ZĨRINƆ 6

Kpanyĩri gbɛ̃nɔn supplanɔ ditɛnaa

1Gɔrɔ birea kũ Yesu ìbanɔ tɛn kara, ń Girikiyãmarinɔ tɛn yãkete ká ń Eberuyãmarinɔi ò pì, tó òtɛn pɔ́ble kpaatɛ lákũ gu dìgɔ̃ dɔ nà, òdi pã kpá ń gyaanɔnɔimɛ. 2Akũ zĩ̀ri gbɛ̃nɔn kuri awɛɛplanɔ Yesudenɔ sìsi ń pínki ò pì: À zɛ́ vĩ ò pã kpá Luda yãi ò laakari dɔ pɔ́ble kpaatɛnaaaro. 3À gɔ̃gbɛ̃nɔ bo á tɛ́ gbɛ̃nɔn suppla, gbɛ̃ mana kũ ɔ̃ndɔ̃ kũ Luda Ninio pɛ̀kɛrɛḿmanɔ, de ò ń ditɛ zĩ pì gbɛ̃ zɔ̃kɔ̃nɔ ũ, 4óni laakari dɔ aduakɛnaaa kũ Luda yã'ońnɛnaao. 5Yã pìi kàńgu ń pínki, akũ ò Sitivĩ kũ Luda Nini kũ ludanaanikɛnaao pɛ̀kɛrɛaa sɛ̀ kũ Filipio kũ Porokoruo kũ Nikanɔo kũ Timɔo kũ Pamɛnao kũ Antiɔku gbɛ̃ Nikola kũ à Yudanɔ donyĩzɛ sɛ̀ yão. 6Ò gɛ̀ɛ kũńwo zĩ̀rinɔ kĩnaa, akũ ò adua kɛ̀ńnɛ ò ɔ nàḿma.

7Luda yã tɛn dagula, Yesu ìbanɔ tɛn kara Yurusalɛmu manamana, akũ sa'orinɔ Yesu yã sì dasidasi.

Sitivĩ kũnaa

8Luda arubarika kũ gbãnao pɛ̀kɛrɛ Sitivĩa, akũ àtɛn daboyã kũ yãbonsarɛnɔ kɛ gbɛ̃nɔ tɛ́. 9Aduakɛkpɛ ke kun kũ òdi pi zĩdadenɔ aduakɛkpɛ. Ń gbɛ̃kenɔ bò Sirɛni kũ Alɛsandariao kũ Silisia bùsuuo kũ Asia bùsuuo. Akũ ò ibɛrɛɛ sɛ̀ kũ Sitivĩo ò lɛ́kpakɔ̃a kɛ̀ kãao. 10Ama odi a fɔ̃ro ɔ̃ndɔ̃ kũ Luda Nini a gbà yãi. 11Ò tɛ́ kà gbɛ̃nɔn, akũ gbɛ̃ pìnɔ pì: O mà à bò Musa kũ Ludao yã kpɛ. 12Ò Yudanɔ kũ ń gbɛ̃ zɔ̃kɔ̃nɔ kũ ludayãdannɛrinɔ laakarii fùtɛ, akũ ò gɛ̀ɛ ò Sitivĩ kũ̀, ò gɛ̀ɛ kãao ń gbãnadenɔ kĩnaa. 13Akũ ò sù kũ sèedade ɛ́kɛnɔ ò pì: Gbɛ̃ dí mɛ́ àdigɔ̃ Luda kpɛ́ kũ a dokao vãni bo lakanaa sari. 14Zaakũ o mà à pì Yesu Nazɛra ni kpɛ́ pì kakatɛ à ó futɛokarayã kũ Musa dàwɛrɛ litɛ sɛ́. 15Akũ gbãnade kũ ò vutɛna gwenɔ wɛ́ pɛ̀ Sitivĩa ń pínki, ò è a ãn de lán malaika ãnn bà.

Currently Selected:

ZĨRINƆ 6: BB2005

Highlight

Copy