NAANAA 40

Yusufu purusunanɔ nana bɔkɔtɛnaa

1Abire gbɛra Misila kína Firi'auna wɛ̃kpaatɛri kũ a burodikɛriio taari kɛ̀nɛ. 2A pɔ fɛ̃̀ a ìba gbɛ̃nɔn pla pìnɔi, a wɛ̃kpaatɛriki kũ a burodikɛrikio. 3Akũ à ń ká kpɛ́siran a dogarinɔ gbɛ̃ zɔ̃kɔ̃ bɛa, kpɛ́ kũ ò Yusufu dàn. 4Dogarinɔ gbɛ̃ zɔ̃kɔ̃ pì Yusufu dìtɛ àgɔ̃ ń gwa, akũ ò gɔrɔ pla kɛ̀ kpɛ́ pìn gwe.

5Gwãani dokɔ̃nɔa Misila kína wɛ̃kpaatɛri kũ burodikɛrii pìio nana ò ń gbɛ̃nɔn pla ń pínki, baadi kũ a pɔ́o kũ a bɔkɔtɛnaao. 6Kũ Yusufu sù ń gwa kɔnkɔ, à è ń ãnn sìsi. 7Akũ à ń lá à pì: Bɔ́ yã mɛ́ à tò á ãn sisina gbãraa? 8Ò wèa ò pì: Nanan o ò, gbɛ̃ke kú la kũ à a àlesi owɛrɛro. Akũ à pìńnɛ: Luda mɛ́ à nana àlesi bɔkɔtɛna vĩroo? À á nana pìnɔ omɛnɛ mà ma. 9Akũ wɛ̃kpaatɛriki a pɔ́ ònɛ à pì: Ma nana gũn ma geepi lí è ma sarɛ. 10Geepi lí pì ɔnɛ aakɔ̃mɛ. À lá bò à vú kɛ̀ à nɛ́ ì à mà. 11Má Firi'auna toko kũna, akũ ma geepi nɛ́ pìnɔ sɛ̀ ma fɛ̃̀ a toko pìi gũn ma kpàa. 12Yusufu pìnɛ: Nana pìi bɔkɔtɛnan dí. Lí'ɔnɛ aakɔ̃ pìnɔ bi gɔrɔ aakɔ̃mɛ. 13Gɔrɔ aakɔ̃ gbɛra Firi'auna ni n mì sí. Ani ɛra à n da n zĩ gũn, ĩni ɛra ǹgɔ̃ wɛ̃ bonɛ lákũ ndìgɔ̃ kɛ nà yã. 14Tó yã bò kũnwo nna, ǹ tó ma yã gɔ̃ dɔngu. Ǹ gbɛ̃kɛ kɛmɛnɛ ǹ ma yã o Firi'aunanɛ de à ma bo kpɛ́sira dí gũn. 15Zaakũ ò ma kũ kpãni zaa Eberu bùsun, akũ bee Misila la mádi yãke kɛ à kà ò ma da wɛ̀ɛ dí gũnlo.

16Kũ burodikɛriki è Yusufu nana pìi àlesi'onaa bò kũ wɛ̃kpaatɛriio nna, akũ à pìnɛ: Ma nana gũn sɔ̃ ma è má burodi sɛna tãnko aakɔ̃ dikɔ̃ana. 17Tãnko kũ à kú musu, burodi buri dasi kũ ma kɛ̀ Firi'aunanɛ ká a gũn, akũ bãnɔ tɛn ble ma musu. 18Yusufu pìnɛ: A bɔkɔtɛnan dí. Tãnko aakɔ̃ pìnɔ gɔrɔ aakɔ̃mɛ. 19Gɔrɔ aakɔ̃ gbɛra Firi'auna ni n mì zɔ̃ à n loko lía, bãnɔ ni n ble.

20A gɔrɔ aakɔ̃de sɔ̃ Firi'auna igɔrɔ là kɔ̃kɔ̃mɛ, akũ à pɔ́ble kɛ̀ a ìbanɔnɛ. À wɛ̃kpaatɛriki kũ burodikɛrikio bɔ̀tɛ kpɛ́n a ìbanɔ wára. 21Akũ à ɛ̀ra à wɛ̃kpaatɛriki dà a zĩn à ɛra àgɔ̃ í boarɛ. 22Akũ à burodikɛriki lòko lía lákũ Yusufu ń nananɔ bɔkɔtɛnaa òńnɛ nà. 23Yusufu yã dí dɔ wɛ̃kpaatɛrikin doro, a yã sã̀agu.

Currently Selected:

NAANAA 40: BB2005

Highlight

Copy