NAANAA 46

Yakubu tana Misila kũ a nɛ́nɔ

1Isaraila dà zɛ́n kũ pɔ́ kũ a vĩnɔ pínki. Kũ à kà Bɛsɛba, à sa ò a de Isaaku Ludaa. 2Akũ Luda bò à sùa wɛ́gupu'enaa gũn gwãani à pì: Yakubu! Yakubu! À wèa à pì: Makũ di! 3Akũ à pì: Makũmɛ Luda ũ n de Luda. Ǹsun Misila gɛna damu kɛro, zaakũ gwen mani n buri karan manamana. 4Mani gɛ́ kũnwo Misila mà ɛra mà su kũ n burinɔ. Yusufu gbádan ĩni gan.

5Akũ Yakubu fùtɛ Bɛsɛba. A nɛ́nɔ a dà zùgo kũ Firi'auna gbàrɛ ò a sɛ́onɔ gũn kũ ń nɛ́nɔ kũ ń nanɔnɔo. 6Ò ń pɔ́kãdenɔ kũ aruzɛkɛ kũ ò lè Kanaanɔ bùsunnɔ sɛ̀tɛ ò tào Misila. 7Yakubu tà gwe kũ a nɛ́gɔ̃gbɛ̃nɔ kũ a nɛ́nɔgbɛ̃nɔ kũ a daikorenɔ ń pínki. 8Isaraila kũ ò tà Misilanɔ tɔ́nɔn dí, Yakubu kũ a burinɔ:

Yakubu daudu Rubɛni. 9Rubɛni nɛ́gɔ̃gbɛ̃nɔ Anɔku, Palu, Ɛzɛrɔnu kũ Kaamio. 10Simɛɔ nɛ́gɔ̃gbɛ̃nɔ Yemuɛli, Yami, Oada, Yakĩ, Zoa kũ Sauluo kũ à a ì kũ Kanaa nɔgbɛ̃o. 11Levi nɛ́gɔ̃gbɛ̃nɔ Gɛsɔmu, Koa kũ Mɛrario. 12Yuda nɛ́gɔ̃gbɛ̃nɔ Ɛɛ, Ona, Sela, Pɛrɛzi kũ Zɛrao, ama Ɛɛ kũ Onao gà Kanaamɛ. Pɛrɛzi nɛ́gɔ̃gbɛ̃nɔ Ɛzɛrɔnu kũ Amuluo. 13Isaka nɛ́gɔ̃gbɛ̃nɔ Tola, Pua, Yasubu kũ Simirɔnuo. 14Zɛbuluni nɛ́gɔ̃gbɛ̃nɔ Sɛrɛdi, Ɛlɔni kũ Yalɛlio. 15Nɛ́gɔ̃gbɛ̃ kũ Lea ń í kũ Yakubuo Mɛsɔpɔtamianɔn gwe. Àkũ mɛ́ à a nɛ́nɔgbɛ̃ Dina ì dɔ. Ń buri pìnɔ ń pínki gbɛ̃nɔn baraakuri awɛɛ'aakɔ̃mɛ.

16Gada nɛ́gɔ̃gbɛ̃nɔ Zɛfɔ̃, Agi, Suni, Ɛzɛbɔ̃, Eri, Arodi kũ Arɛlio. 17Asa nɛ́gɔ̃gbɛ̃nɔ Imina, Isiva, Isivi, Bɛria kũ ń dãre Sɛrao. Bɛria nɛ́gɔ̃gbɛ̃nɔ Eberu kũ Malakiɛlio. 18Labã mɛ́ à Zilipa kpà Leaa. Buri kũ Zilipa kɛ̀ kũ Yakubuon gwe. Ò gbɛ̃nɔn gɛ̃ro awɛɛdomɛ.

19Yakubu nanɔ Rahila nɛ́gɔ̃gbɛ̃nɔ Yusufu kũ Biliaminuo. 20Yusufu Manase kũ Ɛflaimuo ì Misila kũ a nanɔ Asɛna, Ɛliɔpɔli sa'ori Potifɛra nɛ́o. 21Biliaminu nɛ́gɔ̃gbɛ̃nɔ Bɛla, Bɛkɛ, Asabɛli, Gera, Naama, Ɛhi, Rosu, Mupimu, Upimu kũ Adao. 22Buri kũ Rahila kɛ̀ kũ Yakubuonɔn gwe. Ò gbɛ̃nɔn gɛ̃ro donsarimɛ.

23Dã nɛ́gɔ̃gbɛ̃ Usimu. 24Nafatali nɛ́gɔ̃gbɛ̃nɔ Yaziɛli, Guni, Yɛzɛ kũ Silɛmuo. 25Labã mɛ́ à Bila kpà Rahilaa. Buri kũ Bila kɛ̀ kũ Yakubuonɔn gwe. Ò gbɛ̃nɔn supplamɛ.

26Yakubu buri kũ ò tà kũńwo Misilanɔn gwe. Ò gbɛ̃nɔn baaakɔ̃ awɛɛsuddomɛ a nɛ́ nɔnɔ baasi. 27Kũ Yusufu nɛ́ ì Misila gbɛ̃nɔn pla, akũ Yakubu buri kũ ò tà gwenɔ kɛ̀ gbɛ̃nɔn baaakɔ̃ akuri.

28Yakubu Yuda zĩ̀ à donɛ arɛ Yusufu kĩnaa de à Gosɛ̃ bùsu zɛ́ mɔnɛ. Kũ ò kà gwe, 29akũ Yusufu gɛ̃̀ a sɔ̃gon à gɛ̀ɛ da a delɛ gwe. Kũ à a lè, à mlɛ̃̀a à ɔ́ɔ dɔ̀ à gìi kɛ̀. 30Akũ Isaraila pì Yusufunɛ: Lákũ ma wɛ́ sìnlɛ nà ma è ń kú wɛ̃̀ndiio, ga ni fɔ̃ à ma sɛ́ sà.

31Yusufu pì a vĩ̀ninɔnɛ kũ a de bedenɔ: Mani gɛ́ mà o Firi'aunanɛ ma vĩ̀ninɔ kũ ma de bede kũ ò kú Kanaanɔ bùsunnɔ sù ma kĩnaa. 32Mani onɛ kũ sãdãrinɔmɛ á ũ, á pɔ́kãdenɔ vĩ, akũ a su kũ á sãnɔ kũ á blènɔ kũ á zùnɔ kũ pɔ́ kũ á vĩnɔ pínki. 33Tó Firi'auna á sísi, akũ à á lá bɔ́ zĩn adì kɛ, 34à onɛ à pi á pɔ́kãdedenɔ ũ zaa á kɛfɛnnakɛgɔrɔa ari kũ a gbãrao lán á dizinɔ bà. Tó a ònɛ lɛ, áni le à vutɛ Gosɛ̃ bùsun, zaakũ Misilanɔ dì kakara kũ sãdãrinɔro.

Currently Selected:

NAANAA 46: BB2005

Highlight

Copy