ZĨRINƆ 7

Sitivĩ yã'ona gbãnadenɔnɛ

1Akũ sa'oriki Sitivĩ là à pì: N yã pìnɔ ò yãpuran yá? 2Akũ à pì: Ma gbɛ̃nɔ kũ ma denɔ, à ma! Luda Gakuride bò à sù ó dizi káaku Ibrahĩa gɔrɔ kũ à kú Mɛsɔpɔtamia bùsun, zaade à kpɛ́ à gɛ́ vutɛ Arana. 3À pìnɛ: Ǹ bo n bùsun n danɛnɔ tɛ́ ǹ tá bùsu kũ mani mɔnnɛn. 4Akũ à bò Kaladia bùsuu pìi gũn à gɛ̀ɛ à vùtɛ Arana. A de ga gbɛra Luda sù kãao bùsu kũ á kun tera dí pìn. 5Luda dí bùsuu pì zĩtɛ ke kpáa bee gɛ̀sɛ doro, ama à a lɛ́ sɛ̀nɛ à pì ani gɔ̃ a pɔ́ ũ kũ a burinɔ. Gɔrɔ birea sɔ̃ Ibrahĩ nɛ́ vĩro. 6Luda pìnɛ lán dí bà: N burinɔ ni nibɔ ble bùsu pãnden. Gwen oni zɔ̀ blen, oni wɛ́ tãḿma ari wɛ̃̀ wàa pla. 7Luda pì áni wari dɔ buri kũ oni zɔ̀ bleńnɛnɔa, Ibrahĩ buri pìnɔ ni bɔtɛ ò su ò donyĩ kɛarɛ gu dí pìn. 8Akũ Luda tɔ̃̀zɔ̃yã dà Ibrahĩnɛ a bàka kunna kãao sèeda ũ. Kũ à Isaaku ì, à tɔ̃̀ɔ zɔ̃̀nɛ a gɔrɔ sɔraakɔ̃de zĩ. Lɛn Isaaku kɛ̀ Yakubunɛ lɛ dɔ, akũ Yakubu kɛ̀ ó dizi káaku gbɛ̃nɔn kuri awɛɛplanɔnɛ lɛ se dɔ. 9Akũ ó dizi káaku pìnɔ nɛ̀sɛgɔ̃baa kpà kũ ń gbɛ̃ndo Yusufuo, ò a yìa ò tà kãao Misila. Luda kú kãao, 10à a bò a wari sĩnda pínki gũn. Luda Yusufu pìi gbà ɔ̃ndɔ̃ à tò à nna kũ Misila kína Firi'aunao, akũ à a dìtɛ Misila bùsu gbɛ̃ zɔ̃kɔ̃ ũ kũ a bɛ ɔnnwo. 11Akũ nàa kà Misila kũ Kanaanɔ bùsuuo pínki. Wari kɛ̀ zɔ̃kɔ̃, ó dizi pìnɔ dí pɔ́ke le ò blèro. 12Kũ Yakubu mà pɔ́blewɛ kú Misila, à ó dizi pìnɔ zĩ̀ gwe. Ń gɛna káakuden gwe. 13A gɛ̃̀n pladen Yusufu a zĩda mɔ̀ a vĩ̀ninɔnɛ, akũ Firi'auna Yusufu danɛnɔ dɔ̃̀. 14Akũ Yusufu gbɛ̃ zĩ̀ a de Yakubua à mɔ́ kũ a danɛnɔ ń pínki. Ń pínki gbɛ̃nɔn baaakɔ̃ akuri awɛɛsɔɔromɛ. 15Akũ Yakubu gɛ̀ɛ Misila. Gwen à gàn kũ ó dizi pìnɔ ń pínki. 16Ò sù kũ ń gɛ̀nɔo Sɛkɛmu, akũ ò ń vĩ gbɛ̀wɛɛ kũ Ibrahĩ lù mira ũ gũn Amɔ nɛ́nɔa à fĩnaa bòńnɛ kũ andurufuuo.

17Kũ lɛ́ kũ Luda sɛ̀ Ibrahĩnɛ gɔrɔ ye à ká, ó buri dasi kũ̀ à kàra Misila manamana. 18Akũ kína dufu kũ à Yusufu dɔ̃ro kpata blè Misila. 19À pãsĩ kũ ó burio à wɛ́ tã̀ ó dizinɔa, à tò ò ń nɛ́nɔ kɔ̀tɛ ò gàga. 20Gɔrɔ birean ò Musa ì a àlesi mana. Ò a gwà a de bɛa mɔ aakɔ̃mɛ. 21Kũ ò a zùkũna, akũ Firi'auna nɛ́nɔgbɛ̃ a sɛ̀ a a gwà a zĩda nɛ́ ũ. 22Ò Misilanɔ ɔ̃ndɔ̃ dà Musanɛ pínki, à gɔ̃̀ gbɛ̃ zɔ̃kɔ̃ ũ yã'ona kũ yãkɛnaao gũn.

23Kũ à kà wɛ̃̀ bupla, à dà a nɛ̀sɛɛ gũn à gɛ́ a Isaraila dakenɔ gwa. 24Kũ à è Misila gbɛ̃ tɛn wari dɔ a gbɛ̃ mɛ̀n doa, akũ à yã sì a gbɛ̃nɛ à fĩna bòa à a dɛ̀. 25Kũ Luda ye à a gbɛ̃nɔ sura ba a gãi, àtɛn da ò dɔ̃mɛ, ama ò dɔ̃ro. 26Kũ gu dɔ̀, Isaraila gbɛ̃nɔn planɔ tɛn fìti kɛ, akũ a sù à ń kpaatɛ à kútɛ kɛ̀ńnɛ à pì: Ma gbɛ̃nɔ, à kɛ̀ dera átɛn wari dɔkɔ̃a átɛ̃nɛɛ? 27Akũ gbɛ̃ kũ àtɛn wari dɔ a gbɛ̃ndoa ɔ sɔ̃̀ Musai à pì: Dí mɛ́ à n kɛ kína yãgɔ̃gɔ̃ri ũwɛrɛɛ? 28Ń ye ǹ ma dɛ lákũ n Misila gbɛ̃ dɛ̀ nà gĩan yá? 29Kũ Musa yã pìi mà, à bàa lɛ̀ à tà Midiã bùsun. Gwen à nɛ́gɔ̃gbɛ̃nɔ ìn gbɛ̃nɔn pla.

30Wɛ̃̀ bupla gbɛran malaika bò à sùa gbárannan Sinai kpi sarɛ tariankpã tɛ́ gũn. 31Kũ Musa daboyã bire è, à bò a sarɛ. Kũ à nài à gwa, à Dikiri kòtoo mà à pì: 32Makũmɛ n dizinɔ Ibrahĩ kũ Isaakuo kũ Yakubuo Luda ũ. Vĩna Musa kũ̀ àtɛn lukaluka, adi fɔ̃ à wɛ́ sɛ̀ à gwàro. 33Akũ Dikiri pìnɛ: Ǹ n kyate bobo, zaakũ gu kũ ń zɛn kú adonamɛ. 34Ma wɛ́tãmma kũ òtɛn mɔ ma gbɛ̃ kũ ò kú Misilanɔnɛ è sãnsãn ma ń ndanaa mà, akũ ma su mà ń sura ba. Mani n zĩ Misila sà. 35Musa kũ ò gìnɛ yã ò pì dí mɛ́ à a kɛ̀ kína yãgɔ̃gɔ̃ri ũńnɛ pìin Luda yã ònɛ malaika kũ à bò à sùa tariankpã gũn gãi, à a zĩ̀ kína kũ ani ń gbarɛ ũ. 36Àkũ mɛ́ à bò kũńwo à yãbonsarɛnɔ kũ daboyãnɔ kɛ̀ Misila kũ Isira Tɛ̃rao kũ gbáranna gũnwo wɛ̃̀ bupla. 37Musa pì mɛ́ à pì Isarailanɔnɛ, Luda ni ń gbɛ̃ke sɛ́ annabi ũ lán a bà. 38Musa pì kú kũ gbɛ̃ kũ ò kakarana pìnɔo gbárannan, à kú gwe kũ ó dizinɔ kũ malaika kũ à yã ònɛ Sinai kpi musuo. Àkũ mɛ́ à yã wɛ̃̀ndidenɔ sì à kpáwá.

39Ó dizinɔ dí a yã maro, akũ ò gìi ń laasun ɛ̀ra à tà Misila. 40Ò pì Harunanɛ: Ǹ tãna kenɔ kɛwɛrɛ ò dowɛrɛ arɛ, zaakũ Musa kũ à ó bɔ́tɛ Misila, ó dɔ̃ yã kũ à a lèro. 41Gɔrɔ birean ò tãna pì lán zùsanɛ bɔ̀rɔɔ bà, akũ ò sa òa ò dikpɛ kɛ̀ pɔ́ kũ ò kɛ̀ ń zĩdanɛ pì yã musu. 42Akũ Luda kpɛ lìńnɛ à tò ò donyĩ kɛ̀ ludambɛ pɔ́nɔnɛ lákũ ò kɛ̃̀ annabinɔ takada gũn nà ò pì:

Isarailanɔ, adi kɛ makũ a sa òma gbárannan wɛ̃̀ buplaro.

43Tãna Mɔlɛki bizakutan á sɛna

kũ susunɛ tãna Rɛfã kũ a zɛo takao.

Dikiri kũ a pì a donyĩ kɛ̀ńnɛnɔ yãin

mani tó ò tá kãáo Babilɔnu dire kpa.

44Ó dizinɔ Luda bàka kunna kũńwo kuta vĩ gbárannan. Luda a taka mɔ̀ Musanɛ, akũ ò kɛ̀ lákũ Luda ònɛ nà. 45Kuta pìi gɔ̃̀ Yɔsuanɛ kũ ó dizinɔ, akũ ò sù ò buri kũ Luda pɛ̀ḿmańnɛnɔ bùsuu sìḿma. Kuta pì kú gwe ari Dauda gɔrɔa. 46Dauda pì nna kũ Ludao, akũ à wɛ́ kɛ̀a de à le à kpɛ́ bo Yakubu Ludanɛ. 47Sulemanu mɛ́ à kpɛ́ pìi bònɛ. 48Ama Luda Musude dìgɔ̃ kú kpɛ́ kũ bisãsirinɔ bòo gũnlo, lákũ annabii ò nà:

49Dikiri pì:

Musu bi ma kíblegbaamɛ,

zĩtɛ bi ma tìntimmmɛ.

Kpɛ́ kpate takan áni bomɛnɛɛ?

Mákpan ma kipaki kunn?

50Makũ mɛ́ ma pɔ́ sĩnda pínki kɛ̀roo?

51Ludayãdarisarinɔn á ũ! Á nɛ̀sɛ vĩro! Á sã gbãnamɛ! Adìgɔ̃ gí Luda Ninii adìgɔ̃ kɛ lán á dizinɔ bà. 52Annabi kpaten á dizinɔ gì wɛ́ tãaii? Ò gbɛ̃ kũ ò gĩnakɛ ò Gbɛ̃ Mana suna yã òo pìnɔ dɛ̀dɛ. Ade pìin a bo a kpɛ a a dɛ̀ sà. 53A doka kũ malaikanɔ sùoo sì, ama ádi zĩ kɛ a yãaro.

Sitivĩ papana kũ gbɛ̀ɛo

54Kũ ò yã pìi mà, ń pɔ fɛ̃̀i ò saka sòi. 55Akũ Luda Nini dìdi Sitivĩa à wɛ́ pɛ̀ ludambɛa, akũ à Luda gakuri è kũ Yesuo zɛna a ɔplai. 56Akũ à pì: À ma! Ma ludambɛ è wɛ̃na, Bisãsiri Nɛ́ zɛna Luda ɔplai. 57Akũ ò ɔ tàta ń sãa ò wiki gbãna lɛ̀, akũ ò kùsia lɛɛlɛlɛɛlɛ. 58Ò a gàtɛ ò bò kãao wɛ̃tɛ kpɛ, akũ òtɛni a pápa kũ gbɛ̀ɛo de ò a dɛ. Ò ń uta zɔ̃kɔ̃nɔ bò ò kàtɛ kɛfɛnna kũ òdi pinɛ Solu sarɛ. 59Kũ òtɛn Sitivĩ pápa kũ gbɛ̀ɛo lɛ, à adua kɛ̀ à pì: Dikiri Yesu, ǹ ma nini sí. 60Akũ à kùtɛ à wiki gbãna lɛ̀ à pì: Dikiri, ǹsun ń durunna díkĩna daro. Yã bire onaa gbɛran à gà.

Currently Selected:

ZĨRINƆ 7: BB2005

Highlight

Copy