛ́ òdi kɛ. 3Kũ Yesu yã pìi mà, à fùtɛ Yudea à ɛ̀ra àtɛn tá Galili. 4Kũ àtɛn gɛ́ sɔ̃, à kũ̀ à bɔtɛ Samaria bùsun. 5Akũ à kà Samaria wɛ̃tɛ kũ òdi pi Sika. À zã̀ kũ zĩtɛ kũ Yakubu kpà a nɛ́ Yusufuaaoro. 6Yakubu lɔ̀gɔ kú gwe. Yesu táa ò à kpàsa, akũ a vùtɛ lɔ̀gɔɔ pìi sarɛ. Ifãntɛ̃ kà mìdangura.

7Samaria nɔgbɛ̃ ke sù í tɔ́, akũ Yesu pìnɛ: Ǹ ma gba í mà mi. 8A ìbanɔ sɔ̃, ò gɛ̀ɛ pɔ́ble lú wɛ̃tɛ gũn. 9Akũ nɔgbɛ̃ pìi pìnɛ: Yudamɛ n ũ, Samaria nɔgbɛ̃n ma ũ, akũ ntɛn í wɛ́ kɛmaa? Zaakũ Yudanɔ kũ Samariadenɔ yã dì kɔ̃ sɛ́ro. 10Akũ Yesu pìnɛ: Tó ń gba kũ Luda dì dańnɛ dɔ̃ kũ gbɛ̃ kũ àtɛn í wɛ́ kɛmmao, de mɔkɔ̃mmɛ ĩni wɛ́ kɛa à n gba í wɛ̃̀ndide. 11Nɔgbɛ̃ pìi pìnɛ: Baa, ń guga vĩro. Lɔ̀gɔ dí sɔ̃ a wɛ̀ɛ lòkoto. Ĩni í wɛ̃̀ndide pì le mámɛɛ? 12Ń de ó dizi káaku Yakubula gwɛɛ? Àkũ mɛ́ à lɔ̀gɔɔ pìi tòwɛrɛ. Àpi a í mì kũ a nɛ́nɔ kũ a pɔ́kãdenɔ. 13Akũ Yesu pìnɛ: Gbɛ̃ kũ à í díkĩna mì, ími ni ɛra à a dɛmɛ dɔ. 14Gbɛ̃ kũ ani í kũ mani kpáa mi sɔ̃, ími ni a dɛ ziki doro. Zaakũ í kũ mani kpáa ni gɔ̃ a nɛ̀sɛɛ gũn ísɛ̃boki í kũ ani bɔtɛnɛ wɛ̃̀ndi kũ àdi lákaro ũmɛ. 15Akũ nɔgbɛ̃ pìi pìnɛ: Baa, ǹ ma gba í pìi, de ími sún ma dɛ mà su í tɔ́ la doro. 16Yesu pìnɛ: Ǹ gɛ́ n zã sísi à su lɛɛlɛ. 17Nɔgbɛ̃ pìi wèa à pì: Má gɔ̃ vĩro. Akũ Yesu pìnɛ: Kũ n pì, ń gɔ̃ vĩro, n yã ò a zɛ́amɛ. 18N zã kɛ̀ lɛu sɔɔro, akũ gɔ̃gbɛ̃ kũ ń kú kãao tera bi n zãnlo. N yãpura ò. 19Akũ nɔgbɛ̃ pìi pìnɛ: Baa, má dɔ̃̀ sà kũ annabiimɛ n ũ. 20Ó dizinɔ donyĩ kɛ̀ Ludanɛ kpi dí musu, ákɔ̃nɔ sɔ̃ adì pi Yurusalɛmu mɛ́ à gu kũ ò donyĩ kɛnnɛ ũ. 21Yesu pìnɛ: Nɔgbɛ̃, ǹ ma yã sí. Gɔrɔke tɛn su kũ áni donyĩ kɛ De Ludanɛ kpi dí musu ke Yurusalɛmu doro. 22Ákɔ̃nɔ, adì donyĩ kɛ Ludanɛ, ama á a dɔ̃ro, ókɔ̃nɔ sɔ̃, odì donyĩ kɛnɛ, akũsɔ̃ ó a dɔ̃, zaakũ surabanaa dì bo ókɔ̃nɔ Yudanɔ kĩnaamɛ. 23Gɔrɔ tɛn su à kà kɔ̀, kũ donyĩri yãpuradenɔ ni donyĩ kɛ De Ludanɛ kũ yãpurao kũ a Nini gbãnao. Gbɛ̃ bire takanɔn De Luda tɛn wɛtɛ ò donyĩ kɛarɛ. 24Luda bi ninimɛ, séde gbɛ̃ kũ òdi donyĩ kɛnɛnɔ donyĩ kɛnɛ kũ yãpurao kũ a Nini gbãnao. 25Akũ nɔgbɛ̃ pìi pìnɛ: Má dɔ̃ kũ Arumasihu kũ òdi pinɛ Kirisi ni su. Tó à sù, ani yã sĩnda pínki bɔkɔtɛwɛrɛ. 26Akũ Yesu pìnɛ: Makũ kũ matɛn yã onnɛ, makũmɛ a ũ.

27Gɔrɔ birea Yesu ìbanɔ sù, ò a lè àtɛn yã o kũ nɔgbɛ̃o. À bò ń sarɛ, ama ń gbɛ̃ke dí a la bɔ́n à yeiro ke bɔ́yãi àtɛn yã o kũ nɔgbɛ̃ pìioro. 28Akũ nɔgbɛ̃ pì a lo tò gwe, à gɛ̃̀ wɛ̃tɛ gũn à pì gbɛ̃nɔnɛ: 29À mɔ́ à gɔ̃gbɛ̃ ke gwa. À yã kũ ma kɛ̀nɔ òmɛnɛ pínki. Ke Arumasihu pìimɛ gwɛɛ? 30Akũ ò bɔ̀tɛ wɛ̃tɛ gũn òtɛn gɛ́ Yesu kĩnaa.

31Gɔrɔ birea sɔ̃ Yesu ìbanɔ pìnɛ: Rabi, ĩni pɔ́ bleroo? 32Akũ à pìńnɛ: Má pɔ́ble ke vĩ kũ á dɔ̃ro. 33Akũ a ìbanɔ kɔ̃ làla ò pì: Gbɛ̃ke sùnɛ kũ pɔ́bleon yá? 34Akũ Yesu pìńnɛ: Ma pɔ́blen gbɛ̃ kũ à ma zĩ pɔyenyĩnakɛna ũ ari mà zĩ kũ à dàmɛnɛ mì dɛ. 35Ákɔ̃nɔ adì pi mɔ siikɔ̃ mɛ́ à gɔ̃̀ kũ pɔ́kɛ̃gɔrɔ ni ká. Matɛn oárɛ, à wɛ́ sɛ́ à buranɔ gwa, zaakũ pɔ́nɔ mà ò kà kɛ̃na. 36Pɔ́kɛ̃ri tɛni a láada le kɔ̀, àtɛn gbɛ̃nɔ kakara wɛ̃̀ndi kũ àdi lákaro pɔ́ ũ, de pɔ́tɔ̃ri kũ pɔ́kɛ̃riio pɔnna kɛ lɛɛlɛ. 37Zaakũ yã díkĩna bi yãpuramɛ: Gbɛ̃ke mɛ́ àdi pɔ́ tɔ̃, gbɛ̃ke kɛ̃. 38Ma á zĩ pɔ́ kɛ̃ gu kũ ádi zĩ kɛnlo. Gbɛ̃ pãndenɔ mɛ́ ò zĩ kɛ̀ gwe, akũ átɛni ń zĩ àre ble.

39Samaria gbɛ̃ kũ ò kú wɛ̃tɛ pìi gũnnɔ Yesu náani kɛ̀ dasi yã kũ nɔgbɛ̃ pìi òńnɛ yãi, kũ à pì à yã kũ a kɛ̀nɔ òarɛ pínki. 40Abire yãi kũ ò kà Yesu kĩnaa, ò wɛ́ kɛ̀a à gɔ̃ kũńwo, akũ à kɛ̀ kũńwo gɔrɔ pla. 41Kũ Yesu yã òńnɛ, gbɛ̃ pãndenɔ a náani kɛ̀ dasidasi. 42Akũ ò pì nɔgbɛ̃ pìinɛ: Adi kɛ yã kũ n òwɛrɛ yãin o a náani kɛ̀ adoro. O a yã mà ó zĩdamɛ, akũ o dɔ̃̀ sà kũ andunia Surabariin a ũ yãpura.

Gbãnade nɛ́ werekɔ̃anaa

43Kũ à gɔrɔ pla kɛ̀ kũńwo, a gbɛran à tà Galili, 44zaakũ à pì annabi dìgɔ̃ bɛ̀ɛrɛ vĩ a zĩda bùsunlo. 45Kũ à kà Galili, Galilidenɔ gbãnakɛ kpài, zaakũ ò gɛ̀ɛ ò Vĩnla dikpɛ Yurusalɛmumɛ, akũ ò yã kũ à kɛ̀ dikpɛ pì zĩnɔ è pínki. 46Akũ Yesu ɛ̀ra à gɛ̀ɛ Kana, gu kũ à í lìtɛ sèwɛ̃ ũ. Bùsu gbãnade ke kú gwe, a nɛ́gɔ̃gbɛ̃ tɛn gyã kɛ zaa Kapɛnamu. 47Kũ à mà Yesu bò Yudea à sù Galili, akũ à gɛ̀ɛ a kĩnaa à wɛ́ kɛ̀a à gɛ́ a nɛ́ werekɔ̃a, zaakũ a kú ga lɛ́i. 48Akũ Yesu pìnɛ: Tó adi kɛ a daboyãnɔ kũ yãbonsarɛnɔ è baasiro, áni ma náani kɛro. 49Akũ gbãnade pìi pìnɛ: Baa, ǹ mɔ́ ari ma nɛ́ kpɛ́ à ga. 50Yesu pìnɛ: Ǹ tá bɛ. N nɛ́ ni garo. Gɔ̃gbɛ̃ pì yã kũ Yesu ònɛɛ sì, akũ à dà zɛ́n. 51Gɔrɔ kũ à tɛ́ zɛ́n, à dàkarɛ kũ a zĩ̀rinɔ, akũ ò pìnɛ a nɛ́ kun. 52Akũ à ń lá à pì: Gɔrɔ kpate takan à kɛ̀ sã̀naa? Akũ ò pìnɛ: Gĩa fãnantɛ̃ mɔ̀ do zakan mɛ̀wãna pìi kɛ̃̀a. 53Akũ de pìi dɔ̃̀ kũ gɔrɔ kũ Yesu òarɛ kũ a nɛ́ ni garon gwe. Akũ ò a náani kɛ̀, àpii kũ a bedenɔ ń pínki. 54Sèeda plade kũ Yesu kɛ̀ bona Yudea suna Galilin gwe.

Currently Selected:

YUHANA 4: BB2005

Highlight

Copy