NAANAA 38

Yuda kũ Tamao

1Zĩ kũ̀a Yuda bò a gbɛ̃nɔ kĩnaa à gɛ̀ɛ à vùtɛ Adulamu gbɛ̃ kũ òdi pinɛ Ira bɛa. 2Gwen à dàkarɛ kũ Kanaanɔ bùsu gbɛ̃ kũ òdi pinɛ Sua nɛ́nɔgbɛ̃o, akũ à a sɛ̀ nɔ ũ. 3À nɔ̀ɔ sì à nɛ́ ì gɔ̃gbɛ̃ ũ, akũ à tɔ́ kpànɛ Ɛɛ. 4À ɛ̀ra à nɔ̀ɔ sì dɔ à nɛ́gɔ̃gbɛ̃ ì, akũ à tɔ́ kpànɛ Ona. 5À ɛ̀ra à nɛ́gɔ̃gbɛ̃ ì dɔ, akũ à tɔ́ kpànɛ Sela. Gɔrɔ kũ à nɛ́ pìi ì, à kú Kezibimɛ.

6Akũ Yuda nɔgbɛ̃ kũ òdi pinɛ Tama sɛ̀ a daudu Ɛɛnɛ. 7Ɛɛ kɛ̀ Dikirinɛ vãni, akũ à a dɛ̀. 8Akũ Yuda pì Onanɛ: Ǹ n vĩ̀ni gyaanɔ sɛ́ ǹ buri kɛ n vĩ̀ninɛ, lákũ òdi kɛ nà. 9Kũ Ona dɔ̃ kũ nɛ́ kũ áni i kũ a vĩ̀ni gyaanɔo nigɔ̃ de a buri ũro, tó à wùtɛ kãao akũ à ye à a zĩda e, àdi a gɔ̃gbɛ̃ pɔ́ kɔ́tɛmɛ, de àsun buri kɛ a vĩ̀ninɛro yãi. 10Yã kũ àtɛn kɛ pìi kɛ̀ Dikirinɛ vãni, akũ à a dɛ̀ dɔ. 11Akũ Yuda pì a nɛ́ gyaanɔ Tamanɛ: Ǹ gɛ́ ǹgɔ̃ gyaanɔ ble n de bɛa ari ma nɛ́ Sela zɔ̃kɔ̃ kũ. Zaakũ àtɛn da Sela ni ga lán a vĩ̀ninɔ bàmɛ. Akũ Tama gɛ̀ɛ à vùtɛ a de bɛa.

12Kũ a gɔrɔ gìi kɛ̀, akũ Yuda nanɔ gà. Kũ a nɛ̀sɛɛ kpàtɛ, à dà zɛ́n àtɛn gɛ́ a sãkãkɛ̃rɛrinɔ kĩnaa Timina kũ a gbɛ̃nna Irao. 13Akũ ò a baaruu kpà Tamanɛ ò pì: N zã de tɛn gɛ́ Timina a sãnɔ kã kɛ̃rɛ. 14Akũ à a gyaanɔblepɔnɔ bò a pɔ́dangãnn sɛ̀ à kù a ãnnwa, akũ à gɛ̀ɛ à vùtɛ Enaimu bĩnilɛa Timina zɛ́n. Zaakũ à è Sela zɔ̃kɔ̃ kũ̀, odi a kpáa nɔ ũro. 15Kũ Yuda a è, akũ à a dìtɛ karua ũ kũ à pɔ́ kù a ãnnwa yãi. 16Akũ à nài zɛ́ sarɛ à pì: Ǹ tó mà wútɛ kũnwo. Adi a dɔ̃ a nɛ́ gyaanɔ ũro. Akũ nɔgbɛ̃ pìi pì: Tó n wútɛ kũmao, bɔ́n ĩni kpámaa? 17À wèa à pì: Mani ma kpàsa blènɛ mɛ̀n do kpãzãnnɛ. Akũ à pì: Ǹ tɔrɔma ditɛmɛnɛ ari ǹgɔ̃ gɛ́ kpãzã. 18Akũ à a là à pì: Bɔ́ tɔrɔman mani ditɛnnɛɛ? A pì: Ǹ n sèedakɛbɔ kũ a bàao kũ gò kũ ń kũnaao kpáma. Akũ à kpàa à wùtɛ kãao à nɔ̀ɔ dɔ̀agu. 19Akũ nɔgbɛ̃ pìi fùtɛ à tà bɛ à a pɔ́dangãnn bò à a gyaanɔblepɔnɔ sɛ̀ à dà. 20Yuda a gbɛ̃nna Adulamu gbɛ̃ zĩ̀ kũ blènɛo à tɔrɔma boo nɔgbɛ̃ pìia. Kũ à kà, adi a lero. 21Akũ à gwedenɔ làla à pì: Karua kũ à kú Enaimu zɛ́ sarɛ la yã kú máa? Ò wèa ò pì: Karua ke kú laro fá! 22Akũ à ɛ̀ra à tà à pì Yudanɛ: Mádi a ero. Gwedenɔ pì o karua ke dɔ̃ gwe yã sero. 23Akũ Yuda pì: Àgɔ̃ pɔ́ pìnɔ kũna. Óni tó gbɛ̃nɔ ó yáa dɔro. Ma n zĩ kũ blèe pìio, ńdi a lero.

24Mɔ aakɔ̃ gbɛra ò sù ò ò Yudanɛ ò pì: N nɛ́ nanɔ Tama karua kà, akũ à nɔ̀ɔ sì a pãpãkɛnaa pìi gũn. Yuda pì: À bo kãao ò tɛ́ sɔ̃a. 25Kũ òtɛn bo kãao bàai, à lɛ́gbãzã kɛ̀ a zã denɛ à pì: Gbɛ̃ kũ à pɔ́ díkĩnanɔ vĩ mɛ́ à nɔ̀ɔ dɔ̀magu. Ǹ sèedakɛbɔ kũ a bàao kũ gò díkĩnao gwa, tó ń a de dɔ̃. 26Yuda pɔ́ pìnɔ dɔ̃̀, akũ à pì: Nɔgbɛ̃ pì yã nna demala, zaakũ mádi a kpá ma nɛ́ Selaaro. Yuda dí wútɛ kãao doro. 27Kũ à kà nɛ́'ina, à sù à lè sìkanɔ mɛ́ ò kú a gbɛrɛ gũn. 28Gɔrɔ kũ àtɛn nɛ́ i, ń gbɛ̃ do ɔ bò, akũ nɔgbɛ̃ nɛ́sɛtɛri wɔ̃nɔ tɛ̃ra dɔ̀a à pì: Nɛ́ díkĩna mɛ́ à bò káaku. 29Kũ nɛ́ pì a ɔ sùkpa, akũ nɛ́ plade bò, akũ nɔgbɛ̃ pìi pì: N bo bùimɛ fá! Akũ ò tɔ́ kpànɛ Pɛrɛzi. 30Abire gbɛra kũ a gbɛ̃ndo kũ ò wɔ̃nɔ tɛ̃ra dɔ̀ a ɔaa bò, akũ ò tɔ́ kpànɛ Zɛra.

Currently Selected:

NAANAA 38: BB2005

Highlight

Copy