NAANAA 25

Ibrahĩ ganaa

1Ibrahĩ nɔ pãnde sɛ̀ dɔ a tɔ́n Kɛtura. 2Nɛ́ kũ à ì kãaonɔ tɔ́n dí: Zimlã, Yɔkɔsã, Mɛdã, Midiã, Isibaki, Sua. 3Yɔkɔsã mɛ́ à Seba kũ Dedão ì. Dedã burinɔn Asirianɔ kũ Lɛtusinɔ kũ Lɛuminɔ ũ. 4Midiã nɛ́gɔ̃gbɛ̃nɔ tɔ́n dí: Efa, Ɛfa, Anɔku, Abida, Ɛlɛda. Ń pínki Kɛtura burinɔmɛ.

5Ibrahĩ a aruzɛkɛ kpà Isaakua pínki, 6akũ à gba dà a nɔ yìgisaride nɛ́nɔnɛ à ń gbárɛ ifãboki kpa de à kpɛ́ à ga, de òsungɔ̃ kú kũ Isaakuoro yãi.

7Ibrahĩ kɛ̀ wɛ̃̀ bakɛ̃ndo sɔɔro sari, 8akũ à gà. À zĩ kũ̀ yúkuyuku, gbasa à kà a gbɛ̃nɔla gyãwãn. 9A nɛ́nɔ Isaaku kũ Sumailao a vĩ̀ Makpɛla gbɛ̀wɛɛ gũn, Mamare ifãboki kpa, bura kũ à de Iti buri Zoa nɛ́ Ɛflɔnu pɔ́ ũ yã 10kũ Ibrahĩ pìi lù Itinɔa. Gwen ò a vĩ̀n kũ a nanɔ Sarao. 11Ibrahĩ ganaa gbɛra Luda arubarikaa dà a nɛ́ Isaakun. À vutɛna Ludabɛ̃nɛkũadima'e lɔ̀gɔɔ sarɛ.

Sumaila burinɔ

12Ibrahĩ nɛ́ Sumaila burinɔ yãn dí. Sara zĩkɛri Hazara, Misila nɔgbɛ̃ mɛ́ à nɛ́ pìi ì kãao. 13Sumaila nɛ́gɔ̃gbɛ̃nɔ tɔ́n dí lákũ ò ń í nà. A daudu tɔ́n Nɛbayo. A dakũnanɔ tɔ́n dí: Keda, Adabɛli, Mibisamu, 14Misima, Duma, Masa, 15Adada, Tema, Yetu, Nafisi kũ Kedemao. 16Sumaila nɛ́gɔ̃gbɛ̃nɔ tɔ́n gwe. Ń baadi a tɔ́ kpà a lakutu ke a bùraanɛ. Mɔ́kɔ̃nɔmɛ a buri kuri awɛɛplanɔ kínanɔ ũ.

17Sumaila kɛ̀ wɛ̃̀ basuddo akuri awɛɛsuppla, akũ à gà à kà a gbɛ̃nɔla gyãwãn. 18A burinɔ vùtɛ zaa Avila ari à gɛ̀ɛ pɛ́ Surua, Misila ifãboki kpa gɛna Asiria bùsu kpa. Òdi kɔ̃ tɛ́ kpákpa kũ Ibrahĩ buri kparanɔro.

Isau kũ Yakubuo inaa

19Ibrahĩ nɛ́ Isaaku burinɔ yãn dí. Ibrahĩ Isaaku ì. 20Kũ Isaaku kà wɛ̃̀ bupla, akũ à Labã dãre Rɛbɛka sɛ̀. Àkũmɛ Siria bùsu gbɛ̃ Bɛtuɛli kũ à bò Mɛsɔpɔtamia bùsun nɛ́ ũ. 21Isaaku wɛ́ kɛ̀ Dikiria a nanɔnɛ, zaakũ paramɛ, akũ Dikiri a adua sì, a nanɔ pìi nɔ̀ɔ sì. 22Sìkanɔ tɛn ɔsi ká a gbɛrɛn, akũ à pì: Bɔ́ yã mɛ́ à tò yã bire taka ma lee? Akũ à gɛ̀ɛ à Dikiri là. 23Dikiri pìnɛ:

Buri mɛ̀n pla kú n nɛ́'isɔn,

gbɛ̃nɔn pla kũ ò kú n gbɛrɛn pìnɔ ni kɛ̃kɔ̃a.

Buri mɛ̀n do gbãna nigɔ̃ de a dola,

a kũ à bò káaku nigɔ̃ nɛ́ ũ gbɛ̃ kpɛdenɛ.

24Kũ a nɛ́'igɔrɔ kà, akũ à sìkanɔ ì gɔ̃gbɛ̃nɔ ũ. 25Kũ gbɛ̃ káaku tɛn bo, à bò tɛ̃ɛ zónzon. À mɛ̀kã vĩ lán uta kãde bà, akũ ò tɔ́ kpànɛ Isau. 26Abire gbɛra kũ nɛ́ plade tɛn bo, à dɔ̀ Isau gbátokia, akũ ò tɔ́ kpànɛ Yakubu. Isaaku wɛ̃̀ baaakɔ̃de gũnn à nɛ́ pìnɔ ì.

27Nɛ́ pìnɔ zɔ̃kɔ̃ kũ̀. Isau kɛ̀ tofekari gbãna kũ àdi kɛ̃ sɛ̃̀ntɛaro ũ. Yakubu sɔ̃ bɛgwariimɛ. 28Isaaku ye Isaui kũ à nɔ̀bɔ lɛ́'i vĩ yãi. Rɛbɛka sɔ̃ à ye Yakubui.

29Zĩkea Yakubu tɛn dòo kuku, akũ Isau sù kũ sɛ̃̀ntɛo nà tɛni a dɛ. 30Akũ à pì Yakubunɛ: N yã nna! Ǹ tó mà dò tɛ̃ra bire ble, zaakũ nà tɛni ma dɛmɛ. A yã mɛ́ à tò, ò tɔ́ kpà Isaunɛ Ɛdɔmu. 31Yakubu pì: Ǹ n daudukɛzɛ kpáma gĩa. 32Akũ Isau pì: Má kú ga lɛ́i, bɔ́n ma daudukɛzɛ ni kɛmɛnɛɛ? 33Akũ Yakubu pìnɛ: Ǹ la damɛnɛ gĩa. Akũ à la dànɛ à a daudukɛzɛ kpàa. 34Akũ Yakubu burodii kpàa kũ bládoo pìio. À blè à í mì, akũ à fùtɛ à bò. Lɛmɛ Isau kɛ̀ lɛ, à a daudukɛzɛ dìtɛ pã.

Currently Selected:

NAANAA 25: BB2005

Highlight

Copy