NAANAA 41

Yusufu Firi'auna nana bɔkɔtɛnaa

1Wɛ̃̀ pla papanaa gbɛra Firi'auna nana ò, à è á zɛna Nili lɛ́a. 2À è zùda mana mɛ̀kpananɔ bɔ̀tɛ swa pìi wɛ̀ɛn mɛ̀n suppla òtɛn sɛ̃̀ ble tàfee gũn. 3Akũ à zùda fɛ̃fɛ̃na wɔkɔwɔkɔnɔ è mɛ̀n suppla dɔ. Ò bò swawɛɛn ò tɛ̀ a káakupɔnɔ kpɛ ò zɛ̀ ń sarɛ swa lɛ́a. 4Akũ zù fɛ̃fɛ̃na wɔkɔwɔkɔ pìnɔ zù mana mɛ̀kpana pìnɔ mɔ̀mɔ, akũ Firi'auna vù.

5À ɛ̀ra à i ò, akũ à nana ò dɔ. À è ése sáko mana wɛ́de pìa ése lí dokɔ̃nɔa sáko suppla. 6Akũ à ése sáko wɛ́ kɔgɔkɔgɔ kũ legũ'i kĩ̀aḿmanɔ è, à pìa ń gbɛra dɔ sáko suppla. 7Akũ ése sáko wɛ́ kɔgɔkɔgɔ pìnɔ ése sáko mana wɛ́de pìnɔ mɔ̀mɔ. Kũ Firi'auna vù, à è nanan a ò.

8Kũ gu dɔ̀, à kú bídi gũn, akũ à Misila màsokɛrinɔ kũ wɛ́zɛ̃rinɔ sìsi ń pínki. À a nananɔ bàbańnɛ, ama ń gbɛ̃ke dí fɔ̃ à a bɔkɔtɛnaa ònɛro. 9Akũ wɛ̃kpaatɛriki fùtɛ à yã ò Firi'aunanɛ à pì: Taari kũ ma kɛ̀ yã dɔ̀magu gbãra. 10Kí, n pɔ fɛ̃̀ n zɔ̀blerinɔi yã, akũ n ma da kpɛ́siran n dogarinɔ gbɛ̃ zɔ̃kɔ̃ bɛa lɛɛlɛ kũ burodikɛrikio. 11Gwãani dokɔ̃nɔa o nana ò, ó baadi kũ a pɔ́o kũ a àlesiio. 12Eberu kɛfɛnna ke kú kũoo gwe, n dogarinɔ gbɛ̃ zɔ̃kɔ̃ɔ zɔ̀ɔmɛ. Kũ o ó nananɔ bàbanɛ, akũ à ó baadi pɔ́ bɔkɔtɛnaa ònɛ. 13Yã pìnɔ kɛ̀ lákũ à òwɛrɛ nà. N ɛra n ma da ma zĩn, akũ n burodikɛriki pìi lòko lía.

14Akũ Firi'auna gbɛ̃ zĩ̀ ò Yusufu sísi, akũ ò gɛ̀ɛ ò a bò wɛ̀ɛn likalika. À mìi bò à a pɔ́kasanɔ lìtɛ, akũ à gɛ̀ɛ Firi'auna kĩnaa. 15Akũ Firi'auna pìnɛ: Ma nana ò, gbɛ̃ke dí fɔ̃ à a bɔkɔtɛnaa òmɛnɛro. Ma mà ò pì, tó ò ònnɛ, ndì fɔ̃ ǹ a àlesi ońnɛ. 16Yusufu pìnɛ: Adi kɛ makũmɛro, Luda mɛ́ ani a àlesi onnɛ, kí. 17Akũ Firi'auna pìnɛ: Ma nana gũn ma è má zɛna Nili lɛ́a. 18Ma è zùda mana mɛ̀kpana mɛ̀n supplanɔ bɔ̀tɛ swawɛɛn òtɛn sɛ̃̀ ble tàfee gũn. 19Akũ ma zùda pãndenɔ è dɔ mɛ̀n suppla ò fɛ̃fɛ̃na wɔkɔwɔkɔ, mádi zù fɛ̃fɛ̃na bire takanɔ e Misila la zikiro. 20Akũ zùda fɛ̃fɛ̃na wɔkɔwɔkɔ pìnɔ zù mɛ̀kpana káakupɔ mɛ̀n suppla pìnɔ mɔ̀mɔ. 21Bee kũ ò ń mɔ́mɔ, ò gɔ̃̀ fɛ̃fɛ̃na lán yã bàmɛ, gbɛ̃ke ni dɔ̃ kũ ò ń mɔ́mɔ sero. Akũ ma vu. 22Nana gũn dɔ ma è, ése sáko mana wɛ́de pìa ése lí dokɔ̃nɔa sáko suppla. 23Akũ ma è ése sáko térere wɛ́ kɔgɔkɔgɔ kũ legũ'i kĩ̀aḿmanɔ pìa ń gbɛra dɔ sáko suppla. 24Akũ ése sáko wɛ́ kɔgɔkɔgɔ pìnɔ ése sáko wɛ́de pìnɔ mɔ̀mɔ. Kũ ma ò màsokɛrinɔnɛ, ń gbɛ̃ke dí fɔ̃ à a bɔkɔtɛnaa òmɛnɛro.

25Akũ Yusufu pìnɛ: Kí, nana kũ n òo pìnɔ àlesi dokɔ̃nɔmɛ. Luda yã kũ à ye à kɛ mɔ̀nnɛmɛ, kí. 26Zù mana mɛ̀n suppla pìnɔ bi wɛ̃̀ supplamɛ. Ése sáko wɛ́de sáko suppla pìnɔ sɔ̃ wɛ̃̀ supplamɛ. Nana pìnɔ àlesi dokɔ̃nɔmɛ. 27Zù fɛ̃fɛ̃na wɔkɔwɔkɔ mɛ̀n suppla kũ ò bɔ̀tɛ ò tɛ̀ a káakupɔnɔ kpɛ pìnɔ bi wɛ̃̀ supplamɛ. Lɛmɛ ése sáko wɛ́ kɔgɔkɔgɔ kũ legũ'i kĩ̀aḿma sáko suppla pìnɔ de lɛ dɔ. Abirekũnɔmɛ wɛ̃̀ suppla kũ nà ni ká ũ. 28Lákũ ma ònnɛ nà tera, kí, ma pì Luda tɛn yã kũ à ye à kɛ mɔnnɛmɛ. 29Pɔ́blewɛ nigɔ̃ di Misila gu sĩnda pínkia manamana ari wɛ̃̀ suppla. 30Abire gbɛra nà ni gɛ̃ ari wɛ̃̀ suppla, kãna gbãna pì yã ni sã Misilanɔgu. Nàa pì ni bùsuu pì dɛ. 31Nà kũ ani su pì nigɔ̃ pãsĩ manamana, kãna gbãna pì yã ni dɔ gbɛ̃kegu doro. 32Kí, kũ gɛ̃̀n plamɛ n nana pìi ò, kũ Luda mɛ́ à dìtɛ yãimɛ. Ani kɛ teramɛ, à sika vĩro. 33Tera sà kí, ǹ wɛ́zɛ̃ri ɔ̃ndɔ̃de wɛtɛ ǹ ditɛ àgɔ̃ de gbãnade ũ Misila. 34Kí, ǹ gbɛ̃nɔ ditɛ gbɛ̃ zɔ̃kɔ̃nɔ ũ Misila ògɔ̃ pɔ́blewɛ sɔɔrode kakara wɛ̃̀ suppla kũ pɔ́blewɛ nigɔ̃ din pìi gũn. 35Oni pɔ́ble kakara wɛ̃̀ mana kũ àtɛn sunɔ gũn ò pɔ́blewɛ ká dɔ̃̀nɔ gũn wɛ̃tɛ kũ wɛ̃tɛo kũ n tɔ́o, onigɔ̃ dãkpã. 36Tó nà kũ ani kɛ wɛ̃̀ suppla pìi kà Misila, pɔ́ble pì nigɔ̃ de zã̀na ũ de nàa pì sún Misilanɔ dɛdɛro yãi.

Yusufu kíblena Misila

37Yã pìi kà Firi'aunagu kũ a ìbanɔ ń pínki, 38akũ à pìńnɛ: Gbɛ̃ dí Luda Nini vĩ. Óni gbɛ̃ke e lán a bà dɔ yá? 39Akũ à pì Yusufunɛ: Lákũ Luda tò ń yã birenɔ dɔ̃ pínki nà, wɛ́zɛ̃ri ɔ̃ndɔ̃de ke kun lán n bàro. 40Mɔkɔ̃n mɛ́ ĩnigɔ̃ de ma ɔn gbɛ̃ zɔ̃kɔ̃ ũ, ma gbɛ̃nɔ nigɔ̃ mì natɛnnɛ ń pínki. Kpata mɛ́ ani tó màgɔ̃ denla ado. 41Akũ à ɛ̀ra à pìnɛ: Ĩnigɔ̃ gbãna vĩ Misila bùsu gu sĩnda pínkia. 42Akũ à tãnka sèedakɛbɔɔ bò a ɔnɛa à dà Yusufunɛ a ɔnɛa, à taasaa uta dànɛ à wura gɛ̀rɛɛ dànɛ a wakaaa. 43À a sɔ̃go plade kpàa táa'obɔ ũ, akũ gbɛ̃ kũ ò donɛ arɛnɔ dìgɔ̃ pata: À kútɛ! À kútɛ! Lɛmɛ Firi'auna tò Yusufu gbãna vĩ Misila bùsun lɛ. 44À pìnɛ dɔ: Makũ Firi'auna, gbɛ̃ke ni fɔ̃ à yãke kɛ Misila la n lɛ́ sariro. 45À tɔ́ kpànɛ Zafɛna Panɛa, akũ à Ɛliɔpɔli wɛ̃tɛ sa'ori Potifɛra nɛ́nɔgbɛ̃ Asɛna kpàa nɔ ũ.

46Gɔrɔ kũ Yusufu zĩ lè Misila kína Firi'auna bɛa, a wɛ̃̀ baraakurimɛ. Akũ à bò Firi'auna kĩnaa à gɛ̀ɛ à kurè Misila gu sĩnda pínkia. 47Kãna gbãna kun ari wɛ̃̀ suppla, pɔ́blewɛ din manamana. 48Akũ Yusufu pɔ́blewɛ kũ à di Misila wɛ̃̀ suppla pìnɔ kàkara wɛ̃tɛ kũ wɛ̃tɛo zã̀na ũ, wɛ̃tɛ sĩnda pínki kũ a bura kũ ò likainɔ pɔ́o. 49A pɔ́blewɛ kàkara zɔ̃kɔ̃zɔ̃kɔ̃ lán ísiralɛ bùsu'atɛ̃ bà, akũ ò zɛ̀ a zaka lɛ́ yɔ̃naaa, kũ oni fɔ̃ ò a lɛ́ dɔ̃ro yãi.

50Ari nà gɔ̃ gɛ́ ká Yusufu nanɔ Asɛna, Potifɛra nɛ́, nɛ́gɔ̃gbɛ̃nɔ ì mɛ̀n pla. 51Yusufu tɔ́ kpà a dauduunɛ Manase à pì: Luda tò ma de bedenɔ kũ wari kũ ma kɛ̀ɛo yã sã̀magu pínki. 52Akũ à tɔ́ kpà a pladenɛ Ɛflaimu à pì: Luda tò ma gɔ̃ nɛ́de ũ bùsu kũ ò wɛ́ tã̀man.

53Kũ kãna gbãna kũ à kú Misila wɛ̃̀ suppla pìi làka, 54akũ wɛ̃̀ suppla kũ nà ni ká dàtɛ lákũ Yusufu ò nà. Nàa kà bùsu kũ bùsuuo pínki, ama pɔ́blewɛ di Misila gu sĩnda pínkiamɛ. 55Kũ nàa gɛ̃̀ Misilanɔgu pínki, ò wiki lɛ̀ Firi'aunanɛ à pɔ́ble kpáḿma. Akũ à pìńnɛ ń pínki: À gɛ́ Yusufu kĩnaa à kɛ lákũ ani oárɛ nà. 56Nàa dà bùsuu pìla pínki, akũ Yusufu dɔ̃̀nɔ wɛ̃̀wɛ̃ à pɔ́blewɛ yìa Misilanɔa, kũ nàa pì gbãna kũ̀ ń bùsun yãi. 57Akũ gbɛ̃nɔ bò andunia gu pínkia ò sù Misila pɔ́blewɛ lú Yusufua, zaakũ nà gbãna kũ̀ andunia gũn pínkimɛ.

Currently Selected:

NAANAA 41: BB2005

Highlight

Copy